8
Amalabuki gaaminkirira
1 Amalabuki tigeeterera?
Okutegeera tikwaminkirira?
2 Oku bifo ebigingice oku nzira,
era omu mansanganzira gʼenguudo gigeemereire.
3 Oku mageeti gʼekibuga,
oku miryango e gibaingirira omu kibuga, gaaminkirira gati,
4 “Inywe abantu, mbeeta,
nabuli muntu oku kyalo mmwaminkirira.
5 Inywe ababisi, mwege amakulu gʼamalabuki;
inywe abasirusiru, musune okutegeera.
6 Muwulisisye olwʼokubba ndi nʼebyʼamakulu ebyokutumula,
mbuunulula omunwa gwange kutumula bituuce.
7 Ntumula mazima,
era ncaawa obubbeyi.
8 Byonabyona ebintumula byʼamazima,
mpaamu bucaamu waire obugotesye.
9 Ebibono byonabyona bitegerekeka eeri oyo ategeera,
mpaamu bucaamu eeri abo abali nʼobumanyi.
10 Otwale nze amalabuki ebinjegesya, omu kifo kyʼefeeza;
era otwale okumanya omu kifo kyʼezaabbu ennongoole,
11 olwʼokubba amalabuki gʼomugaso okukiraku amabbaale agʼebbeeyi,
era mpaawo kiweegomba ekyoyezya okugageraageraniaku.
12 “Nze amalabuki, mba aamo nʼokutegeera;
ndi nʼokumanya nʼokusalawo okusa.
13 Okutya oMusengwa niikwo okucaawa ekibbikibbi.
Ncaawa amalala nʼokwepanka,
nʼeneebitya embimbi nʼentumula eyʼobubbeyi.
14 Okulungamya nʼokuwa ebiseego ebisa byange;
ndi nʼokutegeera nʼobwezye.
15 Ninze mbeera abakabaka ni bafuga,
nʼabafugi ni bateekawo amateeka agʼobwenkanya.
16 Ninze mbeera abafugi ni bafuga,
era abakungu bonabona abo ni bafuga oku kyalo.
17 Ntaka abo abantaka,
era abo abanyikiira okunnoonia bambona.
18 Obugaiga nʼekitiisya ninze ndi nabyo,
obugaiga obwenkalaakalira nʼenkulaakulana.
19 Ebingaba bisa okukiraku ezaabbu ennongoole;
abantu ebibasuna okuzwa egyendi bisa okukiraku efeeza ennongoole.
20 Ntambulira mu nzira yʼobutuukirirye,
ni nkolera omu bwenkanya.
21 Mpa obugaiga abo abantaka,
era njizulya esitoowa gyabwe.
22 “OMusengwa yabbaire na nze omu kutandiika emirimogye,
nga wakaali okubbaawo ekintu ekindi kyonakyona.
23 Yanteekerewo ira ino,
nabbairewo okuzwa oku ntandiika, ngʼekyalo kikaali okubbaawo.
24 Nze nabbairewo nga nʼenyanza gikaali okubbaawo,
ngʼensulo gikaali okubindigulya amaizi;
25 nze nabbairewo ngʼakaali okuteeka ensozi omu bifo byagyo,
ngʼakaali okuteekawo obusozi,
26 ngʼakaali okubbumba ekyalo, nʼokuteekawo emisiri,
waire eitakali lyonalyona eryʼoku kyalo.
27 Nabbairewo oweyateekeirewo eigulu omu kifo kyalyo,
nabbairewo oweyateekeirewo ekireri e gikiboneka ooti gikyekwatira oku nyanza.
28 Nabbairewo ngʼateekawo ebireri omwibbanga,
era ngʼateekawo ensulo egyʼenyanza,
29 nabbairewo oweyaweereire enyanza ensalosalo,
kaisi amaizi tigambukanga ensalo yaago egiyalagiire okubba,
era oweyateekeirewo emisingi gyʼekyalo,
30 nabbaire naye ngʼomukoli omukugu,
era nga mmusangalisya nabuli lunaku,
era nga njagaanira omumaisoge bulijo,
31 nga njagaanira omu kyalokye,
era nga neesiima olwʼabantu.
32 “Atyanu baana bange, mumpulisisye;
bʼenkabi ibo abo abakwata amanzira gange.
33 Muwulisisyenge ebimbeegesya, kaisi mubbenge nʼamalabuki;
era timwabirekanga.
34 Wʼenkabi iye oyo ampulisisya,
aabba oku lwigi lwange ngʼali bulindaala bulijo,
ankuumirira oku mulyango gwʼenyumba yange,
35 olwʼokubba nabuli anzuula asuna obwomi,
era abba mukoda eeri oMusengwa.
36 Neye oyo agaana okunnoonia, yeita yenkani.
Bonabona abancaawa, babba bataka kufa.”