11
Obwenkanya nʼobulyazaamaanya
1 OMusengwa acaawa abakolesya eminzaani egitali ntuuce,
neye asiima abakolesya amabbaale gʼeminzaani amatuuce.
2 Okwekudumbalya owekwiza, okuswala kubbaawo,
neye kyʼamalabuki okubba mwikaikani.
3 Obwesigwa obwʼomuntu omulongoole omu mwoyo bumulungamya,
neye obukucaakuca bwʼabatali beesigwa, bubazweraku okujigirika.
4 Obusuni mpaawo kibugasa oku lunaku lwʼomusango,
neye obutuukirirye bununula omu kufa.
5 Obutuukirirye bwʼabanambulaku ekyokubanenya bulungamya obwomi bwabwe;
neye ababbibabbi, obubbibubbi bwabwe bubagwisya.
6 Obutuukirirye bwʼabalongoole omu myoyo bubanunula,
neye abatali beesigwa ibo babakwatira mu kwegomba kwabwe okubbikubbi.
7 Omubbimubbi owaafa, eisuubirye lifa;
ebiyabbaire asuubiira omu maanige bigota.
8 Omutuukirirye bamununula omu bigosi,
neye omubbimubbi niiye aira nabba nabyo.
9 Ebibono byʼomuntu atatya oKibbumba bijirica abainaye,
neye abatuukirirye, okumanya kubanunula.
10 Abatuukirirye owebabitamu, ekibuga kijaagaana.
Ababbibabbi owebafa, wabbaawo okuceera olwʼeisangaalo.
11 Olwʼenkabi gyʼabalongoole omu myoyo, ekibuga bakigulumalya,
neye olwʼebibono byʼomubbimubbi, kijigirika.
12 Omuntu omusirusiru atumula kubbikubbi oku omwinaye,
neye omuntu omutegeeri, yeesirikira.
13 Owʼolugambo abiikula ebyama,
neye iye oyo omwesigwa, abisirikira.
14 Anambula okulungamya eigwanga tiryemerera,
neye awabba abawi bʼamalabuki abangi, wabbaawo eidembe.
15 Ateekawo omusingo oku lwʼoyo ogwatamaite, mazima yalituuka omu bugosi,
neye oyo acaawa okubba omuyima okwibbanja lya gondi, iye abba nʼeidembe.
16 Omukali owʼekisa, asuna ekitiisya,
neye abantu abaŋeŋese, bakoma ku byʼobusuni.
17 Omuntu owʼekisa yeegasa niiye onanyere
neye omuntu omukambwe yeeretaku bigosi.
18 Omubbimubbi empeera egyasuubira tiniiyo egyasuna,
neye iye oyo akola ebyʼobutuukirirye asuna empeera enanyerenyeere emugasa.
19 Akalangukira omu kukola ebyʼobutuukirirye asuna obwomi,
neye iye oyo agumira omu kibbikibbi, yalifa.
20 OMusengwa acaawa abʼemyoyo emifuuduuki;
neye asangaalira abo abatambulira omu bwomi obunambulaku ekyokubunenya.
21 Obbe mukakase ku kinu oti, ababbibabbi balibabonereza,
neye eibyaire lyʼomutuukirirye balirinunula.
22 Omukali omusiipoono oyo adamba empisa,
ali ooti mpeta yʼezaabu eri omu nindo ya mbiizi.
23 Okwegomba kwʼomutuukirirye kuzwamu bisa byereere,
neye eisuubi lyʼomubbimubbi likomenkereza mu bulwa bwa Musengwa.
24 Waliwo omuntu abba omugabi ni yeeyongeranga kugaigawala,
nʼogondi nabba mukodo okukiraku ngʼowekisaaniire, neye ni yeeyongeranga kudooba.
25 Omugabi yagaigawalanga;
iye oyo awa abandi obubbeeri, yena yasunanga.
26 Abantu batumula bundi kwoyo akalira oku nsigo gyʼempeke,
neye iye oyo abagulyaku, bamusabira enkabi.
27 Iye oyo anyikiira okukola obusa asuna obutake,
neye ekibbikibbi kyaba ku yooyo akinoonia.
28 Eyeesiga obusunibwe yaligwa,
neye omutuukirirye yanyiriranga ooti kikoola ekijimu.
29 Ajolonga abʼomu kisitokye, mpaawo ekiyalisikira
era omusirusiru yaabbanga mugalama wʼoyo ali nʼamalabuki.
30 Ebintu omutuukirirye ebyakola, musaale gwʼobwomi,
nʼoyo asikiriza emyoyo gyʼabantu abba wʼamalabuki.
31 Obanga abatuukirirye basuna empeera nga bakaali bali oku kyalo kunu,
kaisi leero kyalibba kitya oku mukaafiiri nʼoyo akola ebibbibibbi?