12
Eneebitya yʼabatuukirirye nʼababbibabbi
1 Asiima okumulaabbira abba ataka kumanya,
neye acaawa okumunenya abba musirusiru.
2 Omuntu omusa abba mukoda eeri oMusengwa,
neye oMusengwa asingisya owʼenkwe omusango.
3 Omuntu akola obubbibubbi tabbaawo nʼatebenkera,
neye omutuukirirye iye tasiguka.
4 Omukali omwegendereza aweesya oibaaye ekitiisya,
neye omukali aswaza, alumya ooti kookolo omu magumba ga ibaaye.
5 Entegeka gyʼomutuukirirye gibba gyʼobwenkanya,
neye amalabuki gʼomubbimubbi gabba gʼobubbeyi.
6 Ebibono byʼomubbimubbi bizweraku okusuka omusaaye,
neye entumula yʼomulongoole omu mwoyo enunula iye onanyere.
7 OKibbumba yalijigiricirya nakimo ababbibabbi ni bawaawo,
neye abʼenyumba yʼomutuukirirye ibo basigala nga mpaawo ekibanyeenya.
8 Omuntu bamuwuuja olwʼamalabukige,
neye omuwiwiituki iye bamunyooma.
9 Omuntu eyeica ni yeekolera,
akiraku oyo eyeegulumalya ate ngʼadamba ekyokulya.
10 Omuntu omutuukirirye alabirira ebisolobye,
neye ebyʼekisa omubbimubbi ebyakola, era bibba byʼobukambwe.
11 Oyo iye alima eitakalirye yaabbanga nʼebyokulya bingi,
neye anoonia ebitagasa, tabba mutegeeri.
12 Omubbimubbi yeegomba omunyago gwʼomubbimubbi ogondi,
neye omutuukirirye asigala munywerereri.
13 Omubbimubbi bamupapalirya mu ntumulaye embiibbi,
neye omutuukirirye awunuka obugosi.
14 Entumula yʼomuntu ensa emuleetera okusuna ebisa bingi,
era emirimo gyʼengalogye gyamusasulanga.
15 Omusirusiru ebyakola abibona ati bituuce,
neye owʼamalabuki, awulisisya ebibamulaabbira.
16 Omusirusiru owaasunguwala kimanyikanirawo,
neye omuntu omutegeeri asirikira ekimunyiizire nʼakizwaku.
17 Omujulizi owʼamazima awa bujulizi owʼamazima,
neye omujulizi owʼobubbeyi atumula byʼobubbeyi.
18 Entumula embiibbi esumuta ooti mpiima,
neye ebibono byʼabʼamalabuki bireeta okulama.
19 Ebibono ebyʼamazima ibyo bibbeerererawo,
neye ebyʼobubbeyi bibba byʼakaseera-buseera.
20 Abateesa okukola ebibbibibbi, emyoyo gyabwe giizwire bubbeyi,
neye abateesa okukola ebyʼeidembe babba na isangaalo.
21 Omutuukirirye mpaawo akabbikabbi akamutuukaku,
neye ababbibabbi baizula bigosi.
22 OMusengwa acaawa abantu abatumula ebyʼobubbeyi,
neye asangaalira abantu abʼamazima.
23 Omuntu omutegeeri tatumulyaga nabuli kyamaite,
neye abasirusiru balalaasa busirusiru bwabwe.
24 Engalo yʼomunyiikiiri emusuuca wʼobwezye,
neye obugalanzi, bukusuuca mugalama.
25 Enima oku mwoyo ereetera omuntu okwekondamira,
neye ekibono ekisa kimusangaalisya.
26 Omuntu omutuukirirye alungamya abainaye,
neye eneebitya yʼomubbimubbi emuliibya iye onanyere.
27 Omuntu omugayaali akaya okwoca ekyayiigire,
neye omuntu omunyiikiiri, asuna ebyobusuni ebyʼamaani.
28 Enzira eyʼobutuukirirye erimu obwomi,
era omu kisinde ekyo mpaamu kufa.