106
OKibbumba musa eeri abantube
1 Muwuujenge oMusengwa.
Mwebalyenge oMusengwa, olwʼokubba musa;
okutakakwe okutakoma kubbeerererawo emirembe gyonagyona.
2 Naani ayezya okubbutula ebyʼamaani byonabyona oMusengwa ebyakola,
ooba okumuwuuja ekimala ngʼowaasaanira?
3 Bʼenkabi ibo abo abakola ebyobwenkanya,
ibo abakola ebituuce bulijo.
4 Oo Musengwa onjebukiryenge, ngʼokolera abantubo ebyʼekisa,
zena ombeerenge ngʼobanunula,
5 olwo kaisi njezye okubona ngʼabalondebo basuna ebisa,
nsangaalire aamo nʼeigwangalyo;
neenyumirizire aamo nʼabantubo okububwo.
6 Tukolere ebikole ebibbibibbi ngʼabazeiza baiswe owebakolere,
tusoberye, ni tukola obubbibubbi.
7 Abazeiza baiswe nga bali e Misiri,
tibafiireyo okwebukirya ebyamagero ebiwakolere.
Tibayebukiirye okutakakwo okutakoma,
wazira bajeemere owebatuukire oku nyanza entukuliki.
8 Neye era iye yabanunwire oku lwʼeriinalye,
kaisi alage obwezyebwe obubitiriri.
9 Yakaawukiire enyanza entukuliki nʼekalira;
yabeekubbembeire ni babita omu lukonko nga lukalu ooti idungu.
10 Yabalokoire omu bwezye bwʼababacaawa;
yabanunwire omu bwezye bwʼabalabe baabwe.
11 Amaizi gamirire abalabe baabwe,
nandi ni wasigalakuuwo kadi moiza.
12 Awo-so abantube ni baikirirya ebiyatumwire,
ni bayemba nga bamuwuuja.
13 Neye beerabiire mangu ebiyabbaire akolere,
era tibakuumiriire okulungamyakwe.
14 Nga bali omwidungu babitiriirye okutaka ebyokulya,
era owebabbaire eeyo, ni bagezesya oKibbumba.
15 Kale nʼabawa ekibamusabire,
neye nʼabasindikamu okawumpuli.
16 Nga bali omu nkambi, bakwatiire oMusa engongi,
ni bagikwatira nʼAlooni omuwonge wa Musengwa.
17 Eitakali lyatikire ni limira oDasani,
era ni lirya Abbiraamu nʼabainaye.
18 Omusyo gwatumbukire omu basengereri baabwe,
era omusyo ni gumalawo abantu abo ababbibabbi.
19 Nga bali e Kolebbu, babbumbire ekifaananyi kya nyana ekyʼokusinza,
ni basinza ekitali Kibbumba ekibabbumbire omu kyoma.
20 Ekitiisya ekibandiwaire oKibbumba,
ni bakiwa kifaananyi kya nte, iye alya isubi.
21 Beerabiire oKibbumba eyabanunwire,
iye eyabbaire akolere ebikulu omu Misiri,
22 nʼebyewunyo ebiyabbaire akolere omu kyalo kyʼe Kaamu,
nʼebyʼentiisya ebiyabbaire akolere oku nyanza entukuliki!
23 Nʼolwekyo oKibbumba nʼakoba ati yankubbaire abasaanyawo,
singa oMusa omulondewe,
tiyayemereirewo okumwegairira oku lwʼabantu,
atyo nʼaica obusungu nandi nʼabasaanyawo.
24 Awo ni banyooma ekyalo ekyesiimisya,
olwʼokubba tibaikiririirye omu kisuubizokye.
25 Neye beemuluguunyiire omu weema gyabwe,
era nandi bagondera oMusengwa.
26 Kagira yasiirirye engalogye ngʼalayira ati,
yalibaitira omwidungu,
27 nʼaitira eibyaire lyabwe omu banamawanga,
ni basalaanikira omu byalo nago.
28 Beemigiire omu kusinza oBbaali Peyoli,
ni balya ebibawongereyo eeri abafu.
29 Bagirire oMusengwa nʼabasunguwalira olwʼebikole byabwe,
era okawumpuli nʼabagwamu.
30 Awo oFenekansi nʼaguma nʼabingiramu era nʼabonereza abasoberye,
era okawumpuli nʼakoma.
31 Ekyo ni kimuzweraku okumubala okubba omutuukirirye,
emirembe gyonagyona.
32 Oku nsulo gyʼe Meribba yona basunguwaliiryeyo oMusengwa,
ni baleetera oMusa emiteewaana.
33 Ekyo kityo olwʼokubba basunguwairye ino oMusa,
nʼatumula ebyʼekisiru.
34 Tibasaanyirewo abanamawanga,
ngʼoMusengwa oweyabbaire abalagiire.
35 Neye ni bakolagana nabo,
era ni beega enkola gyabwe egyʼobukaafiiri.
36 Ni basinza ebifaananyi byabwe ebyʼokusinza,
ekintu ekyabasuukiire omutego.
37 Ni bawangayo nʼabaana baabwe abaisuka,
nʼabaala okubba esadaaka eeri emizimu.
38 Basukanga omusaaye ogunambulaku musango,
omusaaye gwʼabataane baabwe nʼabaala baabwe
abebaawangayo ngʼesadaaka eeri abakibbumba bʼe Kanani.
Ekyalo ni bakyonoona nʼokusuka omusaaye.
39 Batyo ni beeyononesya, olwʼebikole byabwe,
era olwʼebikole byabwe ni babba tibeesigwa eeri oKibbumba.
40 OMusengwa kagira yasunguwaliire ino abantube,
era nʼazuzuula abantube okububwe.
41 Yabawaireyo eeri abanamawanga,
era ababacaawa ni babafuganga.
42 Abalabe baabwe ni babajooganga,
era nʼabaica ansi wʼeifuge lyʼabalabe baabwe!
43 Emirundi mingi oMusengwa yabanunulanga,
neye ibo ni basalangawo kumujeemera,
era ni beeyongeranga kweinika mu kukolanga kibbikibbi.
44 Neye era yabakwatiranga ekisa omu kuluga kwabwe,
nʼawuliranga okukunga kwabwe.
45 Oku lwabwe, nʼayebukiryanga endagaanoye,
era nʼairyanga omwoyo olwʼokutakakwe okubitiriri.
46 Nʼaleeteranga bonabona ababawambanga,
okubakwatiranga ekisa.
47 Oo Musengwa, iwe oKibbumba waiswe otununule,
otusolooje okuzwa omu mawanga,
kaisi twezye okwebalyanga eriinalyo iwe omutukulye,
era tusangaalenge nga tukuwuuja.
48 OMusengwa, oyo oKibbumba wa Isirairi, bamuwuujenge
emirembe nʼemirembe.
Era abantu bonabona
bakobenge bati, “Amiina!”
Muwuujenge oMusengwa.