27
1 Tiweewaananga olwʼebyabbaawo eizo,
olwʼokubba tomanya ekyabbaawo.
2 Oleke ogondi akusisiije, neye nga tiniiwe onanyere;
abbe muntu gondi neye nga tiniiwe onanyere.
3 Eibbaale nʼomusenye bizitowa,
neye emitegano omusirusiru egyaleeta, gibikiraku byombi obuzito.
4 Obukambwe ibwo buŋeŋese, era obusungu bubitiriri omu bubbibubbi;
neye engongi tete igyo gyʼakabbikabbi ino.
5 Akukobera ekisobyokyo omu lwatu
akiraku akutaka omu mbiso.
6 Oyezya okwesiga okunenya kwʼomukaagwawo,
neye omulabewo okukugwanga omu kifubba bubba bubbeyi.
7 Omuntu omwikuti agaana omujenene,
neye enzala ogweruma nʼekirulu kibba kinyunyuula.
8 Omuntu apaala okuzwa omu kisitokye,
abba ooti nyonyi apaala okuzwa oku kisaasirirokye.
9 Okulaabbira kwʼowʼomukago akulumirwa,
kusangaalya omwoyo ooti byakalifuwa nʼebyakaloosa ebibeesiiga.
10 Tiwalekangawo omukaagwawo, waire omukaagwa wa iteewo.
Tiwairukiranga egiri omugandawo ngʼosunire ekigosi.
Omuliraanwawo akuli okumpi akira omugandawo aali e yala.
11 Mwana wange, obbenge wʼamalabuki, kaisi osangaalyenge omwoyo gwange;
kaisi mbenge nʼekyokwiramu nabuli ansosonkererya.
12 Omuntu omutegeeri abona akabbikabbi, nʼakeewala;
neye omubisi, ayaba-bwabi nʼakagwamu.
13 Otwalenge ekizwalo kyʼoyo akiwaayo ngʼomusingo
okwemerera ogwatamaite, era otwalenge omusingo gwʼoyo ayemerera omukali omulendi.
14 Owoosugirya omuliranwawo amaaminkirira amakeezikeezi,
bakibala ngʼekiraami.
15 Omukali omuyombi,
ali ooti ikendi owʼomucekenco;
16 okumusirica kibba kigosi ino ooti kusirica mpunga,
ooba ooti kuwumbira amafuta omu ngalo.
17 Ngʼekyoma owekyagalya ekyoma,
atyo nʼomuntu waayagalya omuntu omwinaye.
18 Oyo iye alabirira omusaale omutiini, yaalyanga oku bineneka byagwo,
nʼoyo aweererya omusengwawe, yasunanga ekitiisya.
19 Ngʼomuntu oweyeebona ngʼalingiriire omu maizi,
nʼomwoyogwe gutyo wegulaga ekyali.
20 Ngʼokufa nʼe magombe owebitaikuta abafu,
nʼamaiso gʼabantu, wegatademba okubona.
21 Ekikoomi kikenenula feeza na zaabbu,
neye omuntu bamugezesya na kumuwuuja.
22 Nʼowoodundira omusirusiru omu kuwuulo
ooti baduunda kyokulya kyʼempeke,
tomutoolamu obusirubwe.
23 Omanyenge nakusani embeera yʼebyayobyo,
ofengeyo ino oku kisibokyo,
24 olwʼokubba obusuni tibubbeerererawo emirembe gyonagyona,
nʼengule yʼobufugi, tebba yensikirano emirembe gyonagyona.
25 Eisubi lyʼebyayo owebalisala lisewuka,
nʼeryʼoku nsozi balisala era ni balikumbaania,
26 entaama ni gikuwa ebyoya nʼokolamu ebizwalo,
nʼotunda embuli ni weegulira amatakali.
27 Wasunanga amata gʼembuli agakumala,
iwe, nʼabʼomu kisitokyo, nʼabagalamabo abakali.