103
EZabbuli ya Dawudi.
Ekisa kya Kibbumba
1 Mwoyo gwange owuuje oMusengwa.
Nabuli ekiri omunda mu nze kiwuuje eriinalye iye omutukulye.
2 Mwoyo gwange owuuje oMusengwa,
era tiweerabiranga ebisa byonabyona ebyakola.
3 Asoniya ebibbibibbibyo byonabyona,
nʼalamya endwairegyo gyonagyona.
4 Anunula obwomibwo okuzwa omu kiina ekitakoma,
era nʼakuwa enkabi olwʼokutakakwe okutakoma nʼokusaasira.
5 Amatiza obwomibwo nʼebintu ebisa,
nʼakwirya butobuto ooti kokomi.
6 OMusengwa iye tiyeekubbira,
era alaga obwenkanya eeri bonabona abebagadya.
7 Yamanyikisirye oMusa entegekagye,
era nʼalaga aBaisirairi ebikolebye.
8 Alumirwa era asaasira,
alwawo okusunguwala, era aizwire kutaka okutakoma.
9 Tasengererya okutuvunaana,
waire okubbeererera omusunguwali emirembe gyonagyona.
10 Tatubonereza ngʼebikole byaiswe ebibbibibbi owebituukana,
waire kutusasula ngʼebibbibibbi byaiswe owebiri.
11 Ngʼeigulu obweriri e yala eino nʼekyalo,
nʼokutakakwe okutakoma gikikoma okubba okungi eeri abo abamutya.
12 Ebikole byaiswe ebibbibibbi abitutoolaku,
nʼabiteeka yala na iswe ngʼobuzwaisana obwebuli e yala nʼobugwaisana.
13 Ngʼoiteeye wʼabaana owaabba nʼekisa eeri abaanabe,
atyo nʼoMusengwa waabba nʼekisa eeri abamutya.
14 Amaite ngʼobweyakolere emibiri gyaiswe,
ayebukirya ati tuli nkungu.
15 Obwomi bwʼomuntu bubbaawo ekiseera kitono ooti isubi,
bubbaawo ekiseera kitono ooti kimuli kyʼomu kigona.
16 Ompunga akifuwa,
nandi ni kiirayo okuboneka.
17 Neye omu mirembe gyonagyona okutaka kwa Musengwa okutakoma
kubba kwabo abamutya;
era obusaabwe bubba oku baizukulu baabwe,
18 nʼoku bantu abakuuma endagaanoye,
era ni banyiikiira okukwata amateekage.
19 OMusengwa yateekere entebeye eyʼobwakabaka mwigulu,
era okwo kwafugira byonabyona.
20 Muwuuje oMusengwa inywe abamalaikabe abʼamaani,
inywe abagondera ebiragirobye,
era abagondera ebyakoba.
21 Muwuuje oMusengwa, nywenanywena amajeege agʼomwigulu,
inywe abaweereryabe abakola ebyataka.
22 Muwuuje oMusengwa, inywe ebibbumbebye nywenanywena
omu bifo byonabyona ebyafuga.
Iwe mwoyo gwange, owuuje oMusengwa.