18
Enima nʼamalabuki
1 Omuntu eyeeyabula oku bainaye, abba anoonia bibye yenkani,
era abba ayakanisya abo abali nʼenseega ensa.
2 Omusirusiru tafaayo kwega;
neye asiima kutumula kiikyo ekiri omu mwoyogwe.
3 Ekibbikibbi kikuzweraku ni bakunyooma;
era okuswala kukuzweraku ni bakubityamu amaiso.
4 Ebibono omuntu owʼamalabuki ebyatumula biri ooti maizi amaabiriri;
era biri ooti mwiga ogukulumuka.
5 Tikisa okwekubbira oku lubba lwʼomubbimubbi,
nʼokusalirirya onambulaku omusango.
6 Ebibono byʼomusirusiru bimuleetera ekinakoolo,
era omunwagwe gumukubbisya.
7 Omusirusiru ebyatumula bimuzweraku okujigirika,
era ebibonobye mutego ogumupapalya.
8 Ebibono byʼomugeyi biwooma ino,
bingira omuntu ni bimugwa oku mwoyo.
9 Omudoto omu byakola,
mpaawo njawulo nʼoyo abebenya ebintu.
10 OMusengwa, lugaga olwʼamaani,
omutuukirirye omwairukira nʼasuna obukuumi.
11 Obusuni eeri abagaiga buli ooti kibuga ekiriku olugaga;
babuseegaku okubba ekikomera ekigulumali ekibataasa.
12 Amalala, geekubbembera kujigirika,
neye okwewombeeka kwekubbembera kusuna kitiisya.
13 Awa ekyokwiramu ngʼakaali okwetegereza,
abba musirusiru, era aswala.
14 Obumaliriri bwʼomulwaire okubba mwomi, bubbeesyawo obwomibwe;
neye owaatya, endasi gimuwaamu.
15 Omuntu omutegeeri asuna okwega;
omuntu owʼamalabuki awulisisya nʼayega.
16 Ekirabo omuntu ekyagaba kimwigulirawo enzira
era ni kimutwala omumaiso gʼomukulu.
17 Asooka okwewozyaku, alaga ngʼobwali omutuuce,
paka ogwawozya naye owaiza nʼamulumiriza.
18 Akalulu kamalawo empaka,
era kalamula abʼamaani abayakana.
19 Okusyania nʼowoluganda ogwosunguwairye, kigosi okukiraku okwazya okungira omu kibuga ekiriku olugaga;
era enyombo gyabula abantu ooti bugumu bwʼegeeti eyʼolugaga ensibemu ebyoma.
20 Omuntu ebyatumula bimugasa ooti kyokulya,
ebizwa omu byatumula byamugasanga.
21 Olulumi lwezya okuleeta okufa ooba obwomi;
kale abalukolesya eino, bakungulanga ebiruzwamu.
22 Oyo iye asuna omukali owʼobufumbo abba asunire kintu kisa,
era asuuka mukoda eeri oMusengwa.
23 Omuntu omudoobi, atumula nʼobuwombeeki;
neye omusuni, airamu na idumi.
24 Abʼomukago abamo babba bʼakaseera-buseera;
neye waliwo abba mwesigwa nʼokukiraku owaluganda.