32
1 “Iwe igulu, owulisisye ebinjaba okutumula,
na iwe ekyalo, owulire ebibono byange.
2 Oleke ebinjegesya bibbe ooti ikendi atoonya,
nʼebibono byange bigwe ooti lume,
bigwe ooti ikendi afuwirira okwisubi eritolito,
bibbe ooti ikendi afunyaagirirya oku bimera ebitobito.
3 Nawuujanga eriina lya Musengwa,
nakoberanga abandi ngʼoKibbumba waiswe obwali wʼamaani.
4 OMusengwa niiye eibbaale omu neebisa, era ebikolebye bituukirirye,
amanzirage gonagona matuuce.
Iye Kibbumba omwesigwa atakola ekitali kituuce,
era akola ebituuce ebyʼobwenkanya.”
5 “Neye inywe abantube mubebenyekere,
era timusaaniire okubba baanabe.
Musuukire mulembe ogwacaamire era ogwʼabantu abagootaanire.
6 Eyo niiyo engeri egimusasulamu oMusengwa,
inywe abasirusiru era ababula amalabuki?
Tiniiye oitewaanywe, eyababbumbire,
tiniiye eyabakolere era nʼabasuuca igwanga?
7 “Mwebukirye ebiseera ebyʼeira,
museege oku myanka egyʼemirembe egyʼeira.
Mubuulye abaitewaanywe babakobera ebyabbairewo,
abazeiza baanywe babasonzolera ebyabbairewo.
8 ONambulaku aMwagaagana oweyagabiire amawanga emiwuluko gyabwe,
oweyaabulyagiiremu abantu.
Yabateekeirewo ensalo gyabwe
ngʼasinzirira oku bungi bwʼabaana ba Isirairi.
9 Iye niiye oMusengwa wʼabantube,
Eibyaire lya Yaakobbo niibo abantube abeyeerondeire.
10 “Yabayajiirye mwidungu
erikalu kala ompunga omwafuwa nabuli kiseera.
Nʼabakuuma nʼabalabirira,
ngʼobwalabirira emunge yʼeriisolyo.
11 Okokomi atyo waayalirira ekisaasirirokye,
ni yeebuugira awali abaanabe,
nʼabatwalira oku biyayabye,
era nʼabadederera obutagwa.
12 OMusengwa yenkani niiye eyabeekubbembeire.
Mpaawo kibbumba eyababbeereireku.”
13 “Yabawaire okubba omu kyalo ekyʼensozi,
ni balya ebyokulya ebikula omu musiri gyakyo.
Yabagabiriire omujenene okuzwa omu njatikira gyʼamabbaale,
nʼamafuta gʼemizaituuni egikula nʼokwitakali lyʼobubbaalebbaale.
14 Basunire amata nʼamakita okuzwa omu ente gyabwe,
ni basuna nʼabaana bʼentaama nʼabʼembuli abageizi,
nʼentaama ensaiza egyʼe Bbasani egikira obusa,
nʼengaano egikira obusa.
Ni beenyweranga nʼenviinyo okuzwa omu mubisi gwʼemizabbibbu.”
15 “ABaisirairi ni bagaigawala, neye ni bajeemera oKibbumba;
baliire nakusani era ni bageizageizana,
Bazwire oku Kibbumba waabwe eyababbumbire,
ni bagaana oyo eIbbaale omu beebisa ni basuna obununuli.
16 Bamukwatisirye eibuba olwʼokusinza abakibbumba bʼabanamawanga;
era ni bamusunguwalya nʼebifaananyi byabwe ebyʼokusinza obyʼomuliko.
17 Basadaakiire emizimu, egyo egitali Kibbumba;
abakibbumba abandi abebabbaire tibamanyangaku,
abakibbumba abandi abebabbaire bankumanyanga ebibakwataku
abakibbumba abandi abazeiza baabwe abebatatyanga.
18 Bazwire oku Kibbumba eYababbumbire;
beerabiire oyo iye eIbbaale eryʼaMaani omu beebisa, era iye onanzwa wʼobwomi bwanywe.”
19 “OMusengwa oweyaboine ekyo nʼabalekesula,
olwʼokubba ibo abataanebe nʼabaalabe bamusunguwalisirye.
20 Nʼakoba ati, ‘Njaba okubakubbira omugongo,
kaisi mbone enkomerero yaabwe;
olwʼokubba omulembe gwabwe gwʼabantu abʼeitalo,
baana abatali beesigwa.
21 Bankwatisirye eibuba nga beewa ebitali Nze oKibbumba,
ni bansugwalya nʼebifaananyi byabwe ebyʼokusinza ebinambulamu.
Zena nalibakwatisya engongi, nga nnumirwa abatali bantu bange.
Nalibasunguwalya nga ndaga okutaka eigwanga lyʼabanambula amalabuki.
22 Obulwa bwange bukuma omusyo
okwocerya nakimo nʼekiri ansi eeyo e magombe.
Bwalimalawo ekyalo nʼebimera byaku,
era ni bukwatisya omusyo okwoca emisingi gyʼensozi.’ ”
23 “ ‘Nalibateekaku ebigosi ebitaca.
Nalibamaliraku obulaso bwange.
24 Nalibasindikamu enzala eyalibondya,
okawumpuli ajigirica era endwaire eyʼakabbikabbi;
Nalibasindikamu ebisolo ebikambwe,
osaagwa wʼempiri enfulugundu egyekuusira okwitakali.
25 Obwiti omu nguudo bwalibaleka nga babula baana;
omu bisito byabwe mwalibbaamu ntiisya njereere.
Abaisuka nʼabaala balijigirika,
nʼabaana abonka nʼabakaire abʼenvi balijigirika.
