14
1 Omukali owʼamalabuki ategeka amakaage,
neye omusirusiru olwʼobusirusirubwe, ajigirica agage.
2 Iye oyo atambulira omu butuukirirye atya oMusengwa,
neye iye oyo akwata enzira encaamu abba amunyooma.
3 Entumula yʼomusirusiru emukubbisya emiigo,
neye ebibono ebyʼabʼamalabuki, bibakuuma.
4 Anambula ente egirima, omu kideero timubbaamu kantu,
neye omu maani gʼente egirima, muzwamu amakungula mangi.
5 Omujulizi owʼamazima tabbeya,
neye omujulizi owʼobubbeyi atumula byʼobubbeyi byereere.
6 Omuntu omunyoomi anoonia amalabuki nandi nʼagasuna,
neye omutegeeri ayega mangu.
7 Weewalenge omusirusiru,
olwʼokubba mpaawo kyʼamalabuki ekyatumula.
8 Amalabuki gʼomutegeeri gamumanyikisya ekyokukola,
neye abasirusiru baliiba olwʼobusirusiru bwabwe.
9 Abasirusiru tibafaayo nʼowebabbenga omusango,
neye abantu abalongoole omu myoyo basaba kisonyiwo.
10 Ali nʼenima niiye amanya obulumi bwayo,
era mpaawo ayezya okugabana okwisangaalolye.
11 Enyumba yʼomubbimubbi baligijigirica,
neye eweema yʼomulongoole omu mwoyo yalisigalawo.
12 Waliwo enzira omuntu egyabona ati ntuuce
neye oku nkomerero ngʼeiguka mu kufa.
13 Nʼomu nseko mwona omwoyo gwezya okulumwa,
era eisangaalo lyezya okukomenkereza mu nima.
14 Omuntu azwa oku Kibbumba balimuweera nakimo empeera ngʼentambulaye obweri,
era omuntu omusa, balimuwa empeera esaanira entambulaye.
15 Omuntu omubisi aikirirya nabuli kintu;
neye omutegeeri, asooka kwetegereza.
16 Owʼamalabuki yeegendereza era ni yeewala ekibbikibbi,
neye omusirusiru tafaayo, era agwa-kugwa oku byakola.
17 Owensire akola bintu byʼobusirusiru;
era oyo asalira abainaye enkwe, asuna obucaawe.
18 Ababisi beeyongera omu byʼobusirusiru,
neye abʼamalabuki ibo basuna okumanya.
19 Ababbibabbi balikotamya emitwe omumaiso gʼabasa,
era ababbibabbi balyegudyera oku miryango gyʼabatuukirirye.
20 Omudoobi nʼabaliranwabe bamucaawa,
neye omugaiga abba nʼemikago mingi.
21 Iye oyo anyooma omuliranwawe akola kibbikibbi,
neye iye oyo akolera abeetaaga ebyʼekisa abba wʼenkabi.
22 Ibo abo abategeka okukola obubbibubbi bagota,
neye abategeka okukola ebisa, basuna obutake nʼobwesigwa.
23 Nabuli mulimo ogwokola nʼamaani guleeta amagoba,
neye okutumulanga-obutumuli kuleeta budoobi.
24 Obugaiga kasiimo owʼamalabuki akaasuna,
neye obusirusiru bwʼabasirusiru buzwamu busirusiru.
25 Omujulizi owʼamazima anunula obwomi bwʼabantu,
neye omujulizi owʼobubbeyi atumula byʼobubbeyi.
26 Iye oyo atya oMusengwa abbaaku obukuumi obwʼamaani,
era ekyo kyalibba kyʼobukuumi eeri abaanabe.
27 Okutya oMusengwa nsulo yʼobwomi,
era kuwunuca omuntu eeri emitego gyʼokufa.
28 Ekitiisya kya kabaka bungi bwʼabantu abaafuga,
neye omufugi okudamba abantu abaafuga, asuuka kinambulamu.
29 Omuntu omuguminkiriza abba nʼobutegeeri bunene,
neye owʼensire, alaga busirusiru.
30 Omwoyo ogulimu eidembe guleetera omubiri obwomi,
neye engongi gigulya ooti kookolo owʼamagumba.
31 Omuntu amigirirya omudoobi abba anyoomere yooyo eYamukolere,
neye akolera ebyʼekisa adamba abba awa Kibbumba kitiisya.
32 Ababbibabbi, obubbibubbi bwabwe niibwo obubazweraku okujigirika,
neye omutuukirirye afa ngʼali nʼeisuubi.
33 Amalabuki gabba omu myoyo gyʼabantu abali nʼokutegeera,
nʼekiri omu myoyo gyʼabasirusiru, kimanye.
34 Enkola ensa eyʼokutya oKibbumba egulumalisya eigwanga,
neye ekibbikibbi kiswaza igwanga eryo.
35 Okabaka yeenyumirizira omu muweererya owʼamalabuki,
neye obulwabwe bubba ku muweererya akola ebiswaza.