10
Esaala yʼoyo ogubagadya
1 Oo Musengwa, lwaki ondi yala?
Lwaki weebisa nga ndi omu biseera byʼebigosi?
2 Ababbibabbi beepanka ni bayiigaania abadoobi.
Aale oleke bapapale omu mitego ibo abananyere egibategere.
3 Ababbibabbi beewaana olwʼebintu ebibbibibbi ebibeinira okukola.
Abalulunkanira okusuna bazumirira oMusengwa era ni bamwegaana.
4 Omubbimubbi yeewaana era tanoonia oMusengwa.
Era omu biseegobye mpaamu Kibbumba.
5 Neye nabuli kyakola kibitamu.
Tategeera ati ekibonerezo kya Kibbumba kimukuumiriire,
era anyooma abalabebe bonabona.
6 Akoba omu mwoyogwe ati, “Mpaawo kabbikabbi akalintuukaku.
Tinalibbaaku omu kugada emirembe gyonagyona.”
7 Ebyatumula biizwire biraami, na bubbeyi na kutiisyatiisya.
Atumula byʼeitima nʼebibono ebibbibibbi.
8 Yeebisa omu byalo,
nʼakuuma okwita abantu abanambulaku omusango.
Akiiya onambulaku obubbeeri.
9 Yeebisirira ooti mpologoma aali nʼekyagonereire omu kigona,
nʼakuuma okukwata onambulaku obubbeeri.
Akwatisya onambulaku obubbeeri era nʼamukulukuusa ngʼali omu lutuulalwe.
10 Ayinga abanambulaku obubbeeri, ni batyompoka.
Abawangula olwʼokubba wʼamaani mabitiriri.
11 Omubbimubbi oyo akoba omu mwoyogwe ati, “OKibbumba yeerabiire,
abbuunireku amaisoge, era tabona ekinkola.”
12 Oo Musengwa osetuke, Kibbumba obonereze omubbimubbi oyo,
neye oyebukirye abebagadya, obabbeere.
13 Lwaki omubbimubbi anyooma oKibbumba? Era nʼakoba omu mwoyogwe ati,
“Tiyambonereze.”
14 Neye iwe, Kibbumba obona ebigosi nʼenima,
era weetegekere okubbeera.
Abo abanambulaku obubbeeri beewaayo giri niiwe,
bulijo niiwe obbeera abafuubbi.
15 Omubbimubbi era akola ebikole ebibbibibbi omumalemu amaani.
Omubonereze olwʼebikole ebibbibibbi ebyakolere,
paka oweyalekereraawo nakimo ebibbibibbibye.
16 OMusengwa iye Kabaka emirembe nʼemirembe.
Era abanamawanga balijigirika ni bawa omu kyalokye.
17 Oo Musengwa, omaite abanambulaku obubbeeri ekibasuubira.
Mazima owulira okukunga kwabwe nʼobairyamu amaani era nʼowulisisya nʼokusaba kwabwe.
18 Olamula omusango gwʼabafuubbi nʼabebajooga ni basinga,
kaisi omuntu-obuntu aleke okubatiisyatiisyanga.