26 Nakobere nti, nandibbaire mbajigirica,
nandi babeebukiriryaku nakimo,
27 neye ni neekengera okwepanka kwʼabalabe baabwe,
ababacaawa okuteebbeya
nga bakoba bati, niibo abeewanguliire olwʼamaani gaabwe;
oMusengwa tiniiye akolere ebyo byonabyona.’ ”
28 “ABaisirairi igwanga eridamba amalabuki,
era libulamu okutegeera.
29 Singa bandibbaire balabuki, banditegeire kinu
era bankumanyicirye enkomerero yaabwe oweyankubbaire.
30 Omuntu omoiza yadibbingire atya 1,000,
ooba abantu ababiri ni bairukisya 10,000,
nga tiMusengwa waabwe iye eibbaale omu beebisa, tiniiye abawaireyo,
era nga tiniiye eyabbaire abalekeswire?
31 Ekyo kityo olwʼokubba iye eibbaale abalabe baiswe omu beebisa munafu kwoyo eIbbaale iswe omu twebisa,
nʼabalabe baiswe abananyere ekyo bakiikirirya.
32 Abalabe baiswe boonoonoki ooti bantu bʼe Sodoma nʼe Gomola.
Bali ooti misiri gyʼemizabbibbu,
egineneka emizabbibbu egyʼobutwa,
nga nʼebineneka byagyo birulu.
33 Enviinyo gyabwe giri ooti saagwa wa mpiri,
ndulu ooti saagwa wa kongomasaka.”
34 OMusengwa yeebuulya ati, “Ebyo tinabibisire omu biseego byange,
era timbikuumiire omwo?
35 Okunyaaŋa kwange era nalibabonereza;
ekiseera ekitali kyʼeyala baligwa,
ekiseera kyabwe ekyakabbikabbi kiri kumpi,
era okujigirika kwabwe kubavulumukiraku.”
36 “OMusengwa yaliramula abantube
era nʼakwatira abaweereryabe ekisa
oweyalibona ngʼamaani gabawoiremu,
era nga mpaawo akaali omwomi, omugalama ooba atali mugalama.
37 Awo oMusengwa yalibuulya abantube abo ati, ‘Aale atyanu abakibbumba baabwe bali yaina,
ibo eibbaale omu bairukira okubakuuma?
38 Ibo abakibbumba abalyanga amasavu agʼesadaaka gyabwe,
era ni banywa enviinyo ngʼekyokunywa ekibawaayo.
Aale atyanu baize bababbeere!
Aale atyanu baize babakuume!’ ”
39 “ ‘Aale atyanu mukimanye muti, Nze ninze zenkani oKibbumba!
Mpaawo kibbumba gondi okutoolaku Nze.
Ninze njita, era Ninze ngaba obwomi.
Ntemula era ni ndamya,
mpaawo ayezya okwakanisya ekimba nsalirewo.
40 Nsiirya engalo yange eeri eigulu nga ndayira nti,
mazima ngʼowendi mwomi emirembe gyonagyona,
41 owenayagalyanga empiima yange emirikiinya,
ni ngikwata nga nnamula,
nanyaaŋanga abalabe bange,
ni neesasuza abo abancaawa.
42 Obulaso bwange bwalitoonya omusaaye gwabwe,
nʼempiima yange yaliita bonabona abanjakanisya.
Omusaaye gwʼabo abebasalire nʼabawambe;
nʼabakulu bʼabeekubbemberi bʼabalabe.’ ”
43 “Inywe amawanga mujaagaanire aamo nʼabantu ba Musengwa,
olwʼokubba yalinyaaŋa omusaaye gwʼabaweereryabe;
yalikola okunyaaŋa oku balabebe,
yaliwaayo omugaito oku lwʼekyalokye nʼabantu.”
44 Awo oMusa nʼaiza nʼoYoswa omutaane wa Nuuni, ni batumula ebibono byʼolwembo olwo byonabyona, ngʼabantu bawulira.
45 OMusa oweyamalire okutumula ebibono ebyo byonabyona eeri aBaisirairi bonabona,
46 nʼabakoba ati, “Muteekeyo emyoyo oku bibono byonabyona ebimbakobeire olwatyanu. Mubisomesyenge abaana baanywe, bafengeyo okutuukiriryanga byonabyona amateeka ganu ebigalagira,
47 olwʼokubba tibibono byʼokumonca, neye byʼobwomi bwanywe obunyere, era byalibawangaalya omu kyalo ekimwaba okwetwalira nga mwambukire oMwiga oYoludaani.”
OMusengwa akoba oMusa ayabe e giyafeera
48 Awo oMusengwa nʼakoba oMusa oku lunaku olunanyere olwo ati,
49 “Oniine oku Lusozi oNebbo oluli omu nsozisozi e giri Abbaliimu omu kyalo kyʼe Mowaabbu, ekiringiriire ekibuga oYeriko, olengere oKanani ekyalo ekindi kuwa aBaisirairi okubba omuwuluko gwabwe.
50 Eeyo oku lusozi oluwaniina giwafeera nʼosenja abazeizabo, ngʼomugandawo Alooni oweyafeereire oku Lusozi oKoli, nʼasenja abazeizabe.
51 Ekyo kityo olwʼokubba inywe mwembi mwasoberye ni mmunsunguwalirya omumaiso gʼaBaisirairi oku nsulo gyʼe Meribba Kadesi, omwidungu lyʼe Ziini, era olwʼokubba timwampaire nze omutukulye ekitiisya ngʼowekinsaanira.
52 Nʼolwekyo, oyaba kulengera-bulengeri ekyalo ekyo; tiwaingire omu kyalo ekyo ekindi okuwa aBaisirairi.”