29
Obufugi obusa
1 Omuntu ogubanenya emirundi emingi nʼagaanira omu nsobi,
mu kaseera-buseera balimunialula amantalama.
2 Abatuukirirye owebafuga, abantu bajaagaana;
neye ababbibabbi owebafuga, abantu bakunga.
3 Eyeinira amalabuki, asangaalya oiteeye,
neye oyo asiiba mu bamalaaya, ayonoona bibye.
4 Okabaka owaafuga nʼobwenkanya, aleetera ekyalokye okutebenkera;
neye oyo iye alulunkanira enguzi akyonoona.
5 Omuntu awaanawaana omwinaye,
abba yeetega lutuula.
6 Omubbimubbi bamukwatira mu nsobigye,
neye omutuukirirye, ayemba nʼajaagaana.
7 Abatuukirirye bafaayo oku badoobi okusuna obwenkanya,
neye ababbibabbi ekyo tibakifaaku.
8 Abanyoomi batabangula ekibuga;
neye abantu abategeeri baikaikania obusungu.
9 Omuntu owʼamalabuki owaayakana nʼomusirusiru,
omusirusiru asunguwala nʼamusekerera nandi wabbaawo eidembe.
10 Abaiti bakyawa omuntu omwesimbu
era banoonia okwita abalongoole omu myoyo.
11 Omusirusiru alaga obusungubwe bwonabwona,
neye owʼamalabuki yeefuga.
12 Omufugi owaawulisisya ebyobubbeyi,
abakungube bonabona babba babbibabbi.
13 Omudoobi, nʼomujolongi, bali nʼekibagaita:
Bombi oMusengwa niiye abawa ekitangaala ni babona.
14 Okabaka owaasala emisango egyʼabadoobi omu bwenkanya,
entebe eyʼobufugibwe ebbeerererawo emirembe gyonagyona.
15 Okukangavula nʼomwigo nʼokunenya, bireeta amalabuki;
neye omwana ogubaleka obuleki, aswaza omaaye.
16 Ababbibabbi owebeeyongera, nʼokubbenga kweyongera;
neye abatuukirirye balibbaawo ni babona okusebengerera kwʼababbibabbi.
17 Okangavulenge omwanawo, yakweyagalisyanga,
era yakuwuumulyanga omwoyo.
18 Anambula okubiikula kwa Kibbumba, abantu bagootaana;
neye wʼenkabi oyo iye akwata amateeka.
19 Omugalama tibamukangavula na bibono-bubono,
olwʼokubba nʼowaategeera, tateekaku mwoyo.
20 Wabbaawo eisuubi eeri omusirusiru,
okukiraku eeri omuntu oyo agwangalikana nʼebibono.
21 Aginia omuweereryawe okuzwa nga mutomuto,
oluzwanyuma yalimuleetaku eifuge.
22 Omuntu owʼobusungu, atanula enyombo;
nʼowʼekiruyi, agwa omu nsobi nyingi.
23 Okwekudumbalya kwʼomuntu, kwalimwica;
neye eyeedembula omu mwoyo, bamuwa ekitiisya.
24 Aabba omu mukumbo nʼomwibbi, acaawa obwomibwe;
nʼowebamulayirisya, tabbutula amazima.
25 Okutya abantu mutego gwʼakabbikabbi;
neye eyeesiga oMusengwa, abba nʼeidembe.
26 Bangi abanooonia obukoda omu bakulu;
neye obwenkanya buzwa eeri Musengwa.
27 Omubbimubbi wʼomuliko eeri omutuukirirye,
nʼomutuukirirye wʼomuliko eeri omubbimubbi.