10
Engero gya Sulemaani
1 Engero gya Sulemaani:
Omwana owʼamalabuki, asangaalya oiteeye,
neye omusirusiru anakuwalya omaaye.
2 Obusuni bwʼobukumpanya, tibugasa;
neye obwesigwa bununula omu kufa.
3 OMusengwa taleka omutuukirirye okubba munzalwa;
neye akaisya ababbibabbi okusuna ebibeegomba.
4 Engalo ennafu gireeta budoobi;
neye engalo eginyiikiira, gireeta busuni.
5 Akungula okweisana abba mwana wʼamalabuki,
neye oyo agona omu biseera ebyʼamakungula, abba mwana aswaza.
6 Enkabi giizula oku mutuukirirye,
neye omunwa gwʼomubbimubbi gwizula bukambwe.
7 Omutuukirirye bamwebukiryanga ngʼowʼenkabi,
neye eriina lyʼomubbimubbi ligota.
8 Omuntu owʼamalabuki, aikirirya ebibamulagira;
neye alabankana ebyʼobusirusiru yalijigirika.
9 Omuntu onambulaku ekyʼokumunenya, abba nakusani;
neye omukumpanya, balimutegeera.
10 Oyo abisabisa amazima, aleeta obugosi;
nʼoyo alabankana ebyʼobusirusiru, yalijigirika.
11 Omunwa gwʼomutuukirirye nsulo yʼobwomi,
neye ogwʼomubbimubbi gwizula bukambwe.
12 Obucaawi buleeta enyombo;
neye okutaka kuzweraku okusoniyangana ebibbibibbi byonabyona.
13 Omutegeeri ebyatumula, mubbaamu amalabuki;
neye omugongo gwʼomusirusiru, gukaanya miigo.
14 Abantu abʼamalabuki, beebisira okumanya;
neye omusirusiru ebyatumula, bimuleetera okujigirika.
15 Obusuni eeri abagaiga buli ooti kibuga ekiriku olugaga;
neye obudoobi, niibwo obujigirica omudoobi.
16 Empeera yʼomutuukirirye emusunisya bwomi;
neye omubbimubbi ebyasuna, bimuleetera kwonoona.
17 Oyo aikirirya okumubonereza, ali mu nzira yʼobwomi;
neye oyo agaana okumunenya, aliiba.
18 Iye oyo abisa obucaawi, abba mubbeyi;
nʼoyo atumula obundi oku mwinaye, abba musirusiru.
19 Omu kutumula ebibono ebingi, timudambamu ebisoba;
neye asirika, abba wʼamalabuki.
20 Entumula yʼomutuukirirye, ebba ooti feeza ennongoole;
neye ebiseego byʼababbibabbi, bigasa katono.
21 Ebibono byʼomutuukirirye, bigasa bangi;
neye abasirusiru bafa lwʼokudamba kumanya.
22 Enkabi gya Musengwa niigyo egigaigawalya,
era tagigaitaku enima.
23 Omusirusiru ekimusangaalisya, kukola bibbibibbi;
neye omuntu omulabuki ekimusangaalisya, kukola byʼobutegeeri.
24 Omubbimubbi ebyatya bimutuukaku;
neye abatuukirirye ebibeetaaga babisuna.
25 Ompunga owaafuwa, ababbibabbi bawaawo;
neye abatuukirirye babbeerererawo emirembe gyonagyona.
26 Ngʼenviinyo ensasaami owegiita amaino, era ngʼomwosi owegusaata amaiso,
nʼomugayaali yena waabba eeri abo abamutuma.
27 Okutya oMusengwa kuwangaalya omuntu;
neye emyanka gyʼababbibabbi bagisalaku.
28 Eisuubi lyʼabatuukirirye lizwamu eisangaalo;
neye okusuubira kwʼababbibabbi, tikuzwamu kantu.
29 Amanzira ga Musengwa lugaga lwʼabo abanambulaku kyokubanenya;
neye abo ababbibabbi gabajigirica.
30 Abatuukirirye tibasagaasaganenge;
neye ababbibabbi, tibalibbeerererawo omu kyalo.
31 Omunwa gwʼomutuukirirye guzwamu byʼamalabuki;
neye olulimi olubbeyi, balirusirica.
32 Abatuukirirye bamanya ebibasaana okutumula;
neye ababbibabbi ebibatumula bicaamu.