24
1 Atyanu oBbalamu oweyamanyicirye ngʼoMusengwa asiima okuwa aBaisirairi enkabi, nandi nʼaira kukola byokulagula ngʼoweyakolere oku mirundi gidi egindi, wazira nʼacuuka kulingirira mwidungu.
2 Oweyasiirirye amaiso nʼabona aBaisirairi nga bakolere enkambi okusinzirira oku bika byabwe, oMwoyo wa Musengwa nʼamwikaku.
3 Era nʼatumula ebibono ebyobunaabbi binu ebiti,
“Binu niibyo ebibono ebyobunaabbi ebya Bbalamu omutaane wa Bbeyoli,
era ebibono ebyobunaabbi ebyʼomusaiza abona nakusani.
4 Niibyo ebibono ebyobunaabbi byʼoyo awulisisya Kibbumba,
ebyʼoyo asuna okwolesebwa okuzwa eeri Wabwezye Bwonabwona,
ebyʼoyo afuunama nʼaica empumi ansi okwitakali era amaisoge ni gabba gabona:
5 “Eweema gyanywe nga nsa inywe eibyaire lya Yaakobbo,
ebisito byanywe aBaisirairi, nga bisangaalisya!
6 “Eweema gyanywe gyepangire ooti bikolo byʼensansa,
ooti misiri oku mbale kwʼomwiga;
ooti misaale egyʼakaloosa oMusengwa egiyakomere.
Giri ooti mivule e giri oku mbale mbale kwʼamaizi.
7 Basunanga oikendi mungi,
era ensigo gyabwe gyasunanga amaizi mangi.
“Okabaka waabwe yakirangaku okabaka Agagi ekitiisya,
nʼobwakabaka bwabwe babuwuujanga.
8 “OKibbumba yabatoire e Misiri,
bali nʼamaani ooti ga mbogo.
Basaanyawo amawanga gʼabalabe baabwe,
ni bavuniankamu amagumba gʼabalabe bitundutundu,
babasumutiaga nʼobulaso bwabwe.
9 ABaisirairi baikaikaine ni balambaala ooti mpologoma
era bali ooti mpologoma omukali, naani aguma okubasakadula?
“Ababasabiranga enkabi, abo zena nagibawanga,
era ababalaamanga, abo zena nabalaamanga.”
10 Awo oBbalaki nʼasunguwalira ino oBbalamu, nʼakubba omu ngalo okulaga obusungu era nʼakoba oBbalamu ati, “Nakwetere kulaama balabe bange, neye tete iwe obasabiire nkabi emirundi egyo emisatu.
11 Aale atyanu ozwe aanu mangu okange e waanywe. Nabbaire nkusuubizire okukusasula nakusani ino, neye oMusengwa akufiikisirye.”
12 OBbalamu nʼairamu oBbalaki ati, “Abakwenda abewantumiire tinabakobeire nti,
13 ‘OBbalaki nʼowampa olubirirwe nga lwizwire efeeza nʼezaabbu, timpezya okukola ekintu kyonakyona oku lwange, waire kisa ooba kibbikibbi ni ndeka ekiragiro kya Musengwa? Ekikoba kiti, nga ndi nʼokukoba kiikyo kyonkani oMusengwa ekyankoba.’
14 Atyanu nkanga omu bantu bange, neye oleke nsooke nkulabule oku bintu abantu abo ebibalikola abantubo omu biseera ebiiza.”
Ebibono bya Bbalamu oku mulundi ogusembayo
15 Awo oBbalamu nʼatumula ebibonobye ebyobunaabbi ati,
“Binu niibyo ebibono byobunaabbi ebya Bbalamu omutaane wa Bbeyoli,
ebibono ebyobunaabbi ebyʼoyo abona nakusani.
16 Niibyo ebibono byobunaabbi ebyʼoyo awulisisya oKibbumba ebyakoba,
aali nʼamalabuki agazwa wa Nambulaku aMwagaagana,
ebyʼoyo asuna okwolesebwa kuzwa eeri oWabwezye Bwonabwona,
ebyʼoyo afuunama nʼaica empumi ansi okwitakali nʼamaisoge ni gabba gabona.”
17 “Ebinjolesebwa ebibakwataku, tibyakubbaawo biseera binu;
ebinjolesebwa ebibakwataku, tibyakubbaawo kuti kunu.
Okabaka yalizwayo omwibyaire lya Yaakobbo ooti nkota;
okabaka yalizwa omu Baisirairi.
Yalitentena empumi gyʼabʼeibyaire lya Mowaabbu,
yalitentena ebiyanga byʼabʼeibyaire lya Seezi bonabona.
18 Yaliwangula abalabebe abʼomwEdomu,
yaliwangula abo abʼomu Seiri,
era iye oIsirairi yeeyongeranga kubba wʼamaani.
19 Omufugi yalizwa omwibyaire lya Yaakobbo,
nʼajigirica abalibba basigairewo omu kibuga.”
20 Awo oBbalamu omu kwolesebwa nʼabona aBamereki kaisi nʼatumula ebibonobye ebyobunaabbi ati,
“ABamereki niibo ababbaire abakirira nakimo amaani,
neye oku nkomerero, bakujigirika.”
21 Awo omu kwolesebwa nʼabona aBakeeni, kaisi nʼatumula ebibonobye ebyobunaabbi ati,
“Ekifo kyanywe ekimutyamamu kiriku omukuumi
kiri ooti kisaasiriro kya nyonyi ekiyalukire omwibbaale.
22 Neye era inywe aBakeeni, aBasuuli balibajigirica,
aBasuuli owebalibba babatwaire omu buwambe.”
23 Awo era nʼatumula ebibonobye ebyobunaabbi ati,
“Wobe! OKibbumba oweyalikola ekyo, naani eyalisigalawo nga mwomi?
24 Emeeri gyalizwera oku mwalo e Kitimu,
gyaliwangula abʼe Suuli nʼabʼEbberi,
neye era aBakitimu bona oKibbumba yalibajigirica.”
25 Awo oBbalamu nʼasimbuka nʼakanga e waabwe, nʼoBbalaki yena nʼakwata eyiye.