Ⅰ Endamwamu yao etari na moerio ekagenderera gochera abanyabibe goika omoerio. Aye nigo kwamanyete eki bare gochia gokora magega bataragekora. Ⅱ Nigo kwamanyete buna magega kwabancheire abanto bao bagende sobo, na nonya magega kwabayereirie ase orogendo rwabo, barabwo goika bare goonchoreria ebirengererio biabo bababwatie. Ⅲ Ekeene nonya konya tibaratiga korera ase engencho y’ogokwa kw’abaanto babo abwo bakwete, barabwo bagachora gokora ring’ana ri’oboriri mono; nigo babwatetie abwo konya babasoroire babatige bagende. Ⅳ Egesusuro keria baganeirie gekabaraa goikera agwo, goika bakeba ayio abanyorete; erio igoro ase emechando yabo bakamenta egesusuro ekio kiaborete. Ⅴ Ekero abanto bao bagendererete ase orogendo rwabo ri’ogokumia ababisa abwo nigo baboeretwe n’amakweri y’okondokia. Ⅵ Ebitongwa bionsi nigo biakoretwe oboyia, korengana n’amachiiko ao, erio abanto bao tibachaywa. Ⅶ Igoro nigo yabakengete n’ekiiriri, na amaache agakama korwa roche erio bagatara ense enyomo, y’obonyansi bokaama gati y’emerindo y’enyancha, bakanyora enchera ase bagoeta. Ⅷ Abanto bao bagatamboka bakoragwa n’okoboko kwao magega kobarorire ebikone ebio kwabakorerete. Ⅸ Bagaetaetanana buna chibarasi na gotuma tuma buna chimanwa ch’echingondi bakogotogia aye Omonene kwabatoretie. Ⅹ Chingaki echio bakainyora aria abanyorete ekoro barenge ase ense y’obosomba: ense eria egaichorwa n’echinda ribaga ri’echiombe, n’echindoche chigaichorwa n’ebioto ribaga ri’echinswe. Ⅺ Omoerio bakarora chinyoni chingeni. Ⅻ Ekero baganetie endagera egwansa mono, bakaegwa chikware korwa roche echio bariete buna endagera. ⅩⅢ Korende abanyabibe baria bakanyora egesusuro, magega ko bakuureretwe n’echinguru chi’echinkoba; nigo banyorete emechando eyio baganeirie ase engencho y’obobe bwabo. Nigo bangete abanto bao na bakabakorera bobe goetania ’nse ende yonsi. ⅩⅣ Abande nigo bangete kwarigania abageni ase chinka chiabo, korende abanto aba bagakora abageni aba koba abasomba babo; abageni abwo agwo magega barenge abaya ase bare. ⅩⅤ Ense ende yonsi etari kwarigania abageni nenyore egesususro, ⅩⅥ korende abamisiri aba barabwo nigo baariganetie abanto bao agwo ritangani ase omogooko na bakabakorera buya buna abanyene ense aria, na magega yaye bakabaonchokera bagachaaka kobachanda. ⅩⅦ Abanto aba nabarabwo bakanyora ogoakwa bakaba emeuko buna baria ba Sodomu ase egesieri ki’oria omochandi. Bagacherwa n’omosunte omonene, erio kera omonto agachaaka korigia enchera ase egesieri kiaye. ⅩⅧ Obokano nigo bobwate chiusi ao ao na kera eusi nigo ebwate eriogi riaye, na eriogi erimo nabo rikobekwa n’erinde erio eriogi rinde risoka. Igo nabo yabete engaki eria ekero ebitongwa biasoete ase omochogano rigereria buna biabete: ⅩⅨ ebitongwa bi’ense enyomo bigaochoka bikaba ebi’amache, na biria bi’amache bigata ase ense enyomo. ⅩⅩ Omorero okagenderera gwoka nonya nase amache, amache nigo ebete emeremo yaye y’okorimia omorero. ⅩⅪ Nonya nigo omorero oria tonyarete gosiria ching’iti chiria chigosira echio chiarenge gotara gati gati y’omorero, gose tonyarete gosaria endagera eria ya igoro eyio yabwekaine amagena embura. ⅩⅫ Aye Omonene nigo okorenda na gotogia abanto bao ase kera enchera, gose tigwatigete kobarenda as’engaki ende yonsi gose ande onsi.