EKITABO EKYOKUTAANU
107
(Zab 107–150)
Okwebalya oMusengwa owʼekisa
1 “Mwebalye oMusengwa olwʼokubba musa;
okutakakwe okutakoma kubbeerererawo emirembe gyonagyona.”
2 Oleke oMusengwa abeyanunwire bakirangirire;
abo abeyanunwire omu bwezye bwʼomulabe,
3 abo abeyasoloojere okuzwa omu mawanga,
okuzwa e buzwaisana nʼe bugwaisana, nʼe mambuka nʼe maserengeta.
4 Bagadangadiire omwidungu,
nga tibabona enzira eyaba omu kibuga e gibayezya okutyama.
5 Enzala nʼenyonta byabalumire,
era ni bawaamu eisuubi.
6 Awo ni beekungirira oMusengwa omu bigosi byabwe,
era nʼabanunula omu kuluga kwabwe.
7 Yabeekubbembeire omu nzira enterembereri,
paka owebatuukire omu kibuga awokutyama.
8 Kale beebalye oMusengwa olwʼokutakakwe okutakoma
nʼolwʼebyewunyobye ebyakolera abantu.
9 Ekyo kityo olwʼokubba abo abali enyonta, iye agibamalaku
era aikutya abanzalwa nʼebintu ebisa.
10 Abamo babbanga mu ndikiirya ikyo ekiiriirye ekyokufa,
nga basibe omu mabbuusu, era nga banyigule oku njegere,
11 olwʼokujeemera ebiragiro bya Kibbumba,
nʼokunyooma okusisiitira kwʼoNambulaku aMwagaagana.
12 Kale nʼabeeyanikisya emyoyo gyabwe nʼemirimo egikaluba;
baagwanga ansi neye nga mpaawo ababbeera.
13 Awo ni beekungirira oMusengwa omu bigosi byabwe,
era nʼabanunula omu kuluga kwabwe.
14 Nʼabatoola omu ndikiirya ikyo ekiriirye kyʼokufa,
nʼakutula enjegere egyabbaire gibanyigwire.
15 Kale beebalye oMusengwa olwʼokutakakwe okutakoma,
nʼolwʼebyewunyo ebyakolera abantu.
16 Amenya amageeti agebakolere omu bbulonzi,
nʼakutulamu emitalimbwa.
17 Abamo omu basirusiru bwabwe boonoonere,
era ni bagada olwʼebibbibibbi byabwe.
18 Emyoyo gyabwe gyenyinyairye ebyokulya byonabyona,
ni batuuka ku mugo gwʼamagombe.
19 Awo ni beekungirira oMusengwa omu bugosi bwabwe,
era nʼabanunula omu kuluga kwabwe.
20 Yatumire ekibonokye nʼabalamya,
nʼabanunula omu kufa.
21 Kale beebalye oMusengwa olwʼokutakakwe okutakoma,
nʼolwʼebyewunyo ebyakolera abantu.
22 Bawengeyo esadaaka egyʼokwebalya,
era bayembenge nʼeisangaalo okulangirira ebyakola.
23 Abamo baseeyeeyeire oku nyanza omu meeri;
nga batambulya ebyamaguli oku gunyanza.
24 Baboine ebikole oMusengwa ebiyakolere,
ebyewunyisya ebiyakolere oku ganyanza.
25 Yalagiire ompunga owʼamaani nʼafuwa,
nʼasetula amayengo oku gunyanza.
26 Ni gasetula emeeri omwibbanga, era ni gigwa ansi omu lwina lwa mayengo.
Omu kabbikabbi akatyo ni bawaamu emyoyo.
27 Ni bayuuga era ni bagagaituka ooti bateemeere,
era ni bakaya ekyokukola.
28 Awo ni beekungirira oMusengwa omu bugosi bwabwe,
era nʼabanunula omu kuluga kwabwe.
29 Yasiricirye ompunga,
era amayengo ni gawaaku.
30 Awo ni basangaala olwʼamayengo okuwaaku,
nʼabalungamya ni batuuka oku mwalo egibatakire.
31 Kale beebalye oMusengwa olwʼokutakakwe okutakoma,
nʼolwʼebyewunyobye ebyakolera abantu.
32 Oleke bamugulumalye omu lukumbaana lwʼabantu,
era bamuwuuje omu lukiiko lwʼabeekubbemberi.
33 Asuuca emiiga idungu,
nʼasuuca ensulo gyʼamaizi itakali erikalu.
34 Nʼasuuca ekyalo ekijimu kikwere,
olwʼobubbibubbi bwʼabo abakityamamu.
35 Asuuca eidungu ni libbaamu ebidiba byʼamaizi,
nʼekyalo ekikalu ni kibbaamu ensulo egikulumuka.
36 Era omwo mwateeka abanzalwa okubbanga,
ni bombekamu ekibuga ekyʼokutyamangamu.
37 Basiga ensigo omu misiri, ni bakoma emizabbibbu,
era ni basuna amakungula mangi.
38 Yabawaire enkabi ni beeyongera ino obungi,
era nandi nʼaganya ebyayo byabwe okukendeera.
39 Owebakendeire obungi ni banyolwa
olwʼokubagadya, nʼebigosi, nʼenima,
40 oMusengwa yanyoomere abakungu baabwe,
nʼabaleetera okugadangadira omwidungu awabula enzira.
41 Neye abadamba yʼabatoire omu kugada,
era ebisito byabwe nʼabiizulya abantu ooti biraalo ebirimu ebyayo ebingi.
42 Abatuukirirye babona ebyo era ni basangaala,
neye ababbibabbi bonabona ni babbuunaku eminwa gyabwe.
43 Nabuli ali nʼamalabuki, ebyo abiteekeku omwoyo;
era bafumintirizenge oku kutaka okwa Musengwa okutakoma.