19
Omudoobi aamo nʼomusuni
1 Kasinga obba omudoobi ngʼotambulira mu bwomi obunambulaku ekyʼokubunenya,
okukiraku okubba omubbeyi era omusirusiru.
2 Tikisa okubba nʼeiganyi lyʼokukola ekintu ngʼokibulaku obumanyi,
waire okubbubbukira ebintu nʼokola ensobi.
3 Obusirusiru bwʼomuntu bwonoona obwomibwe,
kaisi iye nʼanenya Musengwa.
4 Obusuni buleeta emikago mingi;
neye omudoobi, nʼomukaagwawe yena amuzwaku.
5 Omujulizi owʼobubbeyi tibalikaya okumubonereza,
nʼoyo atumulyaga ebyobubbeyi tiyaliwunuka ekibonerezo.
6 Bangi abanoonia obukoda eeri omugabi,
era nabuli moiza yeegomba okusala omukago na yooyo agaba ebirabo.
7 Oobanga omudoobi abagandabe bonabona bamucaawa;
kaisi olwo abakaagwabe ibo bamwewala kwenkana aina!
Newankubbaire ngʼomudoobi abanoonia nʼokwegairira,
era tabasuna!
8 Oyo iye asuna amalabuki, abba ataka obwomibwe;
akalangula ebyayegere, asuna ebisa.
9 Omujulizi owʼobubbeyi tibalikaya okumubonereza,
nʼoyo iye atumulyaga ebyʼobubbeyi yalijigirika.
10 Omusirusiru tawoomera okubba omu bwomi bwʼokwetalawusa,
nʼomugalama tatuukana okufuga abakungu.
11 Enseega ensa eyʼomuntu emuwa obuguminkiriza;
era okutafaayo oku bibamusobyaku kimuweesya ekitiisya.
12 Obulwa bwa kabaka butiisya ooti kululuma kwa mpologoma;
neye ekisaakye kiweeweerya ooti lume oluli okwisubi.
13 Omwana omusirusiru aleetera oiteeye okujigirika;
nʼomukali atalekera okwomba, ali ooti ikendi ataca.
14 Enyumba nʼobusuni, babisika ku babyaire;
neye oMusengwa niiye agaba omukali omutegeeri.
15 Obugayaali buleeta endoolo nyingi;
era atataka okukola, abba munzalwa.
16 Oyo iye agondera amateeka, akuuma obwomibwe;
neye oyo iye aganyoomoola, wʼokufa.
17 Oyo iye akwatira omudoobi ekisa, abba akoopere Musengwa,
era oMusengwa yalimusasula olwʼebisa ebyakolere.
18 Okangavulenge omwanawo, nga wakaali waliwo eisuubi eryʼokumugolola,
kaisi tiwamuleka nʼajigirika.
19 Omuntu owʼobusungu omulekanga nʼakaanya ebizwa omu busungubwe;
singa omununula, walibba nʼokukikola omulundi ogundi.
20 Owulisisyenge ebibakulaabbira, era oikiriryenge okukulungamya,
era egibwiza walibba mulabuki.
21 Entegeka nyingi egibba omu mwoyo gwʼomuntu,
neye oMusengwa ebyataka, niibyo ebituukirira.
22 Ekitakisya omuntu iye kubba nʼokutaka okutakoma;
era omudoobi akiraku omubbeyi.
23 Okutya oMusengwa kukutwala mu bwomi;
era oyo ali nakwo abba mumatiri, era mpaawo kabbikabbi akamutuukaku.
24 Omugayaali akozya ekimegero omu bbakuli,
ni kimukaya nʼokukitwala oku munwa!
25 Okangavule omunyoomi, era omuntu omubisi yasunamu ekyokwega;
owoolaabbira omutegeeri, yeeyongera okutegeera.
26 Oyo iye agadya oiteeye, nʼabbinga omaaye omu kisito,
abba mwana aswaza era azumisya.
27 Mwana wange, singa olekeraawo okuwulisisya okulungamya,
ocaama okuzwa oku bibono ebyʼamalabuki.
28 Omujulizi owʼobubbeyi, anyooma obwenkanya,
nʼababbibabbi, okutumula ekibbikibbi kibanyumira.
29 Bateekawo ebibonerezo kukangavula banyoomi,
era emigongo gyʼabasirusiru gisaanira makubbe.