28
Okwikirirya aMagambi
1 Ababbibabbi bairuka nga mpaawo abalukutya;
neye abatuukirirye babba bagumu ooti mpologoma.
2 Eigwanga eribbaamu entalo libba nʼabafugi bangi;
neye owerisuna omufugi owʼamalabuki era omutegeeri, litebenkera.
3 Omufugi oyo agadya abadoobi,
abba ooti ikendi owa mpunga ajikirica ebirime byonabyona.
4 Abo ibo abagaana amateeka ga Musengwa bawagira ababbibabbi;
neye abo ibo abagakwata, babaakanisya.
5 Abantu ababbibabbi, tibategeera obwenkanya;
neye abagondera oMusengwa, babutegeera nakusani.
6 Kasinga obba omudoobi ngʼotambulira mu bwomi obunambulaku ekyokubunenya,
okukiraku okubba omusuni akola ebibbibibbi.
7 Omwana akwata amateeka, abba wʼamalabuki;
neye aabba nʼomukumbo nʼabalulunkani, aswaza oiteeye.
8 Eyeegaigawalya ngʼaseera asune amagoba,
obugaigabwe abukumbaanirya yooyo akwatira abadoobi ekisa.
9 Agaana okukwata amateeka ga Kibbumba,
nʼokusabakwe oKibbumba akwenyinyalya.
10 Oyo iye agotesya omuntu omulongoole omu omwoyo nʼamutwala omu nzira embiibbi,
yaligwa omu mutegogwe iye onanyere,
neye abanambulaku ekyokubanenya balisuna ebisa.
11 Omugaiga ayinza okwebona ati wʼamalabuki,
neye omudoobi aali nʼokutegeera amubityamu amaiso.
12 Abatuukirirye owebaiza omu bwezye, wabbaawo okujaagaana kubitiriri;
neye ababbibabbi owebaniina oku bukulu, abantu beebisa.
13 Oyo iye abisabisa ebibbibibbibye tasuna enkabi,
neye nabuli abibbutula nʼabyenenya, bamukwatira ekisa.
14 Wʼenkabi oyo iye atya oMusengwa bulijo,
neye oyo iye akakanyalya omwoyogwe, agwa omu mitawaana.
15 Ngʼompologoma owaaluluma ooba odubu oweyeetala,
nʼomufugi omubbimubbi afuga abanambulaku obubbeeri, atyo waabba.
16 Omufugi atakobekwaku, abba mukambwe
neye oyo iye acaawa ebyaguzu, yawangaalanga.
17 Omuntu abbenga omusango gwʼobwiti,
yagadanga nagwo paka kufa;
tiwaabbangawo omuntu amubbeera.
18 Oyo iye atambulira omu bwomi obunambulaku ekyokubunenya abba nakusani,
neye atali mwesigwa okujigirika kwalimugwerenkerera.
19 Oyo iye alima eitakalirye, yaabbanga nʼebyokulya bingi;
neye anoonia ebitagasa, yadoobanga ino.
20 Omuntu omwesigwa, yalisuna ino enkabi;
neye abuguutanira okugaigawala, tiyaliwunuka okumubonereza.
21 Okumomola kubbikubbi,
ate ngʼabantu bakola ensobi olwʼekyokulya.
22 Omukodo abuguutanira okugaigawala,
nga tamaite ati obudoobi bumukuumiriire.
23 Oyo iye agolola omwinaye olwʼensobi, oluzwanyuma yalibba mukoda
okukiraku oyo iye ali nʼolulimi oluwaanawaana.
24 Oyo iye akoba ati
timusango okwibba oiteeye oba omaaye,
abba afaanana nʼoyo ajigirica.
25 Omululunkani asiikuula enyombo;
neye eyeesiga oMusengwa, yaabbanga nʼenkabi.
26 Eyeesiga ebiseegobye, abba musirusiru;
neye oyo iye asengererya ebyʼamalabuki, abba nakusani.
27 Oyo iye agabira abadoobi, tiyadabbenge ekiyeetaaga,
neye oyo iye atabafaaku yasunanga ebiraami bingi.
28 Ababbibabbi owebaniina oku bukulu, abantu beebisa;
neye owebabatoolaku, abatuukirirye beyongera okwala.