Ⅷ
Omonene okoria eira y’okoiraneria Yerusalemu obuya bwaye
Ⅰ Ring’ana ri’Omonene bw’Emeganda rigacha ase ’nde, riganteebia:
Ⅱ “Aya naro Omonene bw’Emeganda agoteeba: Inche nigo inde ne risemi rinene mono ase engencho ya Sayoni; ee, risemi erio riagerire nabeire nendamwamu enene ase engencho yaye.
Ⅲ Aya naro Omonene agoteeba: Ning’irane gocha ase Sayoni, imenye ase egati‐gati ya Yerusalemu, na Yerusalemu norokwe Omochie bw’Obwegenwa, na egetunwa ki’Omonene bw’Emeganda nakerokwe Egetunwa Egechenu.
Ⅳ Aya naro Omonene bw’Emeganda agoteeba: Abagaaka na abang’ina nabanyorekane ase chinchera chia Yerusalemu naende, kera oyomo nabe nenyimbo yaye agwesiirera, ekiagera babeire abagotu mono.
Ⅴ Naende ase chinchera chi’omochie oyio abana abange, abamura na abaiseke, inababe bakogosoreria aroro.
Ⅵ “Aya naro Omonene bw’Emeganda agoteeba: Onye amang’ana ayio are ay’ogokumia ase abatigari b’egesaku eke, Inee, nabe ay’ogokumia ase ’nde boigo inche Omonene bw’Emeganda?
Ⅶ Aya naro Omonene bw’Emeganda agoteeba: Rora, nintoorie abanto baane, mbarente korwa ase chinse chia moocha na bosongo.
Ⅷ Ekero nabarentire, nabamenye ase egati‐gati ya Yerusalemu babe abanto baane, na inche imbe Nyasae obo ase obwegenwa na oboronge.
Ⅸ “Aya naro Omonene bw’Emeganda agoteeba: Mobe abaremu! Inwe bono mwabeire mokoigwa amang’ana ayio ababani barenge gokwana, ekero oboroso bw’enyomba y’Omonene bw’Emeganda bware kobekwa, ng’a Hekalu neagachwe naende.
Ⅹ Agwo ritang’ani ase amatuko ayio, monto onde bwensi tarenge konyora eng’eria ende ase emeremo arenge gokora, gose ng’iti ende yonsi yarenge gokora emeremo tiyarenge goakanerwa. Ase engencho y’obobisa onde tarenge na morembe kagosoka gose gakoirana, ekiagera nigo naseegetete kera omonto kwomana noyomwabo.
Ⅺ Korende bono tingokorera abatigari b’abaanto aba buna nakorerete ab’amatuko aria a kare. Nabo Omonene bw’Emeganda atebiire.
Ⅻ Bono mbasimeke chimbusuro chiabo bare nomorembe; emesabibu inayame amasabibu, ne riroba narirente okwama kwaye, boigo na igoro nachirente riime. Nimbae abanto aba abatigari ebinto bionsi bibe ebiabo.
ⅩⅢ Inwe Abayuda na Abaisraeli, buna koreng’ana abanto b’ebisaku barenge koragereria ase erieta riaino, bono ekero ndabatoorie, abanto mbabe bagosesenia ase erieta riaino, Timoiroka, korende mobe abaremu!
ⅩⅣ “Aya naro Omonene bw’Emeganda agoteeba: Buna koreng’ana naroberetie kobarentera amabe, ekero chisokoro chiaino chiakorete ebibe chikagera nkaba nendamwamu, gose tinaonchorete omooroberio oyio,
ⅩⅤ boigo ase amatuko aya narobeirie gokora amaya ase abanto ba Yerusalemu na ase Abayuda. Ase ayio timoiroka!
ⅩⅥ Amang’ana aya naro morakore: Kera omonto akwane ekeene noyomwabo; monache ebiina bia boronge na ebi’omorembe agwo ase ebiita biaino.
ⅩⅦ Timobaisa gokora emeroberio emebe ase chinkoro chiaino ase ogokorerana bobe inwe ase inwe, gose timobaisa gwancha gotiana ogotiana kw’oborimo, ekiagera amang’ana ayio onsi nigo inyagechete. Nabo Omonene atebiire.”
ⅩⅧ Naende ring’ana ri’Omonene bw’Emeganda rigacha ase ’nde, riganteebia:
ⅩⅨ “Aya naro Omonene bw’Emeganda agoteeba: Chingaki chi’okweng’ata ase omotienyi o kane, na oyo o gatano, na oyo o gatano na kabere, na oyo o ikomi, nachibe ase Abayuda chingaki chi’omogooko na omochengo, na Amatuko Amanene ay’okwegokia. Ase ayio mwanche ekeene na omorembe.
ⅩⅩ “Aya naro Omonene bw’Emeganda agoteeba: Engaki ngocha ere, ekero abanto abange bararue ase emechie emenge, bache aa.
ⅩⅪ Abanto b’omochie oyomo mbagende bateebie ab’omochie onde: Inchuo togende bwango, torigie ogwancherwa ase obosio Omonene, ee, inchwo torigie Omonene bw’Emeganda! Nainche nkogenda inde.
ⅩⅫ Abanto abange, na abanto b’ebisaku ebinge bire ne chinguru, mbachiche Yerusalemu korigia Omonene bw’Emeganda, na korigia ogwancherwa ase obosio bwaye.
ⅩⅩⅢ Aya naro Omonene bw’Emeganda agoteeba: Ase amatuko ayio abanto ikomi ba kera egesaku bagokwana emenwa ao ao mbache babwate omokoba bw’omwambaro bw’Omoyahudi, bateebe: Intwe ntorigetie kogenda amo nainwe, ekiagera twaigure ng’a Nyasae nigo are amo nainwe.”