Ⅰ Ase igo, abanto abwo bakanyora egesusuro korwa ase ebitongwa ebio ebio buna yaganeirie; bagachandwa korwa ase ekeombe ki’ebitongwa ebio. Ⅱ Korende aye Omonene ribaga ri’okoa abanto abwo egesusuro okabarorera amaabera. Aye okabanchera bakaria endagera y’ense engeni yarenge enyansu erio goisanekia okogania kwabo. Ⅲ Nigo gwakorete igo erio abanto baria bare gosasiima emegwekano ekero baraigwe enchara basirie okogania gw’okoria endagera ase engencho y’ebitongwa biria bikogechia ebio baireretwe. Korende abanto bao nigo baigwete enchara ase ekero egeke erio magega yaye bakanyora endagera eria yare gwansa mono. Ⅳ Nigo yabwenerete abachandi baria b’abaanto bao bachandeke ase okoborwa ebinto biria baganeti ase obogima bwabo, korende abanto bao bakerorera buna ababisa babo bare gochandwa. Ⅴ Ekero ching’iti chiria chiare koondokia chiarenge n’esumo chiaborete abanto bao chibaite bakwe, aye tikwagendererete kogechigwa goika omoerio. Ⅵ Nigo bachandetwe ase ekero egeke erio kebe ekiorokererio ase bare. Erio aye okabaa ekemanyererio gi’okobagwenia, erio obainyorie okogania kw’amachiiko ao. Ⅶ Onde bwensi ore korigereria ekemanyererio ekio kwabaete nigo are kogwena, eki kwamogwenia tari ekemanyererio keria korende naye omotoria obonsi. Ⅷ Ase ogokora igo nigo kwaenekeretie ababisa baito buna aye naye ogotoria abanto korwa ase kebe kende gionsi. Ⅸ Ababisa baito nigo bakwete ase okoromwa n’echingige n’echingi, na nchera ende yonsi y’okobatoria tiyarenge oo, ase engencho mbagwenerete koegwa egesusuro n’ebitongwa ebio. Ⅹ Korende nonya n’echingiti chiria chiabwate esumo tichianyarete gosiria abanto bao, ekiagera aye nigo gwachete n’amaabera okabagwenia. Ⅺ Nigo barometwe n’echingiti erio bainyore amachiiko ao, korende bagatorigwa bwango erio tibakweba, na babe aboro ase okomanya obuya bwao. Ⅻ Riogo rinde tiriyo riabagwenetie, korende goetera ase ring’ana riao rioka, aye Omonene abanto bao bakagwena. ⅩⅢ Aye nobwate okobua igoro y’obogima n’ogokwa; aye nigo ogotirimbokia abanto goika ogokwa naende kwabairania. ⅩⅣ Omonto omobe nabo agoita oyonde, korende ere takoirania oria okwa abe moyo, gose takonyara gotoria enkoro esibire ase ogokwa. ⅩⅤ Monto onde taiyo oranyare gotama korwa ase ore. ⅩⅥ Abanyabibe baria nigo bangete gokomanya, okabasusura n’echinguru chi’okoboko kwao. Bakairwa n’emerindo emenene, n’embura y’amagena, n’echinkoba chitari gosira na gosirigwa n’omorero. ⅩⅦ Ogokumia nkoria nga amache ayio akageire korimia omorero, tanyarete korimia, omorero oyio nigo bwogete ase chinguru mono ekiagera chinguru chi’ebitongwa chionsi nigo chikorwana erio gotoria abachenu. ⅩⅧ Ase chingaki gete, omorero oria ogasiria chinguru chiaye erio tosiria ebitongwa ebio biaretetwe erio koa abanyabibe egesusuro erio abanto abwo barore na komanya nga endamwamu yao nigo yababwatetie. ⅩⅨ Korende naende ase chingaki gete omorero oria ogoka mono okoba omotindi goetania omorero bw’amache, ogasiria ense eria abanyabibe abwo bamenyete. ⅩⅩ Korende amaakwa aya onsi tanyorete banto bao, aye nigo kwabaete endagera y’amalaika; nigo kwabaiyereretie emegati korwa igoro, emogati eyio nigo yare goisanekia kera oyomo. ⅩⅪ Endagera yao nigo yaorogetie buna aye bwanchete abana bao. Endagera eyio nigo yaisanegetie enchara ya kera oyomo oyio oyeriete; endagera eyio nigo yaroisetigwe etaganetie onde ayeroisie naende. ⅩⅫ Endagera eyio nigo yanga buna amagena y’embura korende tiyare kobera esire; eke nigo kiagerete abanto bao komonya nga omorero oria na embura y’amagena ebio biasiretie ababisa babo ase chingaki echio; ⅩⅩⅢ nigo obisete chinguru chiaye erio abanto bao banyore endagera. ⅩⅩⅣ Ense nigo yatongetwe inse y’erichiiko riao, na ebitongwa bionsi nigo bikogenda ase chinguru chiao na koa abanyabibe egesusuro; korende biabisa chinguru chiabo erio kobaisanekia baria bagosemeretie. ⅩⅩⅤ Ase igo chingaki chiria ense nigo yaonchoreretie ase chingencho chinyinge erio kw’orokia buna ogoisanekia ase obwororo okogania kwa baria bonsi bakogosaba. ⅩⅩⅥ Aya nigo akoregete erio abana bao abwo bwanchete aye Omonene bamanye buna aye tori gokirigwa ase ebimeri biria togosimeka, korende ring’ana riao nario rikorenda baria bagosemeretie. ⅩⅩⅦ Endagera eria etare gosarigwa n’omorero nigo yare kobera ekero omobaso ochakire kobara mambia. ⅩⅩⅧ Ekio nigo kogotoegeria buna ntobwenerete koboka mambia na gokoiraneria mbuya mono boigo na kogotogia ekero risare rikorimera. ⅩⅩⅨ Ekiagera ogosemeria kw’omonto otari koiraneria mbuya mono nigo kogosira buna ritaturi, nigo kogosira buna amache atari n’engencho ende.