9
Amalabuki gaaniriza abantu
1 Amalabuki gombekere enyumba yaago,
gagikoleire empango musanvu.
2 Gategekere enyama, gayiisirye ekiyeere kyʼenviinyo
era gategekere ekiinulo kyago.
3 Gatumire abaweererya baago abaala,
baabe omu bifo ebikira obugulumali omu kibuga beete bati,
4 “Nabuli muntu omubisi, ayawukire munu!”
Nʼoyo adamba okutegeera, gamukoba gati,
5 “Oize olye oku kyokulya kyange,
era onyweku nʼekiyeere kyʼenviinyo ekimpiisirye.
6 Oleke amanzirago agʼobutamanya kaisi obbeewo mwomi.
Otambulirenge mu manzira gʼobutegeeri.”
7 Nabuli anenya omunyoomi, yeereetera kumuduula;
nʼoyo asoica omubbimubbi, asuna bizumi.
8 Tiwanenyanga omunyoomi, kaisi tiyakucaawa,
onenyenge wʼamalabuki, yakutakanga.
9 Olungamyenge owʼamalabuki, yeeyongeranga okubba mulabuki;
oyegesyenge omutuukirirye, yeeyongeranga okwega.
10 Okutya oMusengwa, okumanya mu kutandiikira,
nʼokumanya Oyo oMutukulye, niikwo okubba omutegeeri.
11 Olwʼokubba ninze, waliwangaala,
era balikwongeraku emyanka gyʼobwomibwo.
12 Owoobba nʼamalabuki, gagasa niiwe onanyere;
owoobba omunyoomi, weerumya niiwe onanyere.
13 Omukali omusirusiru, atumulira ngulu;
abula mpisa, era adambaku okumanya.
14 Atyama oku mulyango gwʼenyumbaye,
ooba oku kityamo omu bifo ebigulumali ebyʼekibuga,
15 okweta abo ababitawo,
abali omu ŋendo gyabwe ati,
16 “Nabuli muntu omubisi, ayawukire munu.”
Nʼakoba oyo adamba okutegeera ati,
17 “Amaizi agʼobwibbi gawooma,
nʼekyokulya ekibalya omu mbiso, kinoli.”
18 Neye abo abaayeta tibamaite bati abaingira omwo bafeeramu;
tibamaite bati abagenibe, bafu abali e magombe!