Ⅰ Aye Omonene emeroberio yao nigo ere ayaboronge; nakio gekogera baria batatageti korongeigwa basirire Ⅱ Ekiagera ekero abanto ababe bakagete buna bairire ense yao ebe inse y’okobua kwabo, barabwo abanyene nigo basibetwe ase obotuko bware n’omosunte omonene, nigo batigarete ase chinyomba chiabo ase batare n’oborendi bwao bwa botambe. Ⅲ Nigo bakagete buna ebibe biabo nigo biare ebiabobisi bitakeire koorokigwa, nigo biatakeire kobiswa na gokunekwa n’egetambaa ekemwamu gi’okweba; korende bono barabwo bakanyorwa n’obwoba bw’okoondokia, bakoboa na gosebererekana ekero baroche riringori. Ⅳ Nonya n’echinyomba chiabo ase bamenyete tichiabatangete korwa ase obwoba. Nigo baetananetwe n’amariogi y’okondokia; ekababera chingaki chi’ogoichana na kogechigwa. Ⅴ Morero toiyo obwate chinguru chi’okobamorekera, gose engenangeni eria ekobara mono tiyare konyara komoreka omosunte oria bw’amakweri. Ⅵ Bakaorokerwa n’omorero bw’ogokumia oyio bwogetigwe na Mwanyabaanto okabamorekera, na ase obwoba bwabo bakegena buna ayio barorire nigo are ay’okondokia mono kobua aria konya barorire. Ⅶ Amang’ana aria konya bakorire ase oborogi bwabo akabugwa na obongaini bwabo bwonsi bogasokigwa. Ⅷ Ekiagera baria bakagerete buna mbaserie obwoba korwa ase omorwaire, barabwo abanyene bakarwara ase obwoba bw’ogosekereria. Ⅸ Nonya nekero gento gi’okondokia getarenge oo, barabwo nigo barenge n’obwoba ase eriogi ri’echingiti n’ebitongwa biria biare kwagura. Ⅹ Bagasirigwa ase ogotengechigwa kw’obwoba, bakanga nonya nkorigereria igoro ase batare konyara gwetanga. Ⅺ Omochakano bw’obwoba n’okoiroka, na nigo bogweonchora bwoka obonyene. Onde bwensi okorire okomocha nigo akorora mono aria amabe goetania amaya. Ⅻ Obwoba n’ogosiria ogosemeria okwo gokoretwa n’ebirengererio ebiya. ⅩⅢ Ekero omonto agosiria ogosemeria kw’omoyo, nigo agosogwa n’obwoba obwo bokoretwa n’oboriri. ⅩⅣ Obotuko bwonsi abanto abwo nigo bakorara batari gotimoka, nonya obotuko boria tibwabwate nguru chinde ase bare, ekiagera nigo bwaruete korwa ase ense y’abakuure agwo ase nguru chinde chitari. ⅩⅤ Kero kende nigo baseretigwe n’emerengari y’okwoboyia bagatigara batari na nguru chinde ekiagera obwoba obonene bwabasoete. ⅩⅥ Ase igo monto onde bwensi orenge oo nigo asoetwe n’obwoba, akaba gasibire ase chinyororo chi’obwoba bwabo abanyene. ⅩⅦ Abaremi, abarisia n’abakori emeremo abwo bare gokora emeremo ase ebitunwa bonsi nigo basoetwe n’emechando eyio eyio batare konyara gwetanga, ekiagera bonsi nigo basibetwe chinyororo chiria chi’omosunte. ⅩⅧ Kera ekero bare koigwa embeo ekogusa, gose eriogi ri’ororo ri’echinyoni chire ase chinsagia chi’emete, gose eriogi ri’amache agotirimboka bwango, ⅩⅨ gose eriogi ri’ebitunwa bikogwa, gose eriogi ri’ebitongwa bikoiruruka na kominyoka, gose eriogi ri’echingiti chikwana ase obotindi, gose eriogi korwa ase ebitunwa, barabwo nigo bare gwaka inse ase obwoba. ⅩⅩ Ense yonsi nigo yamoregetwe n’omobaso na abanto nigo bagendererete gokora emeremo yabo ya kera rituko batari na bwoba bonde. ⅩⅪ Mbarabwo boka batubetwe n’obotuko obwo bware obonene, omobwekano bw’mosunte oria bw’amakweri oria obaganyete; korende bakaba egurube endito ase barabwo abanyene goetania nonya n’omosunte oria.