3
Okwesiga oMusengwa nʼomwoyo gwonagwona
1 Mwana wange, tiweerabiranga ebinkwegesya,
ogonderenge ebiragiro byange,
2 awo wawangaala emyanka mingi,
era byakuleetera eidembe.
3 Tiwaazwanga oku mazima nʼoku bwesigwa.
Tiwabirekanga, byeragenge ooti kizwalo ekyʼomu mamiro ekyozwaire,
obikuumirenge omu mwoyogwo.
4 Awo waabbanga mukoda era mutake,
eeri oKibbumba nʼeeri abantu.
5 Weesigenge Musengwa nʼomwoyogwo gwonagwona,
tiweesiganga kutegeerakwo.
6 Oyebukiryenge oMusengwa mu byonabyona ebyokola,
awo yakulaganga ekyosaaniire okukola.
7 Tiweebonanga okubba owʼamalabuki.
Otyenge Musengwa, era weewalenge ekibbikibbi.
8 Ekyo kyakuzwerangaku omubirigwo ni gubba mwomi,
era amagumbago ni gabba masa.
9 Owenge oMusengwa ekitiisya ngʼomutonera oku byobusunibwo,
owengeyo ebirime ebyekereri oku byʼokungula byonabyona;
10 awo ebideerobyo byaizulanga du,
ebikunyirobyo byaizulanga enviinyo empyo.
11 Mwana wange, tonyoomanga okugolola kwa Musengwa,
tiweesinyanga okunenyakwe,
12 olwʼokubba oMusengwa agolola ogwataka,
ngʼomubyaire owaagolola omwanawe ogwataka.
13 Wʼenkabi iye oyo asuna amalabuki,
wʼenkabi iye oyo asuna okutegeera,
14 olwʼokubba amalabuki gʼomugaso okukiraku efeeza,
era gʼamagoba okukiraku ezaabbu.
15 Amalabuki gʼomugaso okukiraku amabbaale agʼebbeeyi;
era mpaawo ekiweegomba ekyoyezya okugageraageraniaku.
16 Amalabuki gakuwa okuwangaala,
ni gakuwa nʼobusuni nʼekitiisya.
17 Amalabuki gakuwa obwomi obwesiimisya,
gakuleetera eidembe.
18 Amalabuki musaale gwʼobwomi eeri abo abagatwala;
abagagumiraku basuna enkabi.
19 OMusengwa ngʼakolesya amalabuki yakolere ekyalo nʼakigumirya oku musingi,
era yateekerewo eigulu ngʼakolesya kutegeera.
20 Amalabukige, gabindigwirye ensulo gyʼamaizi,
era gatoonyesya oikendi okuzwa omu bireri.
21 Mwana wange, weekwatenge oku malabuki nʼokutegeera;
tiwabiganyanga ni bikuzwaku.
22 Byalikuwa obwomi,
byalikuwoomesya ooti ijolobero eryʼomu mamiro.
23 Awo watambulanga nakusani omu lugendolwo,
era ebigerebyo tibyesiitaalenge.
24 Owewalambaalanga, tiwatyenge.
Owewalambaalanga wagonanga endoolo ni gikuwoomera.
25 Tiwaatyenge akabbikabbi okukugwerenkerera,
waire okujigirika okwizira ababbibabbi,
26 olwʼokubba oMusengwa yakukuumanga,
tiyakulekenge okugwa omu mutego.
27 Nabuli owoobba oyezya,
tiwaimanga obubbeeri abantu ababusaanira.
28 Tiwakobanga omwinawo oti,
“Oyabe, waira eizo ni nkuwa,”
ate ngʼekiyeetaaga oli nakyo esaawa eyo.
29 Tiwategekanga okukola omwinawo akabbikabbi,
oyo atyama okumpi na iwe era nga yakwesiga.
30 Tiwavunaananga omuntu anambula nsonga,
nga mpaawo kabbikabbi akakukolere.
31 Tiwakwatiranga engongi oyo asuna ebintu ebyobukukumpanya,
era tosalangawo okukola nga iye obwakola,
32 olwʼokubba oMusengwa acaawa abo abacaama ni bazwa omu nzira entuuce,
neye abba mukaagwa wʼabalongoole omu myoyo.
33 Ekiraami kya Musengwa kibba oku maka gʼababbibabbi,
neye agʼabatuukirirye agawa enkabi.
34 OMusengwa ajerega abatala abainaabwe,
neye abawombeeki abakwatira ekisa.
35 Abʼamalabuki balibba bʼekitiisya,
neye abasirusiru baliswala-buswali.