17
1 Kisa okulya akatono akanyaata ngʼoli nʼeidembe,
okukiraku okulya embaga omu kisito omulimu entalo.
2 Omuweererya akola ebyʼamalabuki yalifuga omwana owʼomu kisito akola ebiswaza,
era yalisuna omugabo oku byobusika ngʼomwana owʼe ika.
3 Ekikoomi kikenenula feeza na zaabbu,
neye omwoyo gwʼomuntu, oMusengwa niiye agugezesya.
4 Omuntu omubbimubbi, awulisisya ntumula embiibbi;
nʼomubbeyi awulisisya byʼobubbeyi.
5 Oyo iye asekerera abadoobi, azumirira oyo eYabakolere;
nʼoyo iye asangaalira ebisiraani byʼabainaye, tiyalikaya okusuna ekibonerezo.
6 Abakaire beeyagala lwakubba na baizukulu,
nʼabaana beenyumiriza lwʼababyaire baabwe.
7 Omusirusiru ngʼowaatatumula ebyʼamakulu;
nʼomuntu owʼekitiisya tatuukanira nakimo okubba mubbeyi.
8 Enguzi eri ooti irogo eeri oyo agiwa,
aseega ati nabuli gyacuukira abitamu.
9 Oyo iye asoniya ensobi akuuma okutaka,
neye okutumulatumula oku nsobi, kyawukanisya abalya onswa omoiza.
10 Okunenya kukola kinene oku muntu omutegeeri,
okukiraku emiigo 100 egibakubba omusirusiru.
11 Omuntu omubbimubbi, akola bujeemu bwonkabwonkani;
era balimusindikira omukwenda omukambwe okumubonereza.
12 Kasinga osangaana odubu ogubatoireku abaana,
nandi nʼoyagirya omusirusiru ngʼakola ebyʼobusirusirubye.
13 Obwosasulamu omuntu kibbikibbi olwʼekintu ekisa ekyakukoleire,
akabbikabbi tikalizwa omu kisitokyo.
14 Okutanula okwomba, kuli ooti kwigulya mudumo gwʼamaizi;
kale olekanga okayaani, ngʼoyombo akaali okugwawo.
15 Atoola omusango kwoyo agubbengere nʼoyo asingisya omusango atagubbengere,
bombi oMusengwa abacaawa.
16 Tikigasa omusirusiru okutoola empiiya okusasulira ebyokwega,
olwʼokubba tayezya kubitegeera.
17 Abʼomukago batakangana enaku gyonagyona,
nʼaboluganda babbaawo okubbeerangana omu bigosi.
18 Bubba busirusiru omuntu okweyama
nʼateekawo omusingo oku lwʼeibbanja lyʼomwinaye.
19 Oyo iye ataka oyombo, ataka kibbikibbi;
nʼoyo eyeekudumbalya, anoonia kujigirika.
20 Omuntu owʼomwoyo omufuuduuki, tasuna ebisa;
nʼatumula ebyʼobubbeyi, yeereetera akabbikabbi.
21 Abyala omusirusiru, yeereetera enima;
era oiteeye wʼomusirusiru, tabba nʼeisangaalo.
22 Omwoyo omusangaali, bulezi busa;
neye omwoyo omunakuwali, gukalya amagumba.
23 Omuntu omubbimubbi aikirirya enguzi omu nkukutu
nandi nʼasala omusango omu bwenkanya.
24 Omuntu omutegeeri, ategeka nʼakola ebyʼamalabuki;
neye omusirusiru alugaluganirya ebiseego ku buli kintu.
25 Omwana omusirusiru, anakuwalya oiteeye,
era abba bulumi eeri omaaye.
26 Tikituuce okutanza onambulaku omusango,
waire okufaamuula abakungu olwʼobwesigwa bwabwe.
27 Omuntu owʼamalabuki afuga entumulaye;
era omuntu omutegeeri abba mwikaikani.
28 Nʼomusirusiru yena owaasirika bayezya okumweta owʼamalabuki;
era owaatazwamu kibono bamweta mutegeeri.