16
1 Omuntu ategeka omu mwoyogwe ebiyakola;
neye oMusengwa niiye asalawo ekyenkomerero.
2 Omuntu ayezya okubona ati eneebityaye yonayona ntuuce,
neye oMusengwa niiye akebera omwoyo gwʼomuntu.
3 Nabuli ekyokola okikwatisyenge Musengwa,
era entegekagyo gyatuukiriranga.
4 OMusengwa yakolere nabuli kintu nga kiriku ekigendererwa,
nʼababbibabbi yabateekeirewo olunaku lwʼakazigizigi.
5 OMusengwa acaawa abʼamalala bonabona.
Mukimanye muti, tibaliwunuka okubabonereza.
6 Olwʼokutaka okutakoma nʼobwesigwa, omuntu bamusoniya ekibbikibbi;
olwʼokutya oMusengwa, niikyo ekigira omuntu ni yeewala ekibbikibbi.
7 Eneebitya yʼomuntu oweesangaalisya oMusengwa,
ezweraku nʼabalabe bʼomuntu oyo ni babba idembe naye.
8 Kisa nʼobba nʼebitono ebyosunire mu mazima,
okukiraku okubba nʼebingi ebyosunire mu bukucaakuca.
9 Omuntu ategeka ebyali nʼokukola,
neye oMusengwa niiye asalawo ebiri nʼokutuukirira.
10 Ebibono bya kabaka ibyo tibigwa ansi,
era ebibonobye byobwenkanya ngʼalamula.
11 OMusengwa ataka eminzaani nʼebipima ebindi byonabyona bibbe bituuce;
amabbaale gonagona agebapimisya niiye eyagirire ni bagakola.
12 Kyʼomuliko okabaka okukola ebibbibibbi,
olwʼokubba entebeye eyʼokufuga ebbeerererawo lwʼobutuukirirye.
13 Abakabaka basangaalira minwa egitumula ebyʼobutuukirirye;
era bataka baabo abatumula ebyʼamazima.
14 Okabaka owaasunguwala ayinza okukwita,
neye omuntu owʼamalabuki amwikaikania.
15 OKabaka owaasangaala, kireeta obwomi;
okutakakwe kusangaalya ooti ikendi akulya ebibala.
16 Nga kisa ino okusuna amalabuki okukiraku okusuna ezaabbu,
era kisa okulondawo okutegeera okukiraku efeeza!
17 Okwewala ekibbikibbi niiyo enzira yʼobulongoole,
oyo iye afaayo oku ntambulaye, akuuma obwomibwe.
18 Amalala galeeta okujigirika;
okwekudumbalya kuleeta ekigwo.
19 Kisa okwewombeeka nʼobba aamo nʼabebajolonga,
okukiraku okugabana ebinyage nʼabʼamalala.
20 Oyo iye atwala ebibamulaabbira, bimwabira nakusani,
era wʼenkabi oyo iye eyeesiga oMusengwa.
21 Omuntu owʼamalabuki niiye ogubeeta omutegeeri,
owʼebibono ebisa ategeeresya abantu mangu.
22 Amalabuki igo nsulo yʼobwomi eeri oyo abba nago,
neye obusirusiru buleetera abasirusiru kibonerezo.
23 Ebiseego byʼomuntu owʼamalabuki bimulungamya omu ntumula,
nʼebyatumula bimatiza abantu.
24 Ebibono ebyʼekisa biri ooti mujenene,
binyuunyuulira omuntu ni bimuleetera obwomi obusa.
25 Waliwo enzira omuntu egyabona ati ntuuce,
neye oku nkomerero ngʼeiguka mu kufa.
26 Okutaka okulya kuleetera omuntu okukola nʼamaani;
olwʼokubba okwetaaga ekyokulya kimusindiikirirya okweyongera okukola.
27 Omuntu omubbimubbi ategeka kukola bubbibubbi,
nʼebyatumula bibabula ooti musyo.
28 Omuntu atumula ebyʼobugwagwa asiikuula oyombo,
nʼolugambo lwawukanisya abʼomukago.
29 Omutabulitabuli asendasenda omwinaye,
nʼamukolesya ebyembyoni.
30 Oyo iye amigira omwinaye amaiso ateesa byʼobucaamu;
oyo iye amugedera omunwa babba baseega kukola kibbikibbi.
31 Envi egyʼobukaire ngule yʼekitiisya,
abasuna engule eyo baadi abatambulira omu bwomi obutuukirirye.
32 Kisa okubba muntu alwawo okusunguwala okukiraku okubba owʼentalo,
era okubba ngʼofuga obusungubwo, okukiraku oyo iye afuga ekibuga.
33 Abantu bakubba akalulu,
neye oMusengwa niiye asalawo ebizwamu.