31
Omufugi omusa
1 Binu niibyo ebibono bya Kabaka oLamweri, ebyʼobunaabbi omaaye ebiyasunire nʼamwegesya:
2 Oo mwana wange, omwana oguneebyaliire,
omwana wange owabweyamo,
3 tiwamaliranga amaanigo ku bakali;
ibo abo bajikirica nʼabakabaka!
4 Oo Lamweri, tikyabakabaka
okunywanga omwenge,
tikyabafugi okubbanga nʼeireke oku biteemeerya,
5 demba ni bagunywa ni beerabira amateeka;
era abebagadya nandi ni babakolera ebyʼobwenkanya.
6 Omwenge oguwe yʼoyo ajigirika,
nʼoyo aali omu bwomi obwʼokugada eino.
7 Oleke banywe beerabire obudoobi bwabwe,
era tibairayo okwebukirya enima yaabwe.
8 Otumuulirirenge abo ababula obutumuliro,
olwanirirenge abadambaku omwasiriri.
9 Otumulenge era osalenge omusango mu bwenkanya;
olwanirirenge abadoobi nʼabali omu kwetaaga okusuna obwenkanya.
Okuzuula omukali owʼempisa ensa
10 Omukali owʼempisa ensa naani ayezya okumuzuula?
Omukali oyo akirira yala amabbaale agebbeeyi eino.
11 Oibaaye yamwesiga,
era abba tadamba ekintu kyonakyona ekyʼomugaso.
12 Omu bwomibwe bwonabwona, abitya nakusani oibaaye,
era nandi nʼamukola akabbikabbi.
13 Anoonia ebyoya bya ntaama nʼenkokooli
era nʼakola emirimo nʼengalogye nʼomwoyo gumo.
14 Ali ooti maato gʼabasuubuuzi;
ebyokulya abitoola yala.
15 Alamuka mu kambwiko,
nʼawa abʼomu makaage ebyokulya,
era nʼawa abaweereryabe abaala ebyokukola.
16 Yeetegereza eitakali nʼaligula,
nʼakolesya empiiyagye egyaingirya nʼalikomamu emizabbibbu.
17 Anyiikiira okukola nʼamaani,
ngʼakola nʼamaani nʼengalogye.
18 Abona omugaso gwʼebyo ebyakola,
akola paka bwire okwitaala.
19 Yeekambira ewuuzigye,
iye onanyere nʼaluka engoyegye.
20 Agabira abadoobi nʼomwoyo gumo,
era abbeera abali omu kwetaaga.
21 Obwire nʼowebubba buwolondoki, tatya olwʼabʼomu nyumbaye,
olwʼokubba bonabona abazwalisya engoye egibasyoyesya.
22 Yeekolera amasuukage agʼoku buliribwe,
azwala engoye egya lineni omusa.
23 Oibaaye mumanye ino,
era mukubbemberi ogubawa ekitiisya omu kibuga.
24 Omukali oyo atunga ebizwalo ebisa ebyʼebbeeyi eino nʼatunda.
Agulya abasuubuuzi emisibiro.
25 Wʼamaani era wʼekitiisya,
tatya ebiro ebyʼomumaiso.
26 Atumula na malabuki,
era okwegesya okwʼekisa tikumuzwa oku munwa.
27 Alabirira empisa gyʼabʼomu makaage,
era takolera oku byʼobugayaali.
28 Abaanabe bamukoba bati wʼenkabi;
nʼoibaaye yena amusisiija ati:
29 “Abakali bangi abakola ebyʼekitiisya,
neye iwe obakiraku bonabona!”
30 Okusikiriza kwʼomukali nʼobusiipoono bicaamya,
neye omukali atya oMusengwa bamuwuujenge.
31 Bamuwengeku akasiimo oku byakolerera,
era oleke ebyakola bimuzwerengeku okumuwuuja omu kifo awebakumbaaniira.