9
Eeri akubbembera abembi. Egibemba okwebukirya okufa kwʼomwana. EZabbuli ya Dawudi.
Okusiima oKibbumba alamula omu bwenkanya
1 Oo Musengwa, nakuwuujanga nʼomwoyo gwange gwonagwona.
Nakoberanga abantu byonabyona ebyewuunyisya ebyokolere.
2 Nasangaalanga era ni njaagaana olwʼebyokolere.
Nayembanga okukuwuuja iwe oKibbumba oNambulaku aMwagaagana.
3 Abalabe bange owebakubona baira e nyuma,
ni bagwa era ni bafa.
4 Ekyo kityo olwʼokubba waingiire omu nsonga gyange,
nʼosinzirira oku ntebeyo eyʼobwakabaka nʼolamula omusango mu bwenkanya.
5 Wakaawukiire abanamawanga, nʼojigirica ababbibabbi,
era tibakaali babeebukirya emirembe nʼemirembe.
6 Abalabe baiswe bawoireirewo nakimo emirembe nʼemirembe.
Ojigiricirye ebibuga byabwe,
era tibakaali babeebukirya.
7 Neye oMusengwa niiye afuga emirembe nʼemirembe,
yateekerewo entebeye eyʼobwakabaka okwalamulira emisango.
8 Era yaliramula ekyalo mu butuukirirye,
yalifuga amawanga gonagona mu bwenkanya.
9 OMusengwa era niiye ekiirukiro kyʼabo abebagadya,
niiye olugaga omu biseera byʼebigosi.
10 Ibo abo abakumaite Musengwa bakwesiga,
olwʼokubba abakunoonia tobalekesula.
11 Mwembe nga muwuuja oMusengwa afuga omu Sayuuni,
mulangirire omu mawanga gonagona ebikolebye ebyʼamaani.
12 Ekyo kityo olwʼokubba oKibbumba Iye anyaaŋa obwiti, ayebukirya abagada,
era tiyeebityaku okukunga kwabwe.
13 Oo Musengwa, obone abalabe bange ngʼowebangadya!
Onkwatire ekisa, era ondamye okufa,
14 kaisi nkuwuujenge
eeri abantu abʼomu Sayuuni,
era nsangaalenge olwʼokunnunula.
15 Abanamawanga bagwire omu kiina ekibakuuliire abandi okugwamu,
bapapaire omu mutego ibo abananyere ogubategere.
16 OMusengwa yeemanyikisya lwʼokulamula mu bwenkanya.
Neye ababbibabbi bapapaire mwebyo, ibo abananyere ebibakolere.
17 Ababbibibbi baika e magombe.
Eyo niiyo enkomerero yʼabo bonabona abagaana oKibbumba.
18 Neye abadamba tiyabalekesulenge enaku gyonagyona.
Osuubi wʼabo abebagadya tiyaawengewo emirembe gyonagyona.
19 Oo Musengwa osetuke, toganya abantu okuwunuka omusango;
olamule abanamawanga.
20 Musengwa, obamumemu entiisya
era bamanye bati bantu-buntu.