EKITABO KYA
YONA
Enyanjula
Ekitabo kinu ekya Yona kikwata ku kigendererwa kya naabbi Yona, okwaba omu kibuga kyʼe Nineeve okutwalayo obukwenda bwa Kibbumba. Okutafaanana nʼebitabo ebyobunaabbi ebindi ebitumula ku bukwenda bwa Kibbumba, ekitabo kinu ikyo kitumula ino ku naabbi nago nʼebikolebye.
OKibbumba yatumire oYona okwaba okulaabba ngʼalabula abantu bʼekibuga oNineeve, neye oYona tiyabbaire mugondi era ni yeesimbira wandi ngʼakubbiire oNineeve omugongo, (1:1-3). Yaabire nʼaniina emeeri eyabbaire eyaba omu kibuga e Talusiisi. Emeeri oweyabbaire ngʼeseeyeeya eyaba e Talusiisi, oKibbumba nʼasindika ogumpunga ogwʼamaani. Abavugi bʼemeeri eyo ni batya ino era ni bamuma oYona omu gunyanza okwikaikania obusungu bwa Kibbumba.
OKibbumba yasindikire ogunyanyi ogunene ni gumira oYona. OYona nʼasaba oKibbumba ogunyanyi ni gumwandula oku bukalu era nʼabbaawo mwomi. Omu kumaliirirya oYona nʼaikirirya okwaba e Nineeve okulaabba ngʼakirabula ngʼoKibbumba oweyamukobere, era abantu bʼomu kibuga ekyo ni beenenya (3:5).
Ekitabo kinu ekya Yona kikalaatira oku Kibbumba ngʼobwali owʼekisa, newankubbaire ngʼoYona tiyasiimire oKibbumba okubba wʼekisa (4:2).
Engeri egibyecaanamu:
1. Ensuula esooka, esonzola engeri oYona egiyairukire oku Kibbumba era n’amalirirya ngʼali mu kida kyʼogunyanyi.
2. Ensuula eyokubiri, erimu esaala ya Yona egiyasabire oKibbumba, oweyabbaire ngʼali omu kida kyʼogunyanyi.
3. Omu nsuula eyokusatu, oYona alaabba eeri ekibuga kyʼe Nineeve era abantu b’ekibuga ekyo ni beenenya. OKibbumba nʼasalawo okubaleka babbeewo.
4. Okumaliirirya, omu nsuula eyokuna, oYona asuna ekisungu olwa Kibbumba okukwatira abantu b’e Nineeve ekisa, era oKibbumba akoba oYona ati, iye oKibbumba ataka abantu bonabona.
1
OYona atenguwa oMusengwa
1 Wabbairewo eyo omusaiza ogubayetanga bati Yona omutaane wʼAmitaayi. Lumo, oMusengwa nʼatumula nʼoYona oyo nʼamukoba ati,
2 “Osetukiremu oyabe e Nineeve, omu kibuga ekyo ekinene, olaabbe ngʼolabula abantu baamu olwʼokubba obubbibubbi bwabwe bubitiriire omumaiso gange.”
3 Neye oYona omu kifo kyʼokwaba e Nineeve, nʼakwata nzira gendi, nʼataka kwaba Talusiisi olwo ayezye okwiruka oMusengwa. Awo oYona nʼaserengeta oku mwalo e Yoopa e giyayajiirye emeeri eyaba e Talusiisi, nʼasasula empiiya egyʼentambula, nʼaingira omu meeri eyo ni baaba, olwo ayezye okwiruka oMusengwa.
OMusengwa abonereza oYona
4 Awo oMusengwa nʼasindika ogumpunga ogwʼamaani oku nyanza era enyanza ni yeefukuula, amaizi ni gakubba emeeri nebbuuca okuvunika.
5 Awo abavugi bʼemeeri ni batya ino, era nabuli moiza kwibo nʼatandiika okukungirira okibbumbawe. Ni batandiika okumuma emigugu omu nyanza olwʼokukendeeryaku obuzito obwabbaire oku meeri. Omu kaseera ako, oYona iye kaisi yabbaire yeingiriire mu kasenge kʼemeeri akʼansi nga yeefuulutira ndoolo.
6 Omukulu wʼabavugi bʼemeeri eyo nʼayaba e gyali nʼamukoba ati, “Obbootya okugona-bugoni? Osetuke okungirire okibbumbawo, amo nʼatukwatira ekisa nʼatulamya.”
7 Awo abavugi bʼemeeri ni beteesamu bati, “Kaade tukubbe akalulu tuzuule naani agira ni tugwa oku kigosi kinu.” Owebakubbire akalulu kalagire kati, ekigosi kizwa ku Yona.
8 Awo ni batandiika okusonseka oYona ebibuulyo bati, “Aale otukobere, naani agirire ni tugwa oku kigosi kinu? Okola mulimoki? Ozwera yaina? Era oli wʼeigwangaki?”
9 OYona nʼabairamu ati, “Ndi Mwebbulaniya. Nsinza Musengwa oyo oKibbumba owʼeigulu, eyabbumbire enyanza nʼobukalu.”
10 Abavugi bʼemeeri owebawuliire ekyo, emyoyo ni gibakutuka era ni bamubuulya bati, “Okolere niki ekyo?” Bamubwirye batyo olwʼokubba oYona yabbaire amalire okubakobera ngʼobwali kwiruka ku Musengwa.
11 Atyanu olwʼokubba ogumpunga gwabbaire gweyongera-bweyongeri okufuukuula enyanza, abavugi bʼemeeri ni babuulya oYona bati, “Tukukole niki kaisi enyanza eikaikane twezye okulama?”
12 OYona nʼabairamu ati, “Munginge mummume omu nyanza, era yaikaikana. Nkimmaite nti nsobi yange ogumpunga ogunene oguti okubaizaku.”
OYona bamumuma omu nyanza
13 Neye abavugi bʼemeeri ibo tete nandi bafa kwekyo oYona ekiyabakobere. Balwanikaine kuvuga meeri bayezye okukangayo oku mwalo. Neye nandi bayezya olwʼokubba enyanza yeeyongeire kwefuukuula okukiraku ngʼoweyabbaire.
14 Awo ni beekungirira oMusengwa bati, “Oo Musengwa, tukwegairira tiwatuleka ni tufa olwʼobwomi bwʼomusaiza onu. Era totunenya olwʼomusaayegwe eritubulaku akabbikabbi eritwaba okusuka olwʼokubba niiwe Musengwa osiimire otyo.”
15 Awo ni baginga oYona ni bamumuma omu nyanza, era omu kaseera akananyere ako enyanza nʼeteeka.
16 Olwʼekyo abasaiza abo ni batya ino oMusengwa era ni bawaayo esadaaka eeri oMusengwa era ni beeyama okumuweereryanga.
17 Neye iye oMusengwa nʼategekawo ogunyanyi ogunene okumira oYona era oYona nʼamala omu kida kyagwo enaku isatu omusana nʼobwire.