20
1 Enviinyo gisindiikirirya, nʼebiteemeerya birwanisya;
abo abebicaamya, banambula malabuki.
2 Obulwa bwa kabaka, butiisya ooti kululuma kwa mpologoma;
oyo iye amusunguwalya, yeita yenkani.
3 Omuntu eyeewala enyombo asuna ekitiisya,
neye nabuli musirusiru ataka ino kwomba.
4 Omugayaali talimira omu biseera ebituuce,
omu kiseera kyʼamakungula yalikayaku ekyokukungula.
5 Ebiseego ebibba omu mwoyo gwʼomuntu biri ooti maizi agali ansi omwiruba eryabiriri,
neye omuntu aali nʼokutegeera abitoolayo.
6 Abantu bangi abeeyeta abali nʼokutaka okutakoma;
neye omuntu omwesigwa naani ayezya okumuzuula?
7 Omutuukirirye atambulira omu bwomi obunambulaku ekyʼokubunenya,
eibyairerye libba lyʼenkabi.
8 Okabaka owaatyama oku ntebeye eyʼobwakabaka okusala emisango,
yeekeenenya nʼazuula ekisa nʼekibbikibbi.
9 Naani ayezya okukoba ati, “Nkuumire omwoyo gwange nga mulongoole;
ndi mutukulye era mbulaku kibbikibbi?”
10 Eminzaani egyʼobubbeyi, nʼebipima ebindi ebitali bituuce,
byombi byʼomuliko eeri oMusengwa.
11 Nʼomwana ebyakola biraga ekyali
ooba ngʼeneebityaye nnongoole, era ntuuce.
12 Amatwi agawulira, nʼamaiso agabona,
byombi oMusengwa niiye eyabikolere.
13 Tiwatakanga ino endoolo, kaisi tiwadooba;
otakenge eino kukola era wasunanga ebyokulya bingi.
14 Omuguli ajerega ngʼagula,
neye owaamala, azwawo ni yeewaana ngʼowakidondoire.
15 Waliwo ezaabbu, nʼamabbaale agʼebbeeyi mangi,
neye entumula eyʼamalabuki eri ooti byamajolobero ebyʼebbeeyi.
16 Otwalenge ekizwalo kyʼoyo akiwaayo ngʼomusingo
okwemerera ogwatamaite, era otwalenge omusingo gwʼoyo ayemerera atali omumanye.
17 Ekyokulya ekyosunire omu bukucaakuca kikuwoomera,
neye oluzwanyuma kikusuukira ooti kyokulya ekirimu amabbaale.
18 Entegeka gibitamu na kusuna kulungamya;
owoobba watanula olutalo, osuneku abakulungamya.
19 Owolugambo, takuuma ebyama;
nʼolwekyo weewalenge abo abeesakabba.
20 Atumula ebisongolye okwiteeye ooba oku maaye,
obwomibwe bwaligotawo ooti itaala eribalikiirye omu ndikiirya ozigizigi.
21 Ebyobusika ebyosuna ngʼekiseera kikaali,
tibibbaamu enkabi oku nkomerero.
22 Tiwakobanga oti, “Nanyaaŋa!”
Olekerenge oMusengwa nʼakulwanirira.
23 Ebipima ebitali bituuce byʼomuliko eeri oMusengwa,
era tasiima eminzaani egitali ntuuce.
24 OMusengwa niiye alungamya obwomi bwaiswe.
Kale omuntu ayezya atya okutegeera obwomibwe e gibulungama?
25 Kubba kwemuma mu mutego okwanguwa okweyama okuwa oKibbumba ekintu,
kaisi nʼokiseegaku ngʼomalire kweyama.
26 Okabaka owʼamalabuki azuula abasobya;
era ababonereza nʼobukambwe.
27 Omwoyo gwʼomuntu, niigwo eitaala oMusengwa eriyamuteekeremu;
limoleka ebyama byʼomunda byonabyona.
28 Okutaka okutakoma nʼobwesigwa, bikuuma okabaka;
okutaka okutakoma kumugumirya oku ntebe.
29 Ekitiisya kyʼabaisuka, maani gaabwe;
nʼekitiisya kyʼabakaire, nvi gyabwe.
30 Emiigo eginoja, gigolola empisa embiibbi;
nʼokuswanyula, kumalamu emize.