4
Oiteeye wʼabaana ebyalaabbira abaanabe
1 Baana bange, muwulisisye oiteewanywe ebyabeegesya.
Muteekeyo omwoyo, kaisi mubbe bategeeri,
2 olwʼokubba ebimbeegesya bisa,
kale timwalekanga ebimbasomesya.
3 Owenabbaire nga ndi mwisuka,
nga ndi mutomuto, era nga ndi mwana moiza oku mama,
4 obbaabba yanjegesyanga ati,
“Oteekenge ebinkukoba oku mwoyogwo.
Ogonderenge ebinkulagira, kaisi obbengewo mwomi.
5 Osune amalabuki, osune okutegeera.
Tiweerabiranga ebibono byange waire okubizwaku.
6 Tiwalekesulanga amalabuki, era gakukuumanga;
ogatakenge, era gakulabiriranga.
7 Amalabuki, niigo agakirira nakimo obukulu, nʼolwekyo osune amalabuki.
Omu bintu byonabyona, kikulu okubba mutegeeri.
8 Otwale amalabuki ngʼekintu ekikulu, galikusuuca mukulu;
wageekwateku, galikuweesya ekitiisya.
9 Galikutiikira engule eyʼobukoda,
engule eyalikuweesya ekitiisya.”
Okulaabbira omwana
10 Owulisisye mwana wange, otwale ebinkukoba,
kaisi owangaale emyanka emingi.
11 Nkwegesya kubba mulabuki,
era nkulungamya mu nzira entuuce.
12 Owewatambulanga tiwaabbengewo ekikutigalira,
owewairukanga tiweesiitaalenge.
13 Ebyoyegere obikwatenge, tiwabirekanga,
obikuumenge, olwʼokubba niibyo obwomibwo.
14 Tiwakwatanga enzira yʼababbibabbi,
ooba okutambuliranga omu nzira yʼabakola ebibbibibbi.
15 Wagyesambenge, tiwagitambulirangamu.
Wagyewalenge, okwatenge iyo nʼoyaba,
16 olwʼokubba tibagona okutoolaku nga bamalire okukola ekibbikibbi.
Tibatoola ondoolo, paka nga waliwo ogubatuuciryeku akabbikabbi.
17 Okukola ebibbibibbi kibanyumira ooti kyokulya
era ebikole byʼobukambwe, bibanyumira ooti kyokunywa.
18 Enzira eyʼabatuukirirye, ebba ooti isana erizwayo,
ni lyaba nga lyeyongera okwaka paka musana perekete.
19 Neye enzira yʼababbibabbi eri ooti ndikiirya ekwaite zigizigi,
tibabona ekibaleetera okwesiitaala.
20 Mwana wange, owulisisye ebibono byange,
otege ekitwi eeri ebintumula.
21 Tiwaganyanga ni bikuzwaku,
obikuumirenge omu mwoyogwo,
22 olwʼokubba abo ababisuna, bibaleetera obwomi,
era biramya omuntu omubirigwe gwonagwona.
23 Ekikulu omu byonabyona, weegenderezenge ino ebyoseega,
olwʼokubba niibyo ebifuga obwomibwo.
24 Tiwatumulanga ebyakalebule,
weewalenge okutumula ebyotamaiteku omutwe nʼebigere.
25 Oleke amaisogo galingirirenge buterembereri e gyoyaba,
olingirirenge nakimo mumaiso e gyoyaba.
26 Weekeenenyenge omu ntegeka yʼebyokola,
kaisi ebyokola byonabyona bikwabirenge nakusani.
27 Tiwaazwanga omu nzira entuuce.
Weewalenge ebibbibibbi.