25
Engero egindi egya Sulemaani
1 Ginu gyona ngero gya Sulemaani, abasaiza ba Keezeekiya okabaka wa Buyudaaya egibakoopoloire.
2 Tuwa oKibbumba ekitiisya olwʼebyo ebiyeebisiire;
neye tuwa okabaka ekitiisya olwa iye okunonenkereryanga ensonga.
3 Enseega ya kabaka tinyangu okugimanya;
tetuukikaku ngʼeigulu oweriri e yala era ngʼowaabiriri okwika ansi wʼekyalo owebuli.
4 Otoolemu ebicaafu omu feeza,
kaisi omuyeesi akuyeeseremu ekyomugaso.
5 Otoolewo ababbibabbi omumaiso ga kabaka,
kaisi obufugibwe bwemererewo omu butuukirirye.
6 Tiweekulyanga omumaiso ga kabaka,
era tiweeteekanga omu kifo kyʼabakulu.
7 Kibba kisa okukweta bati, “Osembere eenu,”
okukiraku owebakuswazira omumaiso gʼomukungu ni bakuteeka omu kifo ekisembayo okubba ekyʼekitiisya.
Amaisogo ebigabba gaboine,
8 tiwayanguyanga okubitwala omu bʼobwezye,
olwʼokubba walikola otya oluzwanyuma
omwinawo oweyalikuswaza?
9 Owoobbanga nʼensonga nʼomwinawo, musyanianga,
nandi nʼobiikula ekyama ekyo eeri abandi,
10 demba oyo akiwulira nʼakuswaza,
nʼosigala nʼeriina eribbiribbi.
11 Ekibono ekisa ekibatumula omu kaseera akatuuce,
kisangaalya ooti kifaananyi kyʼomupeera ekibakolere omu zaabbu ni bakiteeka omu kibya ekyʼefeeza.
12 Owʼamalabuki ebyalaabbira omuntu awulisisya,
biri ooti mpeta eyʼezaabbu eyʼoku matwi, ooba ebyʼamajolobero ebyʼezaabbu ennongoole.
13 Omukwenda omwesigwa, awuumulya emyoyo gyʼabamutumire,
ngʼamaizi agʼokunywa amawolondoki owegaweeweerya abaganywa
omu biseera ebyʼeisana.
14 Oyo asuubizire ebirabo nandi nʼagaba,
abba ooti bireri nʼompunga ebitaleeta oikendi.
15 Okuguminkiriza, kwikirizisya omufugi;
nʼolulumi olwʼeiwooyo, lugondya owʼobwezye.
16 Obwoyajirya omujenene, olyenge ogukumala-bumali,
tiwagubitiriryanga nʼogusesema.
17 Tiwasooseranga e wʼomwinawo,
kaisi tiyakwesinya nʼakucaawa.
18 Omuntu asibirirya oku mwinaye
wʼakabbikabbi ngʼomboote nʼempiima, ooba ngʼakalaso akoogi.
19 Okwesiga omuntu atali mwesigwa omu biseera ebyʼebigosi,
kuli ooti kwesiga liino erirwaire ooba ekigere ekireme.
20 Okwembera omuntu ali omu nima,
kubba ooti kweyambulyamu bizwalo mu biseera byʼempewo,
ooba kuteeka cumbi mwibbwa.
21 Omulabewo owaabbanga enzala, omuwanga ebyokulya nʼalya;
era owaabbanga enyonta, omuwanga amaizi nʼanywa.
22 Obwokola ootyo, walibba ooti omubbiirirye makala gʼomusyo oku mutwe;
era oMusengwa yalikuwa empeera.
23 Okugeya kuleeta obusungu,
ngʼompunga owʼe mambuka owaaleeta oikendi.
24 Kasinga obba oku nsonda e ngulu oku nyumba,
nandi nʼobba omu nyumba nʼomukali omuyombi.
25 Okuwulira amawuliro amasa agazwa omu kyalo ekyʼe yala,
kuli ngʼamaizi amawolondoki owegakola ngʼoli nyonta.
26 Omutuukirirye eyeerirania omubbimubbi,
abba ooti iruba erisetwire eitoosi, ooba onsulo wʼamaizi ogubabebenyere.
27 Ngʼobwekitali kisa okulya omujenene omungi,
era kityo bwekitali kisa omuntu okwenoonerya ekitiisya iye onanyere.
28 Omuntu atayezya okwefuga,
ali ooti kibuga ekibaingiririire ni bakireka nga mpaaku kikomera.