102
Esaala yʼomuntu aali omu kabbikabbi.
1 Oo Musengwa, owulire okusaba kwange,
oganye okukunga kwange kutuuke egyoli.
2 Tiwankubbira omugongo
nga ndi omu bugosi.
Ontegere ekitwikyo,
owenkusaba tiwaalwawo okunjiramu.
3 Obwomi bwange buwaawo mangu ooti mwosi,
nʼomubiri gwange gumeigera ooti tanuulu.
4 Ngondagondere ooti isubi eribakubbakubbire ni liwotoka,
nʼomwoyo gubula oku kyokulya.
5 Olwa kuyiima,
nsigaire magumba meereere.
6 Nsigaire denge ooti kiwuugulu ekiri omwidungu,
nsuukire ooti kiwuugulu ekiri omu kinameje.
7 Mbonia obwire okuca, ndi ooti
nyonyi asigaire yenkani oku kisooto kyʼenyumba.
8 Abalabe bange bamalaku olunaku nga banzuma,
abanjerega, bakolesya eriina lyange ngʼekizumi.
9 Eikoke niiryo erisuukire ekyokulya kyange,
ebyokunywa byange byetabulya nʼamaliga.
10 Olwʼekiruyikyo nʼobulwabwo wangingire
nʼondyaka eedi.
11 Obwomi bwange bwa kaseera katono ooti kiiriirye kyeigulo ekigotawo mangu,
era mpotoka ooti isubi.
12 Neye iwe Musengwa, ofuga obwakabakabwo emirembe gyonagyona,
era eitutumolyo lyabbeerererangawo emirembe gyonagyona.
13 Wasetuka nʼokwatira oSayuuni ekisa,
olwʼokubba ekiseera kituukire ekyʼokumusaasira,
ikyo ekiseerakyo ekituuce kituukire iwe okubbeera.
14 Ekyo kityo olwʼokubba abaweereryabo bataka ino oSayuuni,
basaalirwa okubona ngʼajigirikire!
15 Amawanga galitya eriina lya Musengwa,
abakabaka bonabona abʼoku kyalo balitya ekitiisyakye.
16 Ekyo kityo olwʼokubba oMusengwa yalyombeka obuyaaka oSayuuni,
era yalyeragisya omu kitiisyakye.
17 Yaliiramu okusaba kwʼabadoobi,
era tiyalinyooma okwegairira kwabwe.
18 Oleke kinu bakiwandiikire abʼomulembe ogwiza,
kaisi awo kibbe kiti, nʼabebakaali okubyala baliwuuja oMusengwa:
19 Bakiwandiike bati, “OMusengwa yalolere ansi ngʼasinzirira omwigulu omu kifookye ekitukulye,
ngʼasinzirira omwigulu nʼalingirira ekyalo.
20 Nʼawulira okukenyera kwʼabasibe,
nʼateera abebabbaire basaliire ogwʼokufa.”
21 Awo balimanyikisya eriina lya Musengwa omu Sayuuni,
era ni bamuwuuja omu Yerusaalemi,
22 ngʼamawanga nʼobwakabaka
bikumbaanire okusinza oMusengwa.
23 OMusengwa ankendeiryeku amaani nga nkaali muvuvuka,
asalireku emyanka gyange egyʼokuwangaala.
24 Kale ni nkoba nti,
“Oo Kibbumba wange, tiwantoolawo nga nkaali okukairira,
iwe abbeerererawo emirembe gyonagyona.
25 Eira eino wakolere ekyalo nʼokigumirya oku musingi,
era nʼeigulu niiwe owalikolere iwe onanyere.
26 Ibyo byaliwaawo, neye iwe obbeerererawo;
byonabyona byalikairira ni biwaamu ooti kizwalo.
Walibidyaka eedi ooti kizwalo
era ni bigotawo.
27 Neye iwe osigala kyekimo,
nʼobwomibwo tibwalikoma.”
28 Abaana bʼabaweereryabo baabbanga e gyoli ngʼobakuuma;
eibyaire lyabwe lyabbeerererangawo omumaisogo.