11
ग्वाइ पिंब्मैं ङ्हिं
1 च लिउँइ च्हैंबै प्हरे धों तबै सै घ्रि परमेश्वरजी ङलाइ पिंसि बिइ, “रेद्, धै ङए मन्दिर नेरो ङए मिंर ख्रो पिंबै क्ल्ह्यो च्हैंन्, धै चर ङए मिं क्वेब्मैं कति मुँ च्योद्।
2 दिलेया मन्दिर बैरुबै ह्युमैं बिस्याँ आच्हैंन्, तलेबिस्याँ ङलाइ बिश्वास आलबै अरू ह्रेंमैंलाइ ङइ च ह्यु पिंइमुँ। प्लिच्यु से म्हैंन ङ्हिंल् समा (४२) चमैंइ पबित्र सहरलाइ प्लेथेंब्मुँ।
3 दिलेया ङए ग्वाइ पिंब्मैं ङ्हिंलाइ हजार घ्रिसे ङ्हिप्रसे ट्हुच्यु त्हिंइ समा ह्रेंग खिसि ङए ताँ पोंबै भों पिंब्मुँ।”
4 चु ग्वाइ पिंब्मैं प्रभुए उँइँर मुँबै जैतुनए धुँ ङ्हिं नेरो पानस ङ्हिं ग।
5 खाबज्यै चमैंलाइ न्होह्रों लबै सैं लइ बिस्याँ, च ग्वाइ पिंब्मैंए सुँउँइँले त्होंबै मिइ चमैं नास लवाब्मुँ। छले चमैंलाइ न्होह्रों लल् म्हैब्मैं नास तयाब्मुँ।
6 खेंमैंइ परमेश्वरए ताँ छेनाले बिप्रल् योंबै ल्हागिर मुउँइँले नाँ युल् आलबै शक्ति चमैंने मुँ, चमैंइ स्योंमैं या को लवाल् खाँमुँ, छलेन चमैंए सैंर मैंबै त्हेर पृथ्बीर तब आतब दुःख पल् खाँबै शक्ति या चमैंने मुँ।
7 छले चमैंइ परमेश्वरए ताँ बिप्रबै के लल् खाँबै लिउँइ च क्रोंउँइँले त्होंखबै खेदोइ च ग्वाइ पिंब्मैं ङ्हिंने ल्हडें लसि चमैंलाइ ट्होसि सैवाब्मुँ।
8 झाइले चमैंए सिनुमैं खेंमैंए प्रभुलाइ क्रूसर सैबै थेबै सहरए घ्याँर तब्मुँ। (च सहरलाइ अहानर सदोम सहर नेरो मिश्र ह्युल बिम्।)
9 सोंरो से आधा त्हिंइ समा चमैंए सिनुमैं ताँन् कुलर्बै म्हिमैंइ, ताँन् ह्युलर्बै म्हिमैंइ, ताँन् क्युइ पोंब्मैंइ नेरो ताँन् ह्रेंर्बै म्हिमैंइ ङ्ह्योरिगे बिसि च सिनुमैंलाइ छगोंर पाल् पिंरिब् आरे।
10 चु अगमबक्तामैं ङ्हिंइ पृथ्बीर्बै म्हिमैं ल्हें दुःख पिंल। छतसि चमैंए सिनु म्रोंसि पृथ्बीर्बै म्हिमैं बेल्ले सैं तोंब्मुँ, धै चमैंइ खें-खेंमैंए न्होंर चिनु पिंब-किंब लब्मुँ।
11 दिलेया सोंरो से आधा त्हिंइ लिउँइ परमेश्वरउँइँले छ्ह योंबै सो च सिनु ङ्हिंए न्होंर होंइ। धै चमैं ह्रोंसए प्हलेर्न राइ। छले राब् म्रोंसि म्हिमैं बेल्ले ङ्हिंयाँइ।
12 धै स्वर्गउँइँले खबै थेबै कैइ “छुइ कैंडो खो!” बिब च अगमबक्ता ङ्हिंइ थेइ। छ बिबै तोंदोंन् खेंमैंए शत्तुरमैंइ ङ्ह्योन-ङ्ह्योन् चमैं ङ्हिं न्हाँम्स्योने बालुन् स्वर्गउँइ ह्याइ।
13 धै च तोंदोंन् थेबै सयो ह्याइ, सहरर्बै च्युबाँरि तिबाँ नास तयाइ, धै हजार ङि म्हिमैं सैवाइ। अरू चैबै म्हिमैं बेल्ले ङ्हिंसि “स्वर्गर्बै परमेश्वर बेल्ले थेब मुँना!” बिसि खीए मिं क्वेइ।
14 ङ्हिंखेबै थेबै दुःख तल् खाँइ, दिलेया धबै सोंखेबै दुःख युनन् खसिन् मुँ।
७. धाँसे लिउँबै थुतुरु ह्रामा स्वर्गरि परमेश्वरलाइ मान लब
15 झाइले धाँसे लिउँबै स्वर्गदूतइ थुतुरु ह्रामा स्वर्गउँइँले थेबै कैमैंइ “ङ्योए याहवेह परमेश्वर नेरो खीजी कुल्मिंबै म्रुँ ख्रीष्टजी पृथ्बीर्बै ग्याल्स लबै हग योंइमुँ। खीजी खोंयोंन् बिलै ग्याल्स लरिब्मुँ,” बिरिल।
16 छबिमा परमेश्वरए उँइँर्बै ठिमैंर क्हुँरिबै ङ्हिस्युसे प्लि चिब्मैंइ परमेश्वरलाइ पद्खु तसि फ्योइ।
17 झाइले चमैंइ बिबर होंइ,
“ओ ताँन् भन्दा थेबै शक्ति मुँबै याहवेह परमेश्वर,
क्हि ओंसों ओंनोंन् मुँल, क्हि खोंयोंन् बिलै या तरिम्।
क्हिइ ह्रोंसए थेबै हगइ ग्याल्स लबर होंइमुँ।
छतसि ङि क्हिलाइ धन्यबाद पिंम्।
18 ह्रें-ह्रेंमैं त्होंदो राइमुँ,
दिलेया क्हि झन् बेल्ले ह्रिस खइमुँ,
तलेबिस्याँ क्हिए फिर बिश्वास आलल्ले सियाब्मैंए ल्हागिर ठिक निसाफ लबै त्हे चेंदोन् खइमुँ।
दिलेया क्हिए सेवा लबै अगमबक्तामैं, क्हिए पबित्र म्हिमैं
नेरो क्हिने ङ्हिंब्मैं, थेब, च्योंब ताँनलाइ,
इनाम पिंबै त्हे तइमुँ।
छलेन पृथ्बीलाइ न्होह्रों लब्मैं ताँनलाइ नास लबै त्हे तइमुँ।”
19 च लिउँइ स्वर्गर परमेश्वरए मन्दिरर्बै म्रा थोंयाइ, धै खीजी फैबै बाछाए ठिम झोंथेंबै म्हदुस मन्दिर न्होंर म्रोंइ। च्हमा काम्लि तिम्लि चारइ, मु ङ्हेइ, सयो खइ धै थे-थेबै तिस्यु युइ।