10
स्‍वर्गदूत नेरो च्‍युथिरि काउदए प्हैं
च लिउँइ अर्को बेल्‍ले भों मुँबै स्‍वर्गदूत घ्रि स्‍वर्गउँइँले युरिब् ङइ म्रोंइ। च स्‍वर्गदूतलाइ न्‍हाँम्‍स्योइ बेर्दिल, झाइले चए क्र कारग्युले ह्‍यागों मुँल। चए लि त्‍हिंयाँ धों तब् मुँल, धै चए प्‍हले लुँरिबै मिए प्हैं धों तब् मुँल। चए योर च्‍युथिरि प्ल्हसि थेंबै काउदए प्हैं मुँल। चइ ह्रोंसए क्‍योलो प्‍हले मा ङ्युँइए फिर, त्हर्ग्यों प्‍हले पृथ्‍बीए फिर थेंल। झाइले सिंह ङ्‌हेब् धोंले चइ थेबै कै तेइ। चइ कै तेबै लिउँइ काम्‍लि तिम्‍लि रादै मुउँइँले थेबै कै ङि त्होंइ। च कैमैं त्होंमा ङ चमैंइ बिबै ताँ प्‍ह्रिबर होंइ, दिलेया “चु ङ्‌हेबै कैमैंइ बिबै ताँमैंर छाप ल्हैदिद्, चमैंइ बिबै ताँ आप्‍ह्रिद्, चु ताँ खाबलाज्यै आबिद्!” बिसि स्‍वर्गउँइँले युबै कै ङइ थेइ।
च लिउँइ धबै प्हले घ्रि पृथ्‍बीर, प्हले घ्रि मा ङ्युँइर लसि रारिब ङइ म्रोंइ, च स्‍वर्गदूतइ ह्रोंसए यो स्‍वर्गउँइ क्वेइ। धै स्‍वर्ग नेरो चर्बै सैमैं, पृथ्‍बी नेरो चर्बै सैमैं, मा ङ्युँइ नेरो चर्बै सैमैं बनेब नेरो खोंयोंन् बिलै तरिबै परमेश्‍वरए मिंरि च स्‍वर्गदूतइ कसम चसि छ बिइ, “तारे आक्‍है! छतसि तारे अर्को स्‍वर्गदूतइ चए थुतुरु ह्राबै लिउँइ परमेश्‍वरजी खीए सेवा लबै अगमबक्‍तामैंने बिब् धोंले खाबज्यै आसेल्‍ले थेंबै खीए ताँमैं खीजी पूरा लब्‍मुँ।”
झाइले स्‍वर्गउँइँले युबै कैइ ङने धबै बिइ, “ह्‍याद्, धै प्हले घ्रि मा ङ्युँइ प्हले घ्रि पृथ्‍बीर लसि रारिबै स्‍वर्गदूतए योर मुँबै प्ल्हसि थेंबै काउदए प्हैं किंन्।”
छतसि ङ स्‍वर्गदूत ङाँर ह्‍यासि च च्‍युथिरि काउदए प्हैं ह्रिमा चइ ङने बिइ, “न, चु किंनु, धै चद्। चुइ क्‍हिए फो क्युँब्‍मुँ, दिलेया सुँर खुदु धोंले किगिब्‍मुँ।”
10 च्हमा ङइ स्‍वर्गदूतउँइँले च च्‍युथिरि काउदए प्हैं किंसि चवाइ। च ङए सुँर खुदु धोंले बेल्‍ले किगिइ, दिलेया फो न्‍होंर ह्‍याबै तोंदोंन् बेल्‍ले क्युँइ। 11 झाइले कै घ्रिइ ङने बिइ, “क्‍हिइ ल्हें म्‍हिमैं, ल्हें ह्रेंमैं, ल्हें क्युइ पोंब्‍मैं नेरो ल्हें म्रुँमैंए फिर परमेश्‍वरउँइँले तखम् बिबै ताँमैं धबै बिल् त्‍हुब्‍मुँ।”
10:7 10:5-7 प्रस २०:११; व्य ३२:४०; दान १२:७; आमो ३:७ 10:10 10:8-10 इज २:८—३:३