104
Okuwuuja oKibbumba
1 Mwoyo gwange, owuuje oMusengwa.
Oo Musengwa, iwe oKibbumba wange, oli mukulu ino.
Oli nʼamaani era oli nʼekitiisya.
2 Ozwaire ekitangaala ooti kizwalo,
oyanzululya eigulu ooti weema.
3 Oyombeka ekifookyo e kyobbaamu ku maizi agali angulu,
osuuca ebireri kigaalikyo ekyʼamaje,
nʼotyama oku mpunga nʼakutambulya.
4 Osuuca ompunga bakwendabo,
omusyo nʼennimi gyagwo obisuuca baweereryabo.
5 Wakolere ekyalo nʼokigumirya oku musingi gwakyo,
kaisi tikyatengeeta emirembe gyonagyona.
6 Wakibbuunireku amataba ooti bakibiikireku ijoola,
amaizi ni geedumbya okusingamu ensozi.
7 Neye owewagakaawuukiire, ni gairuka;
olwʼokubbwatukakwo, ni gayanguwa okuzwawo.
8 Gakulumukiire oku nsozi,
ni gaserengetera omu biinamo,
gaaba omu bifo e giwagateekeirewo okubbanga.
9 Wagateekeirewo ensalo e gigatayezya kubandya;
okutairangayo tete okutaabaala oku kyalo.
10 Olagira ensulo ni gisindika amaizi omu nkonko,
ni gakulumukira aakati wʼensozi.
11 Ebisolo byʼomu kigona byonabyona ni binywa amaizi ago,
empunda gyʼomu kigona ni giika enyonta.
12 Ebinyonyi ni biruka ebinyumba byabyo okumpi nʼamaizi ago,
ni bikungiranga omu bisaale.
13 Osinzirira omwigulu e gyobba nʼotoonyesya oikendi oku nsozi,
ekyalo ni kiizula ebineneka ebyobalya.
14 Omererya ebisolo eisubi,
nʼomererya abantu ebirime babirabirirenge,
ni bibawa ebyokulya okuzwa omwitakali.
15 Ebirime ebyo bibawa enviinyo egibawa okusangaala,
nʼebizigo ebibaleetera okunyenyenta,
era nʼebyokulya ebibawa amaani.
16 Oikendi asukirira emisaale gya Musengwa,
igyo emivule egyʼe Lebbanooni iye egiyamererye.
17 Mwigyo, ebinyonyi mu byerukira ebinyumba,
ogolo nʼasuna awokugona omu misaale emiwanvu.
18 Enamoli gibba ku nsozi empanvu,
enapowo igyo ni gyebisa omu njatikira.
19 Wateekerewo omweri okulaganga ebiro,
nʼeisana limaite esaawa eyʼokugwa.
20 Oleetawo endikiirya, ni kwirugala,
ebisolo byʼomu kigona byonabyona bizwayo ni bisooba okunoonia ekyokulya.
21 Empologoma enkambwe giruluma nga giyiiga ekyokulya kyagyo,
era nga ginoonia ekyokulya oKibbumba ekyagiwa.
22 Eisana owerizwayo, gisooba,
ni gikanga gyegonera omu mpuku gyagyo.
23 Olwo-so abantu ni bawuluka okwaba omu mirimo gyabwe,
ni bakola paka igulo.
24 Oo Musengwa, ebintu ebyenjawulo ebiwakolere nga bingi ino!
Byonabyona wabikolere nʼamalabuki,
ekyalo kiizwire bibbumbebyo.
25 Waliwo nʼenyanza enene era engalami,
erimu ebibbumbe ebingi ebitabalika,
ebibbumbe ebyomi, ebitono nʼebinene.
26 Emeeri giseeyeeyeraku,
nʼogumpiri oguwabbumbire guzeenyera omwo.
27 Ebibbumbe ebyo byonabyona biringirira niiwe
okubiwa ekyokulya omu kiseera ekituuce.
28 Owobiwa ekyokulya,
bitoola ni birya.
Owobigabirira,
birya ni biikutira nakimo ino.
29 Owobikubbira omugongo,
byeraliikirira ino;
owobitoolamu omwota,
bifa era ni bikanga omu nkungu omu byazwire.
30 Owoobifuwamu omwota,
obikola ni bibba byomi,
era nabuli kimo oku kyalo nʼokisuuca kiyaaka.
31 Oleke ekitiisya kya Musengwa kibbeewo emirembe gyonagyona.
Oleke oMusengwa asangaale olwʼebyo ebiyakolere.
32 Iye oyo alola oku kyalo ni kitengeeta,
iye oyo akwata oku nsozi ni giduunya omwosi.
33 Nayemberanga oMusengwa omu bwomi bwange bwonabwona.
Nayembanga okuwuuja oKibbumba wange nga nkaali ndi mwomi.
34 Oleke ebiseego byange bisangaalyenge oMusengwa,
olwʼokubba eisangaalo lyange liri mu niiye.
35 Oleke abakola ebikole ebibbibibbi bajigirike oku kyalo,
nʼababbibabbi baweerewo nakimo.
Iwe mwoyo gwange, owuujenge oMusengwa.
Muwuujenge oMusengwa.