9
५. अर्को थुतुरु ह्रामा क्रों थोंयाब
1 च लिउँइ धबै अर्को स्वर्गदूतइ थुतुरु ह्रामा ङइ मुसारा घ्रि स्वर्गउँइँले पृथ्बीर खारयुब म्रोंइ। च मुसारालाइ परमेश्वारजी क्रोंर्बै साँजु पिंइ,
2 धै चइ क्रों थोंवाँइ। झाइले थेबै कोदाउँइँले मिखु खब् धोंले च क्रोंउँइँले थेबै मिखु खइ। धै च मिखुइ त्हिंयाँ नेरो मु हुवाइ धै मिछु खैयाइ।
3 च मिखुउँइँले पृथ्बीर तिरिमैं त्होंइ। झाइले चमैंलाइ बिच्छिमैंइ च्हिब् धोंले च्हिबै भों पिंइ।
4 झाइले परमेश्वरजी तिरिमैंलाइ छ बिइ, “पृथ्बीर्बै छि प्याँ पिमैं नेरो सिं धुँमैं, नास आलद्, दिलेया खाब् म्हिए ङ्होर ङए छाप आरे, चमैंलाइ च्हिद्।
5 चमैंलाइ सैबम् आसैद्, दिलेया म्हैंन ङ्हल् समा बेल्ले नल् लद्।” बिच्छिइ च्हिसि नब् धोंले चमैं नरिगे।
6 च त्हेर चमैंइ सिल् योंस्याँ तमल ङ्हाँब्मुँ, दिलेया चमैं सिल् योंरिब् आरे।
7 च तिरिमैं ल्हडें लबर तयार तबै घोडा धों तब् मुँल। चमैंए क्रर माराए मुकुट धों तबै सै मुँल, धै चमैंए लि म्हिल् धों तब मुँल।
8 चमैंए क्रप्हो च्हमिरिमैंए क्रप्हो धों तब् मुँल। चमैंए स सिंहए स धों तब् मुँल।
9 झाइले चमैंइ खेंमैंए तिंर पैए प्लाँ धों तबै सै खिल। चमैंए प्ह्याउँइँले खबै कै ल्हडेंर ह्याबै त्हेर न्हेबै ल्हें घोडामैं नेरो रथमैंए कै धों तब् मुँल।
10 चमैंए म्येर बिच्छिल् धों तबै खिल मुँल। चमैंए म्येर म्हैंन ङ्हल् समा म्हिमैंलाइ नल् लल् खाँबै भों मुँल।
11 च क्रोंर्बै दूत च तिरिमैंए म्रुँ मुँल। हिब्रू क्ह्युइरि च म्रुँए मिं “एबाड्डोन” ग, ग्रिक क्युइरि चए मिं “अपोल्लियोन” ग। च मिंए मतलब नास लब् ग।
12 छले ओंसोंबै दुःख ह्याइ। चु लिउँइँ धबै अर्को दुःख ङ्हिं चैइमुँ।
६. अर्को थुतुरु ह्रामा नास लवाबै दूतमैं
13 झाइले धबै अर्को स्वर्गदूतइ थुतुरु ह्रामा परमेश्वरए उँइँर्बै माराइ बेनबै ख्रो पिंबै क्ल्ह्योए कुना प्लिर मुँबै रुँउँइँले खबै कै घ्रि ङइ थेइ।
14 च कैइ च थुतुरु ह्राबै स्वर्गदूतने “यूफ्रेटिस बिबै थेबै स्योंर च्युँइँथेंबै दूत प्लि पिवाद्,” बिइ।
15 धै म्हिमैं सोंबाँर तिबाँलाइ सैबर च स्वर्गदूत प्लि पिवाइ। परमेश्वरजी चमैंलाइ चु बर्ष, चु म्हैंन, चु त्हिंइ नेरो चु त्हेए ल्हागिर्न ओंसों ओंनोंन् तयार लथेंल।
16 च घोडार क्रेबै फौजमैं ङ्हिस्यु करोड (२०,००,००,०००) मुँल।
17 झाइले ङइ दर्शनर घोडामैं नेरो घोडा क्रेब्मैं म्रोंइ। घोडाए फिर क्रेब्मैंए तिंर्बै पैए प्लाँ मि लुँब् धोंबै ओल्ग्या, निलम् बिबै युँमा धों तबै मु रङबै नेरो उर्ग्या मुँल। च घोडामैंए क्र सिंहमैंल् धों ब्योंब मुँल। धै च घोडामैंए सुँउँइँले मि, मिखु नेरो आछ्याँबै थाँ नाँबै सै त्होंरिल।
18 च दुःख सोंउँइँले, अथवा चमैंए सुँउँइँले त्होंबै मि, मिखु नेरो आछ्याँबै थाँ नाँबै सैउँइँले सोंबाँर्बै तिबाँ म्हिमैं सैवाइ।
19 च घोडामैंए भों चमैंए सुँ नेरो म्येर मुँल, तलेबिस्याँ चमैंए म्ये प्हुरि धों तब् मुँल, धै म्येल क्र मुँल। च म्येउँइँले घोडामैंइ म्हिमैंलाइ नल् लमल।
20 छाबै दुःखउँइँले सोसेया चैबै म्हिमैंइ खेंमैंइ लबै पापउँइँले सैं आए। झन चमैंइ मोंए पूजा लब, धै मारा, चाँदि, पित्तल, युँमा, सिं, छाबै सैउँइँले बनेबै म्रोंल् आखाँब, थेल् आखाँब, प्रल् आखाँबै कुमैं पूजा लब आपि।
21 चमैंइ म्हि सैब, म्हुत मोंब, फा-फुइ टुना मुना लब, ब्यभिचार लब, ह्योब, छाबै आछ्याँबै केमैंउँइँले या सैं आए।