21
1 OMusengwa niiye afuga enseega ya kabaka,
agirungamya ooti mukula gwʼamaizi ogwacuusa nʼagulungamya ngʼowaataka.
2 Omuntu ayezya okubona ati eneebityaye yonayona ntuuce,
neye oMusengwa niiye akebera omwoyo gwʼomuntu.
3 Okukola ekituuce era ekyobwenkanya,
oMusengwa kyasiima okukiraku esadaaka.
4 Okwekudumbalya nʼamalala,
itaala lyʼababbibabbi, era ibyo kibbikibbi.
5 Entegeka gyʼomunyiikiiri, dala gimuzweramu okusuna ebingi;
neye mazima nabuli abuguutanira ebintu, kimutuuca mu budoobi.
6 Obusuni obubasuna omu bubbeyi,
bubita-bubiti ooti mwosi era ibwo mutego ogwita.
7 Ababbibabbi obukambwe bwabwe bwalibamalawo,
olwʼokubba bagaana okukola ebyʼobwenkanya.
8 Obwomi bwʼababbibabbi, tibubbaamu obwesimbu;
neye eneebitya yʼabalongoole omu myoyo, ebba ntuuce.
9 Kasinga obba oku nsonda e ngulu oku nyumba,
nandi nʼobba omu nyumba nʼomukali omuyombi.
10 Omubbimubbi yeinira kibbibibbi;
takwatira omuntu yenayena ekisa.
11 Omunyoomi owebamubonereza, omubisi iye ayega;
owʼamalabuki owebamwegesya, yeeyongera okubba owʼamalabuki.
12 OKibbumba amanya ebiri omu nyumba yʼomubbimubbi;
era adyaka ababbibabbi omu kujigirika.
13 Iye oyo aigala amatwige eeri okwekunga kwʼomudoobi,
yena yalikunga nandi bamufaaku.
14 Ekirabo ekibakuwa omu kyama, kiikaikania obusungu,
nʼenguzi eyʼomu mbiso, emalaku ekiruyi.
15 Obwenkanya busangaalya abatuukirirye,
neye abo abakola ebibbibibbi, bubaleetera nsisi.
16 Omuntu acaama okuzwa omu kutegeera,
yeeyaja ngʼali mu bafu.
17 Iye oyo ataka ebyamasanyu, adooba;
oyo iye ataka ebiteemeerya nʼebisava, tiyaligaigawala.
18 Abantu ababbibabbi babba kinunulo kyʼabatuukirirye,
nʼabatali beesigwa babba kinunulo kyʼabalongoole omu mwoyo.
19 Kasinga obba omwidungu,
okukiraku okubba aamo nʼomukali omuyombi, era owʼensire.
20 Ebyobusuni ebyebbeeyi bibba mu nyumba yʼowʼamalabuki,
neye omusirusiru, amalawo ebyali nabyo byonabyona.
21 Iye oyo eyeefudaku okukola ebyʼobutuukirirye era alaga okutaka
asuna obwomi, nʼobutuukirirye nʼekitiisya.
22 Omuntu owʼamalabuki, alumba ekibuga kyʼabo abʼamaani,
nʼamenya olugaga lwakyo olubeesiga.
23 Iye oyo eyeekuuma omu ntumula,
yeeramya emiteewaana.
24 Owʼamalala era eyeekudumbalya, iye munyoomi;
yeebitya mu mpisa egyʼamalala amabitiriri eino.
25 Obwetaavu bwʼomugayaali bumwita,
olwʼokubba tataka okukola.
26 Okumalaku olunaku omubbimubbi yeegomba kubbaaku na byasuna,
neye omutuukirirye agaba na mwoyo gumo.
27 Esadaaka eyʼomubbimubbi yʼomuliko,
okukirawo eino owagireeta nʼekigendererwa ekitali kisa.
28 Omujulizi owʼobubbeyi, yalijigirika,
neye ekibono kyʼowʼamazima kibbeerererawo.
29 Omuntu omubbimubbi, yeekazakaza;
neye omulongoole omu mwoyo, yeekeenenya omu ntambulaye.
30 Mpaawo malabuki nʼokutegeera, waire enseega,
ebyezya okwakanisya oMusengwa ni bimuwangula.
31 Oyezya okutegeka ombalaasi olwʼolutalo,
neye obuwanguli buzwa eeri Musengwa.