3
Win ebin kobe mile pai erangwa main dungwa
1 Ena nil erari ibal kobe yal singaba ka dungwa pire wiina erungwa mere, wininbi kobe ka dungwa ebin kobe milinga pire wiina ere tenanga painamue. Wininbi kobe taw ka main pire gi ta dikire milangwa, ena yalin kobe nomanin suna si kiruul sire ka main kol duulin bilama dire, i ebin kobe mile pai wai ere milanwe. Mile pai wai ere ka ta di yalin kobe ta tekenanga, main paangwa iwe,
2 i gun yere deminin si God te milere, te kabin si mile kal dime di eringa kanangwa, yalin kobe nomanin suna kwi si kiruul sinamue.
3 I abal kobe ibal na kanama di pire, egin iru ta galekio. Gibilin mina siine bamin bilanga mo, kiriweri taare te dige maalanga mo, gal wai piranga mo, egin iru ta galekinanba,
4 ibal kobe i kanama dire, denin miriin te nomanin suna wai painangure, nomanin suna kabin si mile den miriin mone di dinan milo. Main iru milanga imo di painangwal painangure, te God main i eringa kanere, “Kirara wi yebe omua,” di i tenamue.
5 Te kamin kaya God ka main abal kobe mile, abalin kobe God pi tegi yongwa ibal kobe na kanama di pire kal main erungwa iwe, win kobe ka dungwa mere, abalin kobe pire wiina ere tomue.
6 Abal Sera para kal iru ere milungwa, winbi Ebarakam ka dungwa pire wiina ere tere, “Na kobaan i milinwa,” dire ka iru di yalini tomue. Tongwa i abal kobe main wai paangwa mere erere, te kalkan kuril pire milinga piserana, ena Sera abilin milungwa mere, i iru milanwe.
7 Ena ebin kobe iru di tega mere, i win kobe milinga ka iru di terala piro. I ebininbi bole si dawle mile nomanin painangwa pire ere to. Win ebin kobe para i wai wen mile mile painangal painana dire, God kal wai ere i ibal kobe tongwa, ena abal kobe niminin ta milekungwa, abalin kobi kenin wai ere to. I win kobe milinga ana di God tenanga kuunin painama dire, i iru ere to.
Denan miranan inin inin te ibeya ere milabinga
8 Ena na ka ta di wei si i terala piro. I ibal kobe nomanin u taran pire bole pena gale milo. God wan abilin milinga, denin miriin inin inin te ibeya ere milo. Miriin pire ibal tere, te i inin guunan kanan ware binama di pirekio.
9 Ibal taw kal ki ere i tenangwa, i maan iru ere te kole erekio. Mo ibal taw ka su gale i tenangwa, ena i maan ka su gale te kole erekio. Ta erekire, ena God kal wai ere ibalin kobe tenama dire, i iru sirin bile God to. I iru ere ibalin kobe tenanga main iwe, Kal wai ere i tongwa i ibal kobe inana dire, God mile, “Na munan kol duulan bilana wo,” dire gala di i tomue.
10 Ka diga mere, ka main minin ganin ka iru dire bilungwa paangwa,
“Yal ta gariba gul milungwa wai pire gun yerala dire, yalini ka digan ta dikima. Te yalini kakiibi ta di ibal ta tekima.
11 Kal ki erungwa main i mun kal waa tere kal main wai paangwa mere, duulin bile ere milema. Ibal kobe den miriin suna yaa ime sire guman u taran pi milabina dire, konagi nega di ere milima.
12 Iru ere milangwa main iwe. God mile kabin sire kal wai ere milungwa ibal kanere kenin wai ere tomua. Ibalin kobe kamin kaun kaun ana di yalini tongwa, ena tongwa yal kiraan gule piremua. Pirimba kal ki erungwa ibal nigi de kane gain giil pire ibalin kobi tenamua.”
Kal main wai paangwa erabinga ibal taw gain giil pire na tenangwa
13 Kal main wai paangwa erabina di kirara kawen piranga, ena ibena ure kal main ki ere i tename? Ibal wen ta ere i tekenamue.
14 Ta ere i tekinamba, i kabin sire kal wai ere milanga, ena ibal taw giil pire i tenangwa iwe. I wai pire miriin painamue. I kuril pirana dire, kaymin paale i tenangwa, ena ibalin kobe guman mina kuril di kanekio. Te nomanin suna ku ku ta maakio.
15 Iru ta erekinangi, Kirisito i ibal kobe kenin ere ke milama dire, nomanin tegi do. God mile, “Ere wai ere i teralwa,” dire aan kere yongwa i ibal kobe pi tegi yenga, ibal taw ure main pirabina dire, sirin bile i tenamia, ena i maan di kole ere tenana dire, morin morin pire kane milo. Ka di tenanba, denin miriin suna wiina erangure, ka di tere, te God gun ye tenga, main iray pire ka di to.
16 “Na kal eriga paikimua,” dire nomanin suna i iru ta pirekerala dire, kal main wai ere milo. I ibal kobe Kirisito bole pena gale mile pai wai eringa, ka di sutaw ere i tere gain ka si i tenangwa, ibalin kobi gay gulama dire, kal main wai ere milo.
17 Kal main wai eringa, ibal kobe giil pire i tenama dire, God owa dinangwa para wai wen painamba, kal ki eringa, ibal giil pire i tenangwa, kalin eranga i, wai ta paikinamue.
Kal digan ere taalime erebinga Kirisito pirin i gule ere na tongwa
18 Ka di tega main iwe. I ibal kobe kal digan ere taalime eringa, God pirin gule ere i terala dungure, Kirisito kamin kaun gin taran tawle gulemue. Yalini na ibal kobe God bole u taran pi milama dire, yalini gulungwa. Kal digan ere taalime erebinga ibal u wai nabina dire, yalini kabin sire wai wen mile kal dime dire ere na te milungwa yal gulungwa. Ibal kobe yalini gain kirara si gulimba, yalini iban sigare kule milemue.
19 Milere pi sia kanin pai milungwa gul pire, kal erungwa mere kere di maribe ere sia ibalin kobi tomue.
20 Sia kan diga iwe. Kamin kaya goma wen yal Noa milungwa kaun, God ka dungwa giran wiina ere tekire gulungwa, ibalin kobi iru mere sia milemue. Noa sipe bilkaw ere milungwa kaun, ibalin kobe God giran wiina ere tenama dire, yalini suul mili ongwa ongwa omba, ibal anan kole muru kole sutakobe tawle u sipe ala pire mama mile paingure, ibalin kobi nil si nekemue.
21 Nil iwe. Ka main nil bilungwa main mere nil i di bile dimue. Yesu Kirisito gulungwa God si kwi ye tongure alungwa main i na ibal kobe pire gi di yalini tere nil bilebinga, ena sigare kule u wai obinwe. Nil bilebinga iwe, gaynan debegi yongwa bigin iru ta si na tekungwi, na nomanin naabile na tenama dire, ana di God tobinwe.
22 Yesu Kirisito kaya ale ere kamin ai pirere, God aan wen kol milemue. Milere angel kobe te kamin ai singaba ibal te kamin ai yobilaan bilungwa ibal, yalini ibalin kobi malia kenin ere ke milemue.