13
Obudoobi nʼobusuni
1 Omwana owʼamalabuki awulira okulungamya kwa iteeye,
neye omunyoomi taganya okumunenya.
2 Entumula yʼomuntu ensa emuzweramu ni yeeyagalira omu bisa,
neye abatali beesigwa beinira buvuuyo.
3 Eyeekuuma omu ntumula akuuma bwomibwe,
neye atumulyaga yeereetaku kujigirika.
4 Omuntu omugayaali ayoya era nandi nʼasuna,
neye omunyiikiiri asuna ebiyeegomba mu bungi.
5 Omutuukirirye acaawa obubbeyi,
neye omubbimubbi aswaza era akwatisya ensoni.
6 Obutuukirirye bukuuma oyo onambulaku ekyokumunenya,
neye obubbibubbi buzweraku omubbimubbi okujigirika.
7 Waliwo eyeeraga ngʼomugaiga, neenu mudoobi yeeyagira lujo;
nʼogondi ni yeeraga ngʼomudoobi, neenu mufeekeeri.
8 Obusuni bwʼomuntu buyinza okubba kinunulokye;
neye omudoobi mpaawo ekimweraliikirirya.
9 Ebikole byʼomutuukirirye byeragira nakimo ooti kitangaala,
neye ebikole byʼomubbimubbi bimidirirya ooti itaala eririkira.
10 Okwesiiryasiirya kuzwamu yombo,
neye amalabuki gabba mu baabo abaikirirya okubalaabbira.
11 Obusuni obwʼobukucaakuca buwaawo mangu,
neye asolooja obusuni omu butontono, agira ni bwala.
12 Eisuubi elirwawo okutuukirira lirwalya ebiseego,
neye ekiweegomba owekituukirira kibba ooti musaale gwʼobwomi.
13 Omuntu anyooma okumulaabbira yeereetera okujigirika,
neye agondera ekiragiro asuna empeera.
14 Enjegesya yʼowʼamalabuki iyo nsulo yʼobwomi,
era kuwunuca omuntu eeri emitego gyʼokufa.
15 Enseega ensa ereetera omuntu okubba mukoda,
neye eneebitya yʼoyo atali mwesigwa emuzweramu kujigirika.
16 Nabuli muntu omutegeeri, akola ebintubye kuzwa mu kumanya,
neye omusirusiru alaga busirusirubwe.
17 Omukwenda omubbimubbi, agwa omu bigosi,
neye iye oyo omwesigwa aleetawo idembe.
18 Obudoobi nʼokuswala bituuka ku yooyo atataka okumulaabbira,
neye aikirirya okumunenya, bamuwa ekitiisya.
19 Ekiweegomba owekituukirira kisangaalya omwoyo,
neye okulekawo ekibbikibbi, kyʼomuliko eeri abasirusiru.
20 Iye oyo atambula nʼabʼamalabuki asuuka mulabuki,
neye oyo akolagana nʼabasirusiru wakugada.
21 Emitawaana gisuupangana nʼababbibabbi,
neye omutuukirirye bamugabania bisa.
22 Omuntu omusa alekera eibyairerye ebyʼobusika,
neye obusuni bwʼomubbimubbi, bwalibba bwʼomutuukirirye.
23 Omusiri gwʼomudoobi guyinza okuzwamu ebyokulya bingi,
neye abatali benkanya babimalawo.
24 Oyo ataswanyulamu omwanawe abba amucaawire,
neye iye oyo amutaka, amugolola nga bukaali.
25 Abatuukirirye babba nʼebyokulya ebibamala,
neye omubbimubbi abba munzalwa.