Ⅹ
Omonene okoria eira y’ogosibora abanto baye
Ⅰ Inwe saba Omonene abatwerie embura y’okwamia endagera ase engaki yaye. Omonene natonge amare akomesa, na atwerie abanto embura na koa kera oyomo endagera korwa mogondo.
Ⅱ Ebinyasae bire ase chinyomba nigo bigokwana amang’ana are bosa, na amaroro ’abaringoria nay’oborimo. Abaroti chindoto nigo bagokwana chindoto chi’obong’ainereria, na baremia abande ase okoremia kwa bosa. Ase engencho eyio abanto nigo bagotayaya buna riicho rie ching’ondi, bachandegete, ekiagera tibabwati omorisia.
Ⅲ “Endamwamu yane nigo egwoka igoro y’abarisia, ning’ee chigoree chiria egesusuro, ekiagera inche Omonene bw’Emeganda nigo ndendete riicho riane nabwo abanto b’enyomba ya Yuda; nindikore ribe ebarasi yane engiya y’esegi.
Ⅳ Rigena ri’ekoona narinyorekane korwa ase abanto abwo. Boigo korwa ase bare ekeroochi ki’eema na obota bw’esegi mbinyorekane, naende kera omogambi nanyorekane korwa ase bare.
Ⅴ Barabwo mbabe buna chituoni chi’esegi, batiringere ababisa babo inse buna eubi ere ase chinchera. Mbarwane, ekiagera inche Omonene nigo inde amo nabarabwo, basookie abariini be chibarasi.
Ⅵ “Ning’ee Abayuda chinguru,
ee, nintoorie abanto b’egesaku kia Yusufu.
Nimbairanie bamenye inka,
ekiagera nabaroreire amaabera;
barabwo mbarorekane buna inche konya timbaangeti,
ekiagera inche ninche Omonene, Nyasae obo,
ninyigwe ogosaba kwabo.
Ⅶ Abanto ba Efraimu mbabe buna chituoni chi’esegi,
bagoke ase chinkoro chiabo buna abanyure edivai.
Abana babo mbarore ayio, bagoke,
mbagokere Omonene ase chinkoro chiabo ime.
Ⅷ “Nimbasime, mbasangererie amo,
ekiagera nababooririe,
na barabwo mbamentekane babe abange buna barenge kare.
Ⅸ Nonya nabasiarerete gochia ase egati y’abanto b’ebisaku,
mbabe bakong’inyora ase chinse chiria chi’aare.
Barabwo mbabe moyo amo nabana babo, naende bairane inka.
Ⅹ Nimbairanie inka korwa ase ense ya Misiri,
nimbasangererie korwa ase ense y’Asuri;
mbabeeke ase ense ya Gileadi na ase Lebanoni,
mbaichore aroro goika baborwe aase bakomenya.
Ⅺ Ekero baraete ase egati y’enyancha y’emechando,
inche Omonene ning’ake emerindo yaye,
ne chindiba chionsi chi’orooche rwa Naeli nchikame;
na igo oboenenu bw’Abaasuri mbotiringerwe inse,
na enyimbo y’obogambi ya Misiri nesirigwe.
Ⅻ Inche nimbeke abanto baane chinguru ime yane inche Omonene,
barabwo mbabe bagotaara ase erieta riane.”
Omonene okwanire ayio.