2
Ebisa ebizwa omu malabuki
1 Mwana wange, singa wakwatanga ebibono byange,
era nandi weerabira ebiragiro byange;
2 nʼotega ekitwi eeri amalabuki,
nʼoteekayo omwoyo eeri okutegeera;
3 dala singa wasabanga okusuna okumanya,
era ni weegairira bakuwe okutegeera;
4 owewanoonianga amalabuki ooti onoonia feeza,
era ooti onoonia byobusuni ebibabisire,
5 awo walitegeera okutya oMusengwa,
era walizuula okumanya oKibbumba,
6 olwʼokubba oMusengwa niiye agaba amalabuki,
okumanya nʼokutegeera bizwa giri niiye.
7 Awa obutegeeri abalongoole omu myoyo,
Iye ngabo eeri abo abatambulira omu bwomi obunambulaku ekyʼokubunenya,
8 akuuma abakola ebyʼobwenkanya,
era alabirira abo abamwesiga.
9 Era awo walimanya ebituuce, nʼebyʼobwenkanya
nʼokuteekubbira. Walimanya ebyosaaniire okukola.
10 Walisuuka wʼamalabuki,
era okumanya kwalikusangaalisya.
11 Okusalawo okusa kwakulabiriranga,
okutegeera kwakukuumanga.
12 Amalabuki gakuwunucanga amanzira gʼababbibabbi,
gakulamyanga abo abatumula ebyʼobugwagwa,
13 abo abazwire oku manzira gʼobutuukirirye,
ni baira mu kukolanga bibbibibbi,
14 abasangaalira kukola bibbibibbi,
abanyumirwa byʼobugwagwa.
15 Ibo bantu bʼamanzira amacaamu,
era bakucaakuca omu nkola yaabwe.
16 Amalabuki galikwezyesya okuwunuka omukali omulendi,
okuwunuka omukali oyo owʼamaiso amagumangu nʼebibonobye ebisendasenda.
17 Omukali oyo, aleka oibaaye owʼomu mavuvukage,
ni yeerabira endagaano egiyakolere nʼoKibbumbawe.
18 Kale okwaba omu nyumbaye, kubba kukwata nzira eyaba e magombe,
era enzira eyaba e wuwe, ekutwala mu bafu.
19 Abaingira e wuwe tibaira;
nʼokwira tibaira omu nzira yʼobwomi.
20 Kale otambulirenge mu manzira gʼabantu abasa,
era okwatenge manzira gʼabatuukirirye,
21 olwʼokubba abʼemyoyo emirongoole niibo ababbaawo oku kyalo,
era abanambulaku ekyokubanenya, niibo abakisigalamu.
22 Neye oKibbumba yalitoolawo ababbibabbi oku kyalo,
era abatali beesigwa yalikibatoolamu.