23
Ebibono bya Bbalamu oku mulundi ogwasookere
1 Awo oBbalamu nʼakoba oBbalaki ati, “Onnyombekere aanu ebyoto musanvu, era onsunireyo nʼente enumi musanvu, nʼentaama ensaiza musanvu.”
2 OBbalaki nʼakola ngʼoBbalamu oweyamukobere. Era awo oBbalaki nʼoBbalamu ni basadaaka onte onumi moiza moiza, nʼontaama omusaiza moiza moiza ku buli kyoto.
3 Awo oBbalamu nʼakoba oBbalaki ati, “Oyemerere okumpi nʼesadaakayo egibooca yonayona, nze njabe mbone ooba ngʼoMusengwa yaiza okunsisinkana. Era nabuli ekiyambiikulira naiza ni nkukobera.” Era awo oBbalamu nʼayaba nʼaniinaniina oku nairungu wʼolusozi, e wanambula bimera.
4 Era eeyo oKibbumba nʼamusisinkana kaisi oBbalamu nʼakoba oKibbumba ati, “Ntegekere ebyoto musanvu, era ku buli kimo, ni nsadaakiraku onte onumi nʼontaama omusaiza.”
5 OMusengwa nʼawa oBbalamu ebiyatumula. Nʼamukoba ati, “Okange e giri oBbalaki omukobere ebyenkukobere.”
6 Kale oBbalamu nʼakanga, nʼayajirya oBbalaki ngʼayemereire okumpi nʼesadaakaye egibooca yonayona, ngʼali aamo nʼabakungu bʼaBamowaabbu bonabona.
7 OBbalamu nʼatumula ebibono ebizwa eeri oMusengwa ati,
“Bbalaki wantoire omwAlamu,
iwe kabaka wʼaBamowaabbu wantoire omu nsozi gyʼe buzwaisana.
Wankobere oti, ‘Oize ondaamire eibyaire lya Yaakobbo,
oize olangirire obubbibubbi oku Baisirairi.’
8 Mpezya ntya okulaama abo,
oKibbumba abanandi nʼalaama?
Nalangirira ntya obubbibubbi,
kwabo oMusengwa abanandi nʼalangiriraku obubbibubbi?
9 Nsinzirira oku nairungu wʼolusozi ni mbalengera,
mbalengerera oku lusozi.
Nnengera abantu abali omu bwomi obwʼenjawulo,
era ibo beemaite nga tibafaanana nʼamawanga agandi.
10 Naani ayezya okubala abʼeibyaire lya Yaakobbo, ibo etibabalika ooti musenye?
Ooba, naani ayezya okubalaku waire ekimo ekyokuna ekyʼaBaisirairi abo?
Kasinga oleke nfe enfa yʼabatuukirirye,
era nsaba nti enkomerero yange ebbe ooti yaabwe.”
11 Awo oBbalaki nʼakoba oBbalamu ati, “Onkolere niki ekyo? Nkuleetere kulaama balabe bange, neye tete iwe nʼobasabira nkabi!”
12 Iye oBbalamu nʼamwiramu ati, “Nandirekere okutumula ebyo oMusengwa ebyampaire okutumula?”
Ebibono bya Bbalamu oku mulundi ogwokubiri
13 Awo oBbalaki tete nʼakoba oBbalamu ati, “Nkwegairiire oize twabe omu kifo ekindi, e giwayezya okubalengerera. Wabonaku bamo, neye nga tibonabona. Era wasinzirira eeyo nʼobandaamira.”
14 Kale nʼatwala oBbalamu omu kigona eeyo e Zofimu, oku nairungu wʼolusozi oPisuga. Era eeyo oBbalaki nʼayombekayo yona ebyoto musanvu, nʼasadaakira ku buli kyoto onte onumi, nʼontaama omusaiza.
15 Awo oBbalamu nʼakoba oBbalaki ati, “Osigale aanu okumpi nʼesadaakayo, nze njabe nsisinkaneku nʼoMusengwa.”
16 Era oBbalamu nʼayaba nʼasisinkana oMusengwa era nʼawa oBbalamu ebyokutumula era nʼamukoba ati, “Okange e giri oBbalaki omuwe obukwenda obwo obwenkuwaire.”
17 Nʼakanga, nʼayajirya oBbalaki ngʼakaali ayemereire okumpi nʼesadaakaye, nga nʼabakungu bʼaBamowaabbu bali aamo naye. OBbalaki nʼabuulya oBbalamu ati, “OMusengwa akobere niki?”
18 OBbalamu nʼatumula ebibono oMusengwa ebiyamutumire okukobera oBalaki ati,
“Bbalaki, owulisisye,
ontegere ekitwi mutaane wa Zipoli.
19 OKibbumba timwana wa muntu okubbeya,
era timwana wa muntu okucuuka omu biseego.
OKibbumba atumula ekintu kaisi nandi nʼakikola?
Asuubiza kaisi nandi nʼakituukirirya?
20 OKibbumba andagiire kusabira bantu nkabi;
awaire abantu nkabi, era nze timpezya okukicuusa.
21 “Mpaawo kisiraani ekiboneka okwibyaire lya Yaakobbo,
waire obugosi obubonekere omwIsirairi.
OMusengwa iye oKibbumba waabwe ali nabo.
Balangirira oKabaka waabwe oyo ngʼowaali mwibo.
22 OKibbumba yabatoire e Misiri;
abalwanira nʼamaani ooti mbogo.
23 Mpaawo irogo okwibyaire lya Yaakobbo,
era mpaawo ndagu okwIsirairi.
Batumulanga okwibyaire lya Yaakobbo
era okwIsirairi bati, ‘Obone oKibbumba ekyabakoleire!’
24 Abantu abo basetuka mu maani ooti mpologoma omukali;
bagugumuka mu maani ooti mpologoma omusaiza
ataikaikana paka ngʼaitire nʼalya ekyokulyakye,
nʼanuuna omusaaye gwʼekyo ekyaitire.”
25 Era oBbalaki nʼakoba oBbalamu ati, “Aale tiwabalaama waire okubasabira enkabi naire.”
26 Neye oBbalamu nʼamwiramu ati, “Tinkukobere nti ndi nʼokukola na buli kintu oMusengwa ekyakoba?”
Ekibono kya Bbalamu oku mulundi ogwokusatu
27 Awo tete oBbalaki nʼakoba oBbalamu ati, “Kale, aale oize nkutwale omu kifo ekindi. Tomanya amo-so oMusengwa nʼakuganya nʼobandaamirira yeeyo.”
28 Era oBbalaki nʼayaba nʼaniinisya oBbalamu oku nairungu wʼoLusozi oPeyoli, awolengerera eidungu.
29 Era oBbalamu nʼakoba oBbalaki ati, “Onnyombekere aanu ebyoto musanvu, era ontegekere ente enumi musanvu, nʼentaama ensaiza musanvu.”
30 OBbalaki nʼakola ngʼoBbalamu oweyamukobere, nʼasadaakira ku buli kyoto onte onumi, nʼontaama omusaiza.