105
OKibbumba nʼabantube
(1Mi 16:8-22)
1 Mwebalye oMusengwa, mumusinze,
mumanyikisye ebikolebye omu mawanga.
2 Mumwembere, mwembe okumuwuuja,
mutumule oku bikolebye byonabyona ebyewunyisya.
3 Mwenyumirizirenge omu liinalye iye omutukulye,
abo abanoonia oMusengwa basangaale.
4 Munoonienge oMusengwa okubawa amaani,
mumunoonienge bulijo.
5 Mwebukiryenge ebyewunyo ebiyakolere,
nʼebyamagero ebiyakolere, nʼemisango egiyasalire,
6 inywe eibyaire lya Ibbulaimu omuweereryawe,
inywe eibyaire lya Yaakobbo omulondewe.
7 Niiye oMusengwa iye oKibbumba waiswe;
niiye alamula omu kyalo kyonakyona.
8 Akuuma endagaanoye emirembe gyonagyona,
yeekuuma okutuukirirya ebisuubizobye eeri emirembe lukumi.
9 Eyo niiyo endagaano egiyakolere nʼoIbbulaimu,
era ekyeyamo ekiyeeyamiire oIsaka.
10 Endagaano eyo yagikakasire eeri oYaakobbo okubba iteeka,
era nʼeeri oIsirairi okubba ndagaano eyenkalaakalira.
11 Yakobere ati, “Nalibawa ekyalo kyʼe Kanani
ni kibba kyanywe nʼeibyaire lyanywe.”
12 Babbaire bakaali batono,
nga batono ino era nga basenze,
13 nga bagadangada igwanga kwigwanga,
bwakabaka ku bwakabaka.
14 Cooka tiyabbaireku nʼogwaganya okubajolonga;
era oku lwabwe, yakaawukiranga abakabaka ati,
15 “Timukwatanga oku balonde bange;
abanaabbi bange timubakolanga akabbikabbi.”
16 OKibbumba yaleetere enzala omu kyalo kyʼe Kanani,
nʼajigirica ebyokulya byabwe byonabyona.
17 Yatumire omuntu okubeekeerera omumaiso,
nga niiye oYusufu ogubatundire okubba omugalama.
18 Ebigerebye babinuuwire nʼempingu,
eikotirye ni balisibamu ekyoma,
19 paka ekiyabbaire atumwire owekyatuukiriire.
Ekibono kya Musengwa ni kikakasa kiti, yabbaire mutuuce.
20 OFalaawo yamutumisirye nʼamutoola omu mabbuusu,
iye oyo omufugi wʼabantu nʼamuteera.
21 Omufugi oyo yamuwaire obukulu omu nyumbaye,
nʼokukulira ebintu byʼomufugi oyo byonabyona,
22 okulagiranga abakungu ngʼowaataka,
nʼokuwanga abakulu amalabuki.
23 Awo oIsirairi nʼayaba e Misiri,
oYaakobbo oyo yawulikiire omu kyalo kyʼe Kaamu.
24 OMusengwa yawaire abantube aBaisirairi okubyalagana ino,
nʼabasuuca bangi ino okukiraku abalabe baabwe.
25 Yacuusire emyoyo gyʼaBamisiri ni bacaawa abantube aBaisirairi,
era ni basalira abaweereryabe enkwe.
26 Awo oMusengwa nʼatuma oMusa omuweereryawe
nʼAlooni omulondewe.
27 Ni bakola obumanyiciryo bwʼebyewunyo bya Kibbumba omu Bamisiri,
nʼebyamagero omu kyalo kya Kaamu.
28 OMusengwa nʼasindika endikiirya nʼekwata oku kyalo,
neye aBamisiri ni bajeemera ekibonokye.
29 Amaizi gʼomu miiga gyabwe yagasuucirye musaaye,
enyanyi gyabwe ni gifa.
30 Ekyalo kyabwe ni kiizula ebikere,
ni bingira nʼomu bisenge bya kabaka waabwe.
31 OMusengwa nʼalagira ebiziima byʼenzi nʼenkukuni
ni biizula omu kyalo kyʼe Misiri mwonamwona.
32 Omukifo kya ikendi, yabasindikiire mabbaale ga ikendi,
nʼokumesya ni kubba nabuli wantu omu kyalo kyabwe.
33 Yajigiricirye emizabbibbu nʼemitiini gyabwe,
nʼavunianka emisaale gyonagyona omu kyalo kyabwe.
34 Nʼalagira enzige ni giiza,
ni gibba nyingi nga tigibalika.
35 Ni girya ebimera byonabyona omu kyalo kyabwe,
ni girya ebirime byabwe byonabyona.
36 Nʼaita abataane baabwe ababere bonabona omu kyalo kyabwe,
ibo abaana baabwe abʼomu mavuvuka.
37 Awo nʼatoolayo aBaisirairi nga bali nʼefeeza nʼezaabbu,
bonabona nga boomi era bʼamaani.
38 ABamisiri ni basiima ino ngʼaBaisirairi basimbuka,
olwʼokubba babbaire babeeraliikirirya.
39 OMusengwa nʼayanzululya ekireri ni kibabiikanga,
nʼateekawo nʼomusyo okubamoleekereranga obwire.
40 Basabire nʼabawa enindu,
era yabawaire ebyokulya bibitiriri okuzwa omwigulu.
41 Yakubbire eibbaale amaizi ni gatiiriika okuzwamu,
ni gakulumukira omwidungu ooti mwiga.
42 Kyabbaire kityo olwʼokubba yayebukiirye ekisuubizokye iye omutukulye,
ekiyasuubizire oIbbulaimu omuweereryawe.
43 Kagira yatoire abantube omu Misiri nʼeisangaalo,
ibo abalondebe yabatoireyo nga bajaagaana.
44 Nʼabawa ebyalo byʼabanamawanga,
era ni basuna obwananyini oku birime badi ebibabbaire bakalabanire,
45 kaisi bayezye okugonderanga ebiragirobye,
era bakwatenge amateekage.
Muwuujenge oMusengwa.