24
1 Tiwakwatiranga ababbibabbi engongi,
era tiweegombanga okwekumba nabo,
2 olwʼokubba baseega byʼobukambwe,
era batumula byʼokukola bugosi.
3 Kyetaagisya amalabuki okwombeka enyumba,
nʼobumanyi okwombeka omusingi gwayo;
4 omu kukolesya amalabuki, ebisenge byayo babiteekamu
ebyomugaso ebyʼebbeeyi, era ebisa.
5 Omuntu owʼamalabuki abba wʼobwezye,
era omuntu omutegeeri yeeyongera amaani;
6 olwʼokubba okulwana olutalo, weetaagisya okukulungamya;
era okuwangula kwetaagisya abawi bʼamalabuki bangi.
7 Ebyʼamalabuki omusirusiru tayezya okubiteegeera;
era adambaku ekyokutumula omu lukumbaana lwʼabantu.
8 Oyo iye ategeka okukola ekibbikibbi,
balimweta mukoli wʼemiteewaana.
9 Entegeka egyʼobusirusiru muzwamu okwonoona;
era omunyoomi, wʼomuliko eeri abantu.
10 Owoonafuwa omu biseera ebyʼebigosi,
dala amaanigo gabba matono.
11 Onunulenge abebaaba okwitira obwereere,
olamyenge abebaaba okwitira obusa.
12 Owookoba oti, “Ekyo tinakimaiteku.”
Oyo abona ekiri omu mwoyogwo takutegeera?
Oyo akuuma obwomibwo takumaite?
Tiyalisasula nabuli muntu okusinzirira oku bikolebye?
13 Mwana wange, olyenge omujenene, olwʼokubba musa;
omujenene ogwʼomu bisasala gukunyuunyuulira.
14 Kale okimanye oti amalabuki gona gatyo niiye obweganyunyuulira obwomibwo;
singa ogasuna, obba kusani egibwiza,
ebyosuubira byalituukirira.
15 Tiwabbanga ooti bantu ababbibabbi abagonerera ekisito kyʼomutuukirirye;
tiwanyaganga ekisitokye.
16 Omuntu omutuukirirye nʼowaagwa emirundi emingi, tete asetuka;
neye omubbimubbi emitegano owegimwizira, gimudyaka nandi nʼairiryamu.
17 Tiwasangaalanga ngʼomulabewo atuukire omu kabbikabbi;
era tiwajaagaananga nga yeesiitaire nʼagwa,
18 olwʼokubba oMusengwa tasiima owaabona ngʼokolere otyo,
era alekeraawo okumusunguwalira.
19 Tiwaabbanga nʼensaalwa olwʼabo abakola ebibbibibbi,
waire okugongera olwʼabo ababbibabbi,
20 olwʼokubba akola ebibbibibbi abula isuubi lyʼomumaiso,
era tabbaamu eisuubi ooti itaala eririkira.
21 Mwana wange, owenge oMusengwa ekitiisya nʼokabaka;
era tiweeyimbyanga nʼabo abajeemu,
22 olwʼokubba ebigosi byalibagwerenkerera,
era mpaawo amaite obwebyalyenkana.
Emboozi egindi egyʼamalabuki
23 Era na binu abo abʼamalabuki babitumwire:
Okumomola tikusa ngʼolamula abantu.
24 Oyo iye akoba aliku omusango ati, “Obulaku omusango”
abantu bamutumulangaku bundi, era amawanga gamuzumiriranga.
25 Neye abo abalumiriza omusobya, byabaabiranga nakusani,
era babbanga nʼenkabi mpitiriri.
26 Okwiramu ekyʼamazima,
kiraga mukago ogunanyerenyeere.
27 Osooke otegeke nakusani emirimogyo egyʼe nza,
oteereerye nakusani omusirigwo,
kaisi weeyombekere enyumba.
28 Tiwalumirizanga omwinawo anambula nsonga entuuce,
era tiwatumulanga ebyʼobubbeyi.
29 Tiwakobanga oti, “Ekyankolere zena nalikimukola;
nalisasula omuntu oyo ekiyankolere.”
30 Nabitire omu musiri gwʼomugayaali,
ni mbita omu musiri ogwʼemizabbibbu ogwʼomuntu onambula okutegeera;
31 amawa nga gaziringaniremu mwonamwona,
nga gupuucirye,
nʼolukita lwagwo olwʼamabbaale nga lugwire.
32 Nakiringiriire ni nkiseegaku ino,
ni mbaaku ekinjega nti:
33 Okugonaku katono, nʼowungulyaku akatono,
nʼoleraku engalo owuumuleku akatono,
34 obudoobi bwalikulumba ooti mutemo
nʼobwetaavu ooti mukondo aali nʼekyokulwanisya.