8
७. धाँसे लिउँबै छाप फोर्दिमा थुतुरु ह्राबै स्वर्गदूत ङि म्रोंब
1 धबै क्यु च्हजजी ङिखेबै छाप फोर्दिमा स्वर्गर आधा घण्टा समा तोए कै या आथे।
2 च लिउँइ परमेश्वरए उँइँर रारिबै स्वर्गदूत ङि ङइ म्रोंइ। च स्वर्गदूतमैंए योरि खीजी थुतुरु ङि पिंइ।
3 झाइले माराए धुपारा छेबै अर्को स्वर्गदूत घ्रि परमेश्वरए मिंर ख्रो पिंबै क्ल्ह्योर खसि राइ। चइ परमेश्वरए राजगद्दिए उँइँर्बै माराइ बेनबै ख्रो पिंबै क्ल्ह्योए फिर परमेश्वरए ताँन् म्हिमैंए प्राथनाने बालु चडेबै ल्हागिर चलाइ ल्हें धुप पिंल।
4 धुपए मिखु नेरो परमेश्वरए म्हिमैंइ लबै प्राथनामैं बालुन् स्वर्गदूतए योउँइँले परमेश्वरए उँइँर ह्याइ।
5 झाइले च स्वर्गदूतइ ख्रो पिंबै क्ल्ह्योर्बै मि भुर धूपारार तिगोंले झोंसि पृथ्बीर भ्योंवाइ। झाइले मु ङ्हेसि, काम्लि तिम्लि रासि पृथ्बीर सयो ह्याइ।
थुतुरु ङि
१. ओंसोंबै थुतुरु ह्रामा तिस्यु नेरो मि युब
6 च लिउँइ च थुतुरु छेबै स्वर्गदूत ङिइ थुतुरु ह्राबर होंइ।
7 ओंसोंबै स्वर्गदूतइ थुतुरु ह्रामा को कोंबै तिस्यु नेरो मि पृथ्बीर युइ। पृथ्बीए भाग सोंबाँर्बै तिबाँ, सिं धुँए भाग सोंबाँर्बै तिबाँ, झाइले पृथ्बीर मुँबै ताँन् सिं धुँमैं नेरो प्याँ पिंमैं ताँन् ख्रोंवाइ।
२. अर्को स्वर्गदूतइ थुतुरु ह्रामा कों घ्रि मा ङ्युँइर भ्योंब
8 झाइले अर्को स्वर्गदूतइ ह्रोंसने मुँबै थुतुरु ह्रामा मि लुँरिबै थेबै कों घ्रि धों तबै सै परमेश्वरजी मा ङ्युँइर भ्योंवाइ। झाइले मा ङ्युँइर्बै क्यु सोंबाँर्बै तिबाँ को तयाइ,
9 मा ङ्युँइर्बै सो प्ह्याबै सैमैं या सोंबाँर तिबाँ सियाइ, झाइले मा ङ्युँइर्बै क्यु झाजमैंए या सोंबाँर तिबाँ नास तयाइ।
३. अर्को थुतुरु ह्रामा मुसारा घ्रि तेयुइ
10 झाइले अर्को स्वर्गदूतइ थुतुरु ह्रामा मिए राब धोंले लुँरिबै थेबै मुसारा घ्रि मुउँइँले तेयुसि स्योंमैं सोंबाँर तिबाँ नेरो क्युए मूलमैंए फिर तेयुइ।
11 च मुसाराए मिं “बेल्ले काँब ग”। छतसि क्यु सोंबाँर्बै तिबाँ बेल्ले काँब तबइले ल्हें म्हिमैं च क्यु थुँसि सियाइ।
४. अर्को थुतुरु ह्रामा मिछु तयाब
12 झाइले अर्को स्वर्गदूतइ थुतुरु ह्रामा त्हिंयाँ, लयाँ नेरो मुसारामैं सोंबाँर तिबाँलाइ ल्हिनेइ धै चमैंए ह्वे सोंबाँर तिबाँ म्हयाइ। छतसि त्हिंयाँ नेरो म्हुँइँसल सोंबाँर्बै तिबाँ मिछु तयाइ।
13 च लिउँइ ङइ धबै ङ्ह्योमा “तारेबै स्वर्गदूत सोंइ ह्राबै थुतुरुए कै थेबै लिउँइ पृथ्बीर्बै म्हिमैंए फिर बेल्ले थेबै दुःख तब्मुँ,” बिसि प्हुररिबै क्व्रे घ्रिइ बिरिब ङइ थेइ।