EKITABO KYʼ
EZABBULI
Enyanjula
Ekitabo kyʼeZabbuli niikyo ekitabo kyʼenyembo era ekyʼesaala omu Bbaibbuli. Enyembo ginu nʼesaala ginu abantu abʼenjawulo egibayiiyire okumala ekiseera ekiwanvu, bagikumbaanirye era aBaisirairi ni bagikolesyanga omu kusinza kwabwe, nʼoluzwanyuma egyo egibakumbaanirye ni bagibalira omu Biwandiike eBitukulye.
Enyembo ginu bagiwandiikire ngʼengero, era gyʼengeri nyingi nga mulimu enyembo egyʼokuwuuja nʼokusinza oKibbumba. Mulimu egyʼokusaba oKibbumba okubbeera, nʼokukuuma, nʼokununula abantube. Mulimu nʼenyembo egyʼokwebalya oKibbumba olwʼebisa nʼenkabi ebyatuwa, nʼegyʼokumusaba okubonereza abalabe. Esaala ginu mulimu egyʼomuntu ekinamoiza, tete nʼegyʼeigwanga okutwalirya aamo. Egimo giraga ebyetaago nʼebiseego omuntu ebyabba nabyo oku mwoyo okububwe, nʼegindi gitoolayo ebyetaago nʼebiseego byʼabantu ba Kibbumba bonabona okutwalirya aamo.
EZabbuli ginu nʼoYesu yena onyere yagikoleserye, nʼabawandiiki bʼeNdagaano eMpyaka ni bagijulira. Ekitabo kyʼeZabbuli kyasuukire kitabo ekyʼebbeeyi omu kusinza kwʼekibbula kyʼabasengereri ba Kurisito, okuzwera nakimo oku ntandiika.
Ebiri omu kitabo kinu omu bumpi
Ekitabo 1: Zabbuli (1–41).
Ekitabo 2: Zabbuli (42–72).
Ekitabo 3: Zabbuli (73–89).
Ekitabo 4: Zabbuli (90–106).
Ekitabo 5: Zabbuli (107–150).
EKITABO EKISOOKA
1
(Zab 1–41)
Eisangaalo eryʼamazima
1 Wʼenkabi iye oyo atakolera
oku malabuki gʼababbibabbi
waire okukwata enzira yʼabakola ebikole ebibbibibbi,
waire kukolagana nʼabo abanyooma oMusengwa.
2 Wazira ekimusangaalya kugondera mateeka ga Musengwa.
Era afumintiriza ku mateeka ago omusana nʼobwire.
3 Omuntu oyo ali ooti musaale ogubakomere okumpi nʼomwala gwʼamaizi,
ogubala ebineneka byagwo omu kiseera kyabyo,
era ogutawotoka amakoola.
Omuntu oyo nabuli ekyakola kibitamu.
4 Neye ababbibabbi tibabba batyo,
wazira babba ooti bisusungu
ompunga ebyafuwa ni biduumuuka.
5 Nʼolwekyo ababbibabbi oMusengwa yalibasingisya omusango,
era abakola ebikole ebibbibibbi abo tiyalibabalira oku kibbula kyʼabatuukirirye.
6 Ekyo kityo olwʼokubba oMusengwa alungamya era akuuma abatuukirirye,
neye enzira ababbibabbi egibasengererya ebalungamya mu kujigirika.