26
1 Ngʼobuwolondoki owebutatuukana okweisana, ooba ngʼoikendi owaatatuukana omu makungula,
kityo ekitiisya wekitatuukana omusirusiru.
2 Ngʼontaaye ooba onamusiisi owaasiiba aguluka,
bityo nʼebiraami ebitatuukana bwebitakwata.
3 Ngʼombalaasi owebali nʼokumufaamuula, nʼompunda owebali nʼokumusiba mutwe,
nʼomugongo gwʼomusirusiru weguli na kukaanya miigo.
4 Toirangamu omusirusiru ngʼobusirusirubwe owebuli,
kaisi tiwaabba ooti niiye.
5 Oirangamu omusirusiru ngʼobusirusirubwe owebuli,
kaisi tiyeebona okubba mulabuki.
6 Atuma omusirusiru okutwala obukwenda,
abba ooti yeetemereku bigere, era yeereetera mitewaana.
7 Ngʼebigere byʼomuleme ebiregeya owebitagasa,
nʼolugero omusirusiru olwatumula werubba.
8 Ngʼowekitagasa okusibira eibbaale omu nvuumuulo,
kityo wekibba nʼokuwa omusirusiru ekitiisya.
9 Omusirusiru okukolesya olugero,
kibba ooti muteemeere kweyokola iwa mu ngaloye.
10 Ngʼowekiri kyʼobusirusiru omulasi wʼakalaso okulasa nabuli gwabona,
kityo wekibba nʼokuwa omusirusiru ooba omubiti wʼenzira ekipakasi.
11 Ngʼombwa owacuukira okulya ebisesemobye,
atyo nʼomusirusiru wairairamu ebyʼobusirusirubye.
12 Obona omuntu eyeeyeta okubba owʼamalabuki?
Wabbaawo eisuubi eeri omusirusiru, okukiraku omuntu oyo.
13 Omugayaali akoba ati, “E nza waliyo ompologoma,
timpezya okuzwa omu nyumba okwaba okukola emirimo.”
14 Ngʼolwigi owerwecuusira oku pata gyalwo,
nʼomugayaali atyo weyeecuusira oku buliribwe.
15 Omugayaali akozya ekimegero omu bbakuli,
ni kimukaya nʼokukitwala oku munwa.
16 Omugayaali omu kubonakwe, yeeyeta wʼamalabuki okukiraku abantu omusanvu
abayezya omu ngeri eyʼamalabuki okuteereerya ensonga.
17 Omuntu abitawo ni yeeyingirya omu mpaka egitamukwataku,
abba ooti muntu akwata oku matwi gʼombwa ogwatamaite.
18 Ngʼowekiri kyʼobugwairalu okukasuka omuntu
ekisiki kyʼomusyo, ooba obulaso obwakabbikabbi,
19 kityo wekibba nʼomuntu abbeya omwinaye,
kaisi nʼakoba ati, “Mbaire nsaaga-busaagi.”
20 Enkwi owegiwaawo omusyo gulikira,
kityo nʼowolugambo owaagotawo, oyombo akoma.
21 Ngʼobunyoota wʼomusyo owebukola oku manda, era ngʼomusyo owegukola oku nkwi,
nʼomutongani atyo kyakola oku luyombo.
22 Ebibono byʼomugeyi biwooma ino,
bingira omuntu ni bimugwa oku mwoyo.
23 Ebibono ebisa ebibiika oku mwoyo omubbimubbi,
biri ooti feeza egibasiigire oku kintu ekibabbumbire omwitakali.
24 Omuntu omunanfunsi abisa obucaawi
ngʼakolesya ebibono ebiwaana.
25 Waire ngʼentumulaye yʼekisa, tiwamwikiririryangamu,
olwʼokubba omwoyogwe gubba gwizwire bucaawi.
26 Obucaawibwe ayinza okububiikaku nʼobubbeyi,
neye ebibbibibbibye, byalibbutuka omu lwatu.
27 Nabuli akuula ekiina, onanyere akigwamu
nʼoyo airingitya ogubbaale, gwalimwira ku niiye onanyere.
28 Omubbeyi acaawa abo abaabba abbeyere
nʼebibono ebiwaanawaana, bijigirica.