22
Ebiramya omuntu nʼebyo ebimwita
1 Kisa okubba nʼeriina erisa okukiraku okubba nʼobusuni obubitiriri;
era abantu okukuwa ekitiisya kikiraku okubba nʼezaabbu ooba efeeza.
2 Omugaiga nʼomudoobi bali nʼekiinu ekibagaita;
bombi oMusengwa niiye eyabakolere.
3 Omuntu omutegeeri abona akabbikabbi, nʼakeewala,
neye omubisi, ayaba-bwabi nʼakagwamu.
4 Obwikaikani nʼokutya oMusengwa,
bireeta obusuni nʼekitiisya, nʼobwomi.
5 Amawa nʼemitego, bibba omu nzira yʼomubbimubbi,
neye iye oyo akuuma obwomibwe, yabyewala.
6 Olungamye omwana omu nzira egyasaaniire okukwata,
nʼoweyalikula tiyaligizwamu.
7 Omugaiga afuga omudoobi,
era iye oyo eyeekoopa, abba mugalama wʼodi amukoopere.
8 Iye oyo asiga obutali bwenkanya, yalikungula miteewaana,
nʼokulumya abainaye omu bukambwebwe, kwaliwaawo.
9 Wʼenkabi iye oyo omugabi,
olwʼokubba agabana ekyokulyakye nʼabadoobi.
10 Owoobbingawo omunyoomi, nʼentalo giwaawo;
era okwomba nʼokuduula bikoma.
11 Iye oyo ataka okubba nʼomwoyo omulongoole nʼokutumula ebibono ebyʼekisa,
asuuka mukaagwa wa kabaka.
12 OMusengwa alabirira abali nʼokutegeera;
neye ajikirica entegeka gyʼabatali beesigwa.
13 Omugayaali akoba ati, “E nza waliyo ompologoma,”
ooba ati, “Banjitira eeyo omu luguudo.”
14 Akalumi kʼomukali omulendi, kiina ekiwanvu;
abo ibo oMusengwa abaasunguwalira, bakigwamu.
15 Obusirusiru bubba omu mwoyo gwʼomwana omutomuto,
neye okumubonereza nʼakaswanyuswanyu, kumubutoolamu.
16 Iye oyo amigirirya omudoobi, okwongera okwegaigawalya,
nʼoyo iye agabira abagaiga ebirabo, bombi balidooba.
Ebibono byʼowʼamalabuki omukugu
17 Otege ekitwikyo owulisisye ebibono byʼowʼamalabuki;
oteekeyo omwoyo, kwebyo ebinkwegesya,
18 olwʼokubba kisangaalisya, okubyebukirya,
nʼobitumulangaku bulijo.
19 Mbikwegesya iwe atyanu
kaisi weesigenge oMusengwa.
20 Nkuwandiikiire engero 30,
egirimu okulaabbira nʼokwega,
21 nga gikwegesya ebibono ebyʼamazima era ebyesigwa,
kaisi oyezye okubba nʼekyokwiramu ekitegerekeka
eeri oyo iye eyakutumire.
22 Tiwamigiriryanga omudoobi olwʼokubba mudoobi
waire okumigirirya omudoobi omu kooti,
23 olwʼokubba oMusengwa yalingira omu nsonga gyabwe,
era nabuli abagadya yena yalimugadya.
24 Tiwasalanga omukago nʼomuntu owʼobusungu,
waire okubba nʼomukumbo nʼoyo owʼensire,
25 odemba nʼoyega emizeegye
nʼopapala omu mutego.
26 Tiwaabbanga moiza kwabo abeeyama,
okusasula ooba okuteekayo omusingo olwʼamabanja gʼomuntu.
27 Owookaya okusasula,
batwala nʼobuliri obwogonaku.
28 Tiwacuusanga ekiroowa ekyʼeira,
abazeizabo ekibakomere.
29 Omuntu omukugu omu byakola,
aweererya omumaiso gʼabakabaka;
tabba akaali aweererya bantu ba bulijo.