Ⅸ
Abanto b’ebisaku basinyaine n’Abaisraeli bakonacherwa ekiina
Ⅰ Eri nering’ana rikong’u riakwanetwe n’Omonene igoro y’ense ya Hadaraki, riikere nonya nomochie o Damesiki. Amaiso ’abaanto b’ebisaku amo nay’Abaisraeli nigo arigereretie Omonene.
Ⅱ Boigo ring’ana erio riikere ense ya Hamati esinyaine na Damesiki, riikere na Turo na Sidoni, nonya abanto b’aroro bare abang’aini mono.
Ⅲ Turo bweagacheire chiburi chinkong’u, naende osangereirie chindwenyi chi’echifeta chinyinge buna orotu, ne chitaabu chinyinge buna eubi ere ase chinchera.
Ⅳ Korende rora, Omonene nayoure chinibo chiaye, na atugute okobua kwaye ase enyancha, na omochie oyio omonyene nosambwe nomorero.
Ⅴ Ekero Asikeloni orarore ayio, noiroke mono; Gasa boigo noro noiroke na goichana; naboigo n’Ekironi, ekiagera ogosemeria kwaye gwasirigwe. Omorwoti o Gasa nasirigwe, na abanto tibakomenya Asikeloni.
Ⅵ Asidodi nomenywe nabaanto batarochi inchera, na inche Omonene ninsirie kegima oboenenu bw’Abafilisti.
Ⅶ Nindusie amanyinga ’ebing’wanso korwa ase emenwa yabo, na okogechia koria korwa ase amaino abo; na barabwo nababe abatigari ba Nyasae oito, nababe buna abagaambi b’egesaku ki’Abayuda, abanto b’Ekironi nababe abatigari ba Nyasae oito, nababe buna abagaambi b’egesaku ki’Abayuda, abanto b’Ekironi nababe buna Abayebusi.
Ⅷ Erio inche Omonene nindende enyomba yane, erinde abarwani b’esegi tibaabaisa goeterao gose koiranerao; na abachandi b’abaanto baane tibaabaisa gochao, ekiagera bono inche ninyerigererie namaiso aane.
Omorwoti bw’omorembe ogochi‐gocha
Ⅸ Inwe abanto ba Sayoni goka mono!
Ee, inwe abanto ba Yerusalemu, aka eriogi ri’omochengo!
Rora, omorwoti oino nkobacheera are;
ere nomonyene oboronge na Omobui.
Nigo are omokanyeku oriinete etigere,
ee, oriinete emori y’etigere, akamori g’etigere.
Ⅹ Ninsirie chigari chi’esegi korwa ase abanto ba Efraimu,
ne chibarasi chi’esegi korwa Yerusalemu.
Ninsirie na amata ’esegi.
Omorwoti oyio naraarerie abanto b’ebisaku omorembe.
Obogambi bwaye nabobe korwa enyancha eyemo goika eyende,
na korwa ase Orooche rwa Eufarati goika ase chinsinyo chi’ense.
Nyasae okoiraneria abanto baye amaya abo
Ⅺ “Ase engencho y’amanyinga ’okobwatana okwo nakorire naye
ninsibore abasibwa bao,
mbarusie ase engoro etari namaache.
Ⅻ Inwe abasibwa more nogosemeria,
irana ase eburi yaino.
Ase rituko ria reero nigo nkobaraareria inwe ng’a nimbae amaya ara kabere.
ⅩⅢ Nakumbire Abayuda buna nkumbete obota bwane,
naagirie Abaefraimu buna ensara ng’agetie ase obota bwane.
Aye Sayoni, ninkore abana bao abamura babe buna amatimo,
barwanerie abamura b’Abagiriki;
ningokore obe buna omoro bw’omorwani esegi etuoni.”
ⅩⅣ Omonene naoroke igoro y’abanto baye,
ne chinsara chiaye chisoke buna okomesa gw’enkoba.
Omonene nabugie egetureeri,
achiche nekembugu‐mbugu gekorwa Irianyi.
ⅩⅤ Omonene bw’Emeganda nakengere abanto baye,
barabwo mbasirie ababisa babo, batiringe amagena e chinduruche chiabo.
Mbanywe batinde, baake amariogi,
babe buna abanto batindire edivai.
Mbaichorigwe buna ebitaabo bi’amanyinga ’ebing’wanso,
na babe buna chikoona chi’egesasiimero chiichire amanyinga.
ⅩⅥ Ase rituko riri’Omonene, Nyasae obo, nabatoorie,
ekiagera nigo bare abanto be riicho riaye.
Barabwo nigo bare buna amagena e rigori rinene abekire ase egutwa,
akomeka‐meka na komoreka ase ense yaye.
ⅩⅦ Ee, naki obuya bwaye na obosiani bwaye bore bw’ogokumia!
Endagera yaye nenorie abamura baye bagirigente,
na edivai yaye enyia nenorie abaiseke baye bagirigente.