33
OMusa asabira aBaisirairi enkabi
1 Ginu niigyo enkabi, oMusa omusaiza wa Kibbumba, egiyasabiire aBaisirairi ngʼali kumpi okufa.
2 Yakobere ati,
“OMusengwa yaizire e gituli ngʼazwera oku Lusozi oSinaayi,
nʼazwayo ooti isana nʼatubonekera ngʼazwera omu Seiri;
nʼayaka ooti isana ngʼasinzirira oku Lusozi oPalani.
Yaizire nʼemitwalo gyʼabatuukirirye,
oku ngaloye endiiro kwabbaireku omusyo ni gutwakira.
3 Mazima otaka abantubo;
abatukulye bonabona bali mu bwezyebwo.
Era bonabona batyama kumpi nʼebigerebyo
era ni basunanga okubalungamya kuzwa gyoli.
4 Nze oMusa nabawaire aMateeka
ngʼekyʼebbeeyi ekiririra nakimo, ekyʼokubbanga nakyo nga inywe eigwanga lya Yaakobbo.
5 OMusengwa yasuukire kabaka wʼaBaisirairi,
abʼebika byabwe nʼabeekubbemberi baabwe
owebakumbaanire.”
6 OMusa nʼatumula oku bʼekika kya Lubbeeni ati,
“Abʼekika kya Lubbeeni babbe boomi era tibaafa,
waire abantu baabwe okubba batono.”
7 Nʼatumula oku bʼekika kya Yuda ati,
“Oo Musengwa owulire okukunga kwʼabʼekika kya Yuda,
obairye ekintu ekimo nʼabaganda baabwe.
Omu bwezyebwo obalwanirire,
obabbeere okubalamya abalabe baabwe.”
8 Oku bʼekika kya Leevi nʼakoba ati,
“OTumimu owuwo nʼoWulimu owuwo bintu
byʼabantubo aBaleevi abakoda.
Wabagezesyeire e Maasa;
Wawakaniire nabo oku nsulo gyʼe Meribba.
9 Bagondeire ekibonokyo
era ni bakuuma endagaanoyo.
Bakugondeire
okukiraku ababyaire baabwe.
Beebitirye oku baganda baabwe,
era tibafiireyo oku baana baabwe abananyere.
10 Basomesyanga oYaakobbo ebiragirobyo,
era basomesya oIsirairi amateekago.
Baduunyisiryanga obubbaani omumaisogo
era baawangayo oku kyotokyo esadaaka egibooca yonayona.
11 Oo Musengwa, owenge ebintu byabwe enkabi,
era osiimenge emirimo gyʼengalo gyabwe.
Omalirengewo nakimo abalabe baabwe,
abo ababacaawa tibairangayo okusetuka.”
12 Oku bʼekika kya Bbenyamini nʼakoba ati,
“Oleke abatake ba Musengwa babbenge mwidembe nabo,
olwʼokubba niiye abakuuma okumalaku olunaku,
era niiye oMusengwa eyaabbanga mwibo.”
13 Oku bʼeibyaire lya Yusufu nʼakoba ati,
“Ekyalo kyabwe, oMusengwa akiwe enkabi,
egyʼamaizi agazwa angulu omwigulu,
nʼago agazwa ansi omwitakali.
14 Ekyalo kyabwe kibbengemu ebineneka ebyenga nʼeisana,
era ebisa okubikungulanga omu biseera ebituuce ebyʼamakungula.
15 Kibbenge nʼebibala ebikira obusa okuzwa omu nsozi egyʼeira,
era ebingi okuzwa omu nsozisozi egyʼemirembe gyonagyona.
16 Ekyalo kyabwe kiizulenge ebimera byonabyona ebikira obusa era ebingi
era kiizulenge enkabi gyʼoyo oMusengwa eyabbaire omu kisaka ekiya.
Oleke enkabi egyo gyonagyona gibbenge okwibyaire lya Yusufu,
olwʼokubba oYusufu niiye eyabbaire omwekubbemberi omu bagandabe.
17 OYusufu ali nʼamaani ooti ga nte onumi omubere;
era ali nʼebirwana ebyʼamaani ooti maziga ga mbogo.
Yakolesyanga ebirwana ebyo okusindikiriryanga amawanga,
era ago agali omu kyalo kyonakyona.
Amawanga ago nago niigo emitwalo nʼemitwalo gyʼeibyaire lyʼEfulaimu;
era niigo emitwalo gyʼeibyaire lya Manase.”
18 Oku bʼekika kya Zebbulooni nʼekya Isakaali nʼakoba ati,
“Inywe abʼekika kya Zebbulooni, musangaale nga muli omu ŋŋendo gyanywe,
na inywe abʼekika kya Isakaali, musangaalenge nga muli e ika omu weema gaanywe.
19 Balyeta abʼamawanga agandi oku lusozi lwabwe,
ni baweerangayo eeyo esadaaka egituukana.
Basuna ebyobusuni byabwe bingi okuzwa omu nyanza gyabwe,
ebyobusuni ebibise omu musenye gwʼoku nyanza egyo.”
20 Oku bʼekika kya Gaadi nʼakoba ati,
“Wʼenkabi iye oyo agalamya ekyalo kyʼabʼekika kya Gaadi.
Abʼekika kya Gaadi babba omwo okuteega abalabe baabwe ooti mpologoma,
oyo ateega omuyiigogwe nʼagukusulaku omukono ooba omutwe.
21 Batwaire ekitundu ekikirira nakimo obusa,
omugabo gwʼomwekubbemberi bagubisiire niibo.
Abeekubbemberi bʼabantu owebakumbaanire,
abʼekika abo ni batuukirirya ebiragiro bya Musengwa,
nʼamateeka agakwata okwIsirairi.”
22 Oku bʼekika kya Daani nʼakoba ati,
“Abʼekika kya Daani bʼamaani ooti mwana wa mpologoma,
bazwa omu Bbasani ni balumba abalabe baabwe.”
23 Oku bʼekika kya Nafutaali nʼakoba ati,
“Inywe abʼekika kya Nafutaali, oMusengwa abalagire okutakakwe kunene,
era abawaire enkabi nyingi;
balisuna omuwuluko oguli e maserengeta wʼenyanza oGaliraaya.”
24 Oku bʼekika kyʼAseri nʼakoba ati,
“Abʼekika kyʼAseri niibo abakirire okusuna enkabi;
oleke babbe bakoda eeri abʼebika ebindi,
oleke emizaituuni gyabwe gikamukenge ino amafuta.
25 Amageeti gʼebibuga byabwe bagasibanga nʼeminyololo gyʼebyoma nʼegya bbulonzi,
nʼamaani gaabwe genkanankananga nʼobuwanguli bwabwe.”
26 “Inywe aBaisirairi, mpaawo kibbumba gondi ali ngʼoKibbumba owaanywe,
atambulira oku bireri nʼabita omwibbanga naiza okubabbeera,
era atambulira oku bireri ngʼali omu kitiisyakye.
27 OKibbumba atawaawo niiye ekiirukiro kyanywe,
era ngalogye egyʼolubeereera niigyo egimpanirira.
Yabbinganga abalabe baanywe nga wemutaabaala,
nʼakoba ati, ‘Mubajigirice.’
28 Kale inywe aBaisirairi mwabbanga mwidembe,
inywe abaizukulu ba Yaakobbo mwabbanga kusani
omu kyalo omuli engaano nʼenviinyo empyo,
olume oluzwa omwigulu ni lutoonya.
29 Oo iwe Isirairi, ngʼooli wʼenkabi!
Naani ali nga iwe,
eigwanga oMusengwa eriyanunwire?
OMusengwa niiye engabo yaanywe era niiye ababbeera
era empiima ebaleetera okuwangula.
Abalabe baanywe baliiza ni babeegudyera,
neye inywe mwalyemyaga emibiri gyabwe.”