23
1 Owootyamanga okulya nʼomukungu,
weegenderezanga ino ekyo ekiri omumaisogo.
2 Weefuganga nʼowoobba
mulyangani.
3 Tolulunkaniranga ebisavaabye,
ayinza okubba ngʼataka kukugezyesya.
4 Olekenge okukalabana ekibitiriire okusuna obugaiga;
obbenge mulabuki nandi weemalamu.
5 Obugaiga oyezya okubbaaku nabwo akaseera katono ni buwaawo,
olwʼokubba mazima bubba ooti bumerere biyaya ni buguluka omwibbanga ooti kokomi.
6 Tiwaalyanga ekyokulya kyʼomuntu omwimi,
waire okululunkanira ebisavaabye;
7 olwʼokubba iye muntu,
asiiba kuseega kubbeeyi yaabyo.
Akoba ati, “Olye era onywe,”
neye ngʼomu mwoyogwe, tali aamo na iwe.
8 Wasesema ebyoliire;
nʼebibono ebyotumwire ebyʼokusiima, ni bikufa busa.
9 Tiwabbanga nʼekyokobera omusirusiru,
olwʼokubba ayaba kunyooma ebyʼamalabuki ebyotumula.
10 Tiwacuusanga ekiroowa ekyʼeira,
waire okunyaga eitakali lyʼabafuubbi,
11 olwʼokubba oMulwaniriri waabwe wʼamaani;
niiye eyaliwozya na iwe omusango gwabwe.
12 Oteekenge omwoyo oku bibakwegesya,
era owulisisyenge ebyʼamalabuki.
13 Tiwalekanga okugolola omwanawo;
owomubityamu akaigo, tikamwita.
14 Omubonereze nʼomwigo,
kaisi olamye obwomibwe okufa.
15 Mwana wange, obwobba owʼamalabuki,
awo omwoyo gwange gusangaala;
16 omwoyo gwange gusangaala,
owootumula ebyʼamalabuki.
17 Tiwakwatiranga abakola ebikole ebibbibibbi engongi,
neye bulijo obbenge nʼeiganyi lyʼokutya oMusengwa.
18 Mazima dala waabbanga nʼeisuubi omu biseera ebyʼomumaiso,
nʼeisuubiryo tiryalikoma.
19 Mwana wange owulisisye, kaisi obbe wʼamalabuki,
era okuumirenge omwoyogwo omu nzira entuuce.
20 Tiwakolanga omukumbo nʼabakajuuli,
waire abo abeevuunya enyama,
21 olwʼokubba abateemeere nʼabaluvu, badooba,
ni batuuka nʼokuzwala ebisensemuki.
22 Owulisisyenge oiteewo eyakubyaire;
era tiwanyoomanga omaawo ngʼakairiire.
23 Ogulenge amazima neye tiwagatundanga;
osunenge amalabuki, nʼokukulungamya nʼobutegeeri.
24 Oiteeye wʼomuntu omutuukirirye, yasangaalanga ino;
nʼoyo ali nʼomwana owʼamalabuki, yamwenyumirizangamu.
25 Osangaalisyenge oiteewo nʼomaawo,
omukali eyakubyaire ajaagaanenge.
Omukali omutegeeri
26 Mwana wange, oteekenge omwoyo oku binkukoba,
era omalirirenge okukwata ebinkola,
27 olwʼokubba omukali omalaaya, kiina ekyabiriri
nʼomukali owʼamaiso amangu mangu, iruba eridiiŋi.
28 Akugonerera ooti mutemo,
era ayongeraku obungi bwʼabasaiza abatali beesigwa.
29 Naani alabire? Naani omunakuwali?
Naani ali nʼenyombo? Naani eyeemuluguunya?
Naani ali nʼembaale egyʼobwereere? Naani atukulikire amaiso?
30 Niiye oyo asiiba oku mwenge;
anywa ebika byʼomwenge ebitali bimo.
31 Tiwalangaasiranga omwenge ogutukulikire,
ogumirimira omu giraasi,
ogwika omu mamiro nʼobuweeweeri.
32 Oku nkomerero guboiza ooti mpiri;
era guluma ooti nfulugundu.
33 Amaisogo gabona ebintu ebitategeerekeka,
otandiika okuseega ebintu ebitakwatagana.
34 Walibba ooti amo ogalaamiriire ku maizi aakati ku nyanza,
era ooti muntu eyeebuubira omwibbanga, oku mulongooti.
35 Nʼokoba oti, “Bankubbire kadi kuwuliramu obulumi.
Bankubbire nandi ni nkiwuliramu.
Nalamuka di,
nkangeyo nnoonie ogundi?